ລິ້ງ ສຳຫລັບເຂົ້າຫາ

logo-print

ພັນລະຍາຂອງ ທ່ານສົມບັດ ສົມພອນ ຍັງຄອຍຖ້າ ການກັບມາ ຂອງສາມີ


ທ່ານສົມບັດ ສົມພອນ ແລະພັນລະຍາ ທ່ານນາງ Ng Shui Meng
ພັນ​ລະ​ຍາ​ຂອງ​ທ່ານ​ສົມບັດ ສົມ​ພອນ ຍັງ​ຄອຍຖ້າ​ການ​ກັບ​ມາ​
ຂອງ​ຜູ້​ເປັນ​ສາມີ​ຢູ່​ເລື້​ອຍມາ ​ເຖິງ​ແມ່​ນວ່າ ທ່ານ​ສົມບັດ ຈະ​ໄດ້​
ຫາຍ​ຕົວ​ໄປ​ໂດຍ​ບໍ່​ຮູ້​ຊະ​ຕາ​ກໍາ​ນັບ​ເປັນ​ເວລາ​ກວ່າ​ 1 ປີ ມາ​ແລ້ວ​
ກໍ​ຕາມ.


ທ່ານ​ນາງ Ng Shui Meng ພັນ​ລະ​ຍາ​ຂອງ​ທ່ານ​ສົມ​ບັດ ສົມ​ພອນ
ນັກ​ພັທະ​ນາລາ​ວ ຜູ້ດີ​ເດັ່ນຂອງ​ອາ​ຊ່ຽນ ທີ່​ຫາຍ​ຕົວ​ໄປ​ນັບ​ຕັ້ງ​ແຕ່
​ວັນ​ທີ 15 ທັນວາ​ 2012 ​ເປັນ​ຕົ້ນມາ​ນັ້ນ ​ໄດ້​ອອກ​ຖະ​ແຫຼ​ງການ​ໃນ​ໂອກາດ​ການ​ຫາຍ​ຕົວ​
ໄປຂອງທ່ານ​ສົມບັດ ຄົບຮອບ 1 ປີ ​ເພື່ອ​ເຊີນຊວນ ​ໃຫ້​ບັນດາ​ຜູ້​ທີ່​ຮັກ​ແພງ​ຄວາມ​ເປັນທໍາ​
ທັງ​ທີ່ຢູ່​ໃນ​ລາວ​ແລະ​ຕ່າງປະ​ເທດ ​ໄດ້​ຮ່ວມກັນ​ຂຽນ​ຈົດໝາຍ​ເຖິງ​ທ່ານ​ສົມບັດ ທີ່​ມີ​ເນື້ອ​ຫາ
​ກ່ຽວ​ກັບ​ຊີວິດ​ຜົນງານ ​ແນວ​ຄິດ ອຸດົມ​ການ ​ແລະ​ວິທີ​ປະຕິບັດ​ງານ​ຂອງ​ທ່ານ​ສົມບັດ ​ເພື່ອ
​ເຜີຍແຜ່​ ອອກ​ສູ່​ການ​ຮຽນ​ຮູ້​ ຂອງ​ສາທາ​ລະນະ​ຊົນ ​ໃນ​ວົງ​ການຕໍ່​ໄປ​.

