ສານແຫ່ງນຶ່ງໃນກຸງລອນດອນ ໄດ້ປະຕິເສດຕໍ່ການຂໍປະກັນໂຕນາຍ Julian Assange ຜູ້ກໍ່ຕັ້ງ WikiLeaks ໃນຂະນະທີ່ຜູ້ກ່ຽວກໍາລັງຕໍ່ສູ້ກັບການຖືກສົ່ງໂຕໄປຍັງ Sweden ບ່ອນທີ່ທາງການຕ້ອງການໂຕຜູ້ກ່ຽວໄປສອບປາກຄໍາກ່ຽວກັບ ຂໍ້ກ່າວຫາ ກະທໍາຄວາມຜິດທາງເພດນັ້ນ.
ໃນວັນອັງຄານວານນີ້ ສານໄດ້ສັ່ງໃຫ້ກັກໂຕນາຍ Assange ໄວ້ໃນອັງກິດຈົນຮອດເວລານາຍ Assange ຈະໄປປາກົດໂຕຕໍ່ສານເທື່ອໜ້າ ຄືວັນທີ 14 ເດືອນນີ້. ນາຍ Assange ຖືກຈັບ ເວລາເຂົ້າມອບໂຕຕໍ່ຕໍາຫລວດໃນກຸງລອນດອນ ຫລັງຈາກທາງການຂອງ Sweden ໄດ້ອອກໝາຍຈັບຜູ້ກ່ຽວໃນຂໍ້ຫາຖານທໍາຄວາມຜິດທາງເພດ ຊຶ່ງນາຍ Assange ປະຕິເສດຕໍ່ຂໍ້ກ່າວຫາທັງໝົດນັ້ນ.
ຄະດີນາຍ Assange ເກີດມາຈາກການປະເຊີນໜ້າຂອງຜູ້ກ່ຽວກັບແມ່ຍິງ 2 ຄົນໃນ
ເດືອນສິງຫາຜ່ານມາ. ທະນາຍຄວາມຂອງລາວກ່າວວ່າ ຂໍ້ຂັດແຍ້ງກັນນັ້ນແມ່ນ ອັນທີ່ທ່ານເອີ້ນວ່າ ການຮ່ວມເພດດ້ວຍການເຫັນດີຈາກທັງສອງຝ່າຍ ໂດຍບໍ່ໃຊ້ສິ່ງປ້ອງກັນ ແລະກ່າວຫາຄືນວ່າ ການກ່າວຫາເຫລົ່ານີ້ທັງໝົດ ແມ່ນມີຈຸດປະສົງທາງການເມືອງ.
