ໂທລະເລກການທູດສະບັບນຶ່ງຂອງສະຫະລັດ ທີ່ວັບໄຊ້ທ໌Wikileaks ໄດ້ນໍາອອກມາແຜ່
ແບນັ້ນ ໄດ້ເປີດເຜີຍໃຫ້ຮູ້ກ່ຽວກັບການໂຕນໜີທີ່ບໍ່ໄດ້ມີການລາຍງານໃຫ້ຮູ້ມາກ່ອນຂອງ
ເຈົ້າໜ້າທີ່ຂັ້ນສູງຂອງເກົາຫລີເໜືອຫລາຍຄົນ ແລະວ່າມີບັນຫາຫລາຍຢ່າງຫລາຍແນວ
ກັບແຜນການສືບທອດອໍານາດຂອງເກົາຫລີເໜືອໃນຕົ້ນປີນີ້.
ໂທລະເລກສະບັບດັ່ງກ່າວ ທີ່ລົງວັນທີ 14 ເດືອນມັງກອນ2010 ນີ້ ແລະເອກອັກຄະລັດ
ຖະທູດສະຫະລັດ ປະຈໍາເກົາຫລີໃຕ້ ທ່ານນາງ Kathleen Stephens ສົ່ງມາຍັງວໍຊິງຕັນ
ນັ້ນ ໄດ້ອ້າງເຖິງການສົນທະກັນ ລະຫວ່າງເຈົ້າໜ້າທີ່ສະຖານທູດທ່ານນຶ່ງ ກັບທ່ານ Yu
Myung-hwan ທີ່ດໍາລົງຕໍາແໜ່ງລັດຖະມົນຕີການຕ່າງປະເທດເກົາຫລີໃຕ້ ມາຮອດເດືອນ ກັນຍາປີນີ້.
ໂທລະເລກເວົ້າວ່າ ທ່ານ Yu ໄດ້ເປີດເຜີຍວ່າ ມີເຈົ້າໜ້າທີ່ຂັ້ນສູງຂອງເກົາຫລີເໜືອ
ຫລາຍຄົນ ຊຶ່ງທ່ານບໍ່ໄດ້ບອກຈໍານວນທີ່ແທ້ຈິງໃຫ້ຮູ້ທີ່ເຮັດວຽກຢູ່ຕ່າງປະເທດໄດ້ໂຕນໜີ
ໄປຍັງເກົາຫລີໃຕ້ໃນຫວ່າງໄວໆຜ່ານມານີ້. ໂທລະເລກໄດ້ເອົາເລື່ອງການໂຕນໜີນີ້ໄປ
ພົວພັນກັບສະພາບຄວາມສັບສົນວຸ້ນວານທີ່ເພີ່ມທະວີຂຶ້ນໃນເກົາຫລີເໜືອ ຫລັງຈາກເກົາ
ຫລີເໜືອໄດ້ທໍາຄວາມພະຍາຍາມປະຕິຮູບເງິນຕາຂອງຕົນ ທີ່ປະຊາຊົນບໍ່ນິຍົມນໍານັ້ນ.
ໂທລະເລກນີ້ຍັງອ້າງຄໍາເວົ້າຂອງທ່ານ Yu ທີ່ວ່າການປະຕິຮູບເງິນຕາໄດ້ສ້າງບັນຫາຢ່າງ
ໃຫຍ່ຫລວງໃຫ້ອໍານາດປົກຄອງເກົາຫລີເໜືອແລະວ່າ ການໂອນອໍານາດທີ່ວາງແຜນໄວ້
ຈາກຜູ້ນໍ່ສູງສຸດ ທ່ານກິມຈົງອີລ ໃຫ້ລູກຊາຍຫລ້າ ທ້າວກິມຈົງອູນ ນັ້ນ ບໍ່ໄດ້ດໍາເນີນໄປ
ຢ່າງລາບລື່ນ.