ທັງ​ນີ້​ໂດ​ຍທ່ານ​ນາງ Ng Shui Meng ​ໄດ້​ຮຽກຮ້ອງ​ວ່າການ​ຂຽນ​ຈົດໝາຍເຖິງ​ທ່ານ ສົມບັດ ດັ່ງກ່າວ​ ຄວນ​ມີ​ເນື້ອ​ຫາ​ທີ່​ສ້າງສັນ ຫຼື​ສະ​ແດງ​ເຖິງ​ຄວາມ​ເປັນ​ຫ່ວງ​ເປັນ​ໄຍ ​ແລະ​ບໍ່​ຄວນມີ​ເນື້ອ​ຫາ​ດ້ານ​ລົບ ຫຼື​ເປັນ​ການ​ກ່າວ​ຫາ​ຢ່າງ​ສ້າງສັນ ພ້ອມ​ກັນ​ນີ້ ຜູ້​ຂຽນ​ຈົດໝາຍ​ຍັງ​ຈະ​ຕ້ອງ​ລົງ​ຊື່​ກ່ອນ ທີ່​ຈະ​ຖືກ​ຄັດ​ເລື​ອກ​ໃຫ້​ລົງ​ເຜີຍ​ແຜ່ໃນ Website ​ແລະ Facebook ທີ່​ຊື່ວ່າ Sombath Somphone ຕໍ່​ໄປ.

ທ່ານ ສົມບັດ ສົມພອນ ກັບເຍົາວະຊົນລາວ
ທ່ານ ສົມບັດ ສົມພອນ ກັບເຍົາວະຊົນລາວ

​ໂດຍ​ການ​ປະຕິບັດ​ດັ່ງກ່າວ​ນີ້ ກໍ​ເພື່ອ​ເປັນ​ການ​ສົ່ງ​ກໍາ​ລັງ​ໃຈ ​ແລະ​
ຄວາມ​ປາດ​ຖະໜາ​ດີ​ໄປ​ເຖິງ​ທ່ານ​ສົມບັດທີ່​ຫາຍ​ຕົວ​ໄປ​ນັບ​ເປັນ​
ລະຍະ​ເວລາ​ກວ່າ 1 ປີ​ມາແລ້ວ​ ຫາ​ກ​ແຕ່​ວ່າ​ສໍາລັບ​ທ່ານ​ນາງ Ng
Shui meng ນັ້ນກໍ​ຍັງ​ມີ​ຄວາມ​ຫວັງ​ແລະ​ຄອຍ​ຖ້າ ການ​ກັບ​ຄືນ​
ມາ​ຂອງ​ ຜູ້​ເປັນສາມີ​ ຢູ່​ຕະຫຼອດ​ເວລາ ດັ່ງ​ທີ່​ທ່ານ​ນາງ ​ໄດ້​ເຜີຍ​
ເຖິງ​ ຄວາມ​ໃນ​ໃຈ ດັ່ງກ່າວ​ວ່າ:

ສຽງ...

ນອກຈາກ​ການ​ເຊີນຊວນ​ໃຫ້​ມີ​ການ​ຂຽນ​ຈົດໝາຍ​ເຖິງ​ທ່ານ​ສົມບັດດັ່ງກ່າວ​ແລ້ວ ບັນດາ
ອົງການ​ຄຸ້ມ​ຄອງ​ສິດທິ​ມະນຸດ​ສາກົນ ​ເຊັ່ນ​ເຄືອ​ຂ່າຍ​ສະໝານ​ສັນ​ພາກ​ປະຊາຊົນ​ອາ​ຊ່ຽນ
ຄະນະ​ປະສານ​ງານມະຫະກໍາ​ພາກ​ປະຊາຊົນ​ອາ​ຊ່ຽນ​ກັບ​ຢູ​ໂຣບ ຄະນະ​ກໍາມະການ​ປະ
ສານ​ງານ​ອົງ​ກອນ​ພັດທະ​ນາ​ເອກ​ກະ​ຊົນ​ໄທ​ ​ເຄືອ​ຂ່າຍ​ອົງ​ກອນ​ພັດທະນາ​ເອກ​ກະ​ຊົນ​
ຍີ່ປຸ່ນ ​ແລະ​ເຄືອ​ຂ່າຍ ເຍົາວະ​ຊົນ​ອາ​ຊ່ຽນ ກໍ​ໄດ້​ພາກັນ​ຈັດ​ກິດຈະ​ກໍາ​ເພື່ອ​ຮຽກຮ້ອງ​ຂໍ​ໃຫ້​
ທາງ​ການ​ລາວ​ຕາມ​ຫາ ​ແລະ ​ໃຫ້ການ​ຊ່ວຍ​ເຫຼືອ​ທ່ານ​ສົມບັດ ຢ່າງ​ຈິງ​ຈັງ​ອີກ​ດ້ວຍ.

ກ່ອນ​ໜ້າ​ນີ້ ທ່ານ Walden Bello ຮອງ​ປະທານ​ຄະນະ​ກໍາມະການ​ດ້ານ​ສິດທິ​ມະນຸດ​ຂອງ​ລັດຖະສະພາ​ອາ​ຊ່ຽນ ​ໄດ້​ຖະ​ແຫຼ​ງການ ​ໃນ​ໂອກາດ​ທີ່​ຄະນະ​ຜູ້​ແທນ​ຂອງ​ລັດຖະ ສະພາ​ຢູ​ໂຣບຢ້ຽມຢາມ ສປປ.ລາວ ຢ່າງ​ເປັນ​ທາງ​ການ ​ໃນ​ວັນ​ທີ 28 ຕຸລາ ວ່າ​ຖື​ເປັນ​ໂອກາດ​ນຶ່ງ
ທີ່​ຈະ​ໄດ້​ທວງ​ຖາມ​ທາງ​ການ​ລາວ​ ເຖິງ​ຄວາມ​ຄືບໜ້າ​ຂອງ​ການ​ສືບ​ຫາ​ຄວາມ​ຈິງກ່ຽວ​ກັບ​
ກໍລະນີ​ຂອງ​ທ່ານ​ສົມບັດ ສົມ​ພອນ ນັກ​ພັດທະນາ​ລາວ ຜູ້ດີ​ເດັ່ນ​ຂອງ​ອາ​ຊ່ຽນ ທີ່​ໄດ້​ຫາຍ​
ຕົວໄປ​ ນັບ​ຕັ້ງ​ແຕ່​ວັນ​ທີ 15 ທັນວາ 2012 ​ເປັນ​ຕົ້ນ​ມາ.

ຄະນະ​ຜູ້​ແທນ​ ຂອງ​ລັດຖະສະພາ​ຢູ​ໂຣບ ທີ່​ຢ້ຽມຢາມ​ລາວ​ດັ່ງກ່າວ​ ນໍາ​ໂດຍ​ທ່ານ Werner Langen ປະທານ​ລັດຖະພາ​ຢູ​ໂຣບ ຊຶ່ງຄະນະ​ຂອງ​ທ່ານ​ໄດ້​ພົບ​ປະ​ເຈລະຈາ​ຮ່ວມ​ກັນ​ກັບ​ຄະນະ​ຜູ້​ແທນ​ຂອງ​ສະພາ​ແຫ່ງ​ຊາດ​ລາວ​ທີ່​ມີ ທ່ານ​ໄຊ​ສົມ​ພອນ ພົມວິຫານ ຮອງ​ປະທາ​ນສະ
ພາ​ແຫ່ງ​ຊາດ​ລາວ​ເປັນ​ຫົວໜ້າ​ຄະນະ ​ໂດຍທັງສອງ​ຝ່າຍ​ກໍ​ໄດ້​ແລກ ປ່ຽນ​ທັດສະນະ​ຄວາມ​ເຫັນ​ທັງ​ໃນ​ດ້ານ​ການ​ພັດທະນາ​ເສດຖະກິດ ສັງຄົມ ​ແລະ​ສິດທິ​ມະນຸດ ທັງ​ທີ່​ເປັນ​ການ​ຮ່ວມ​ມື​ລະຫວ່າງ​ສະພາ​ແຫ່ງ​ຊາດ​ລາວ​ກັບ​ລັດຖະສະພາ​ຢູໂຣບ ​ແລະ​ລັດຖະສະພາ​ອາ​ຊ່ຽນ​ອີກ​ດ້ວຍ.

ແຕ່​ຢ່າງ​ໃດ​ກໍ​ຕາມ​ ສະມາຊິກ​ລັດຖະສະພາ​ຢູ​ໂຣບ ກໍ​ເຄີຍ​ພົບ​ປະ​ເຈລະຈາ​ກັບເຈົ້າໜ້າທີ່​
ຂອງ​ທາງ​ການ​ລາວ​ຢູ່​ນະຄອນ​ວຽງ​ຈັນມາ​ແລ້ວ​ຄັ້ງ​ນຶ່ງ ​ເມື່ອ​ເດືອນ​ສິງຫາ​ປີ​ນີ້ ​ໂດຍ​ຄະນະ​ ຜູ້ແທນ​ຂອງ​ລັດຖະສະພາ​ຢູ​ໂຣບຢືນຢັນ​ວ່າ​ ຈະ​ດໍາ​ເນີນ​ມາດ​ຕະການ​ກົດ​ດັນລັດຖະບານ​
ລາວ​ຫຼາຍຂຶ້ນ​ ໃນ​ກໍລະນີ​ການ​ຫາຍ​ຕົວ​ໄປ​ຂອງ​ທ່ານ​ສົມບັດ ​ເພາະ​ເຫັນ​ວ່າ​ທາງ​ການລາວ
ບໍ່​ໄດ້​ດໍາ​ເນີນ​ການ ຢ່າງ​ຈິງ​ຈັງ​ໃນ​ການ​ສືບສວນ​ເພື່ອ​ຄົ້ນ​ຫາ​ຄວາມ​ຈິງ.

ທັງ​ນີ້​ໂດຍ​ກໍ​ລະ​ນີ ທີ່​ສະທ້ອນ​ໃຫ້​ເຫັນ​ເຖິງ ຄວາມ​ຈິງຈັງ​ຂອງ​ທາງ​ການ​ລາວ​ໄດ້​ຢ່າງ​ຊັດ​
ເຈນ ກໍ​ຄື​ການ​ທີ່​ບໍ່​ໄດ້​ໃຊ້​ປະ​ໂຫຍ​ດຈາກ​ພາບ ທີ່​ກ້ອງ​ວົງ​ຈອນ​ປິດຂອງ​ທາງ​ການ​ລາວ​
ບັນທຶກ​ໄວ້​ໄດ້​ໃນ​ຕອນ​ແລງ​ຂອງ​ວັນ​ທີ 15 ທັນວາ 2012 ຊຶ່ງ​ເປັນ​ມື້​ທີ່​ທ່ານ​ສົມບັດຖືກ
ລັກພາ​ຕົວ​ໄປ​ຈາກ ປ້ອມ​ຕໍາຫຼວດ​ໃນ​ເຂດ​ນະຄອນ​ວຽງ​ຈັນ.

ກ່ອນ​ໜ້າ​ນີ້ ພັນ​ເອກ ​ເພັງ​ສະຫວັນ ທິບ​ພະ​ວົງ​ໄຊ ຮອງ​ຫົວໜ້າ​ກົມ​ໃຫຍ່ຕໍາຫຼວດ ກະຊວງ​
ປ້ອງ​ກັນ​ຄວາມ​ສະຫງົບ​ພາຍ​ໃນ ​ໄດ້​ໃຫ້ການ​ຢືນຢັນ​ໃນ​ໂອກາດຖະ​ແຫຼ​ງຂ່າວ​ຢ່າງ​ເປັນ​
ທາງ​ການ​ຄັ້ງ​ທີ 3 ກ່ຽວ​ກັບ​ກໍລະນີ​ການ​ຫາຍ​ຕົວ​ໄປ​ຂອງ ທ່ານ​ສົມບັດ ວ່າ​ທາງ​ການ​ຕໍາ
ຫຼວດ​ລາວ​ໄດ້​ດໍາ​ເນີນ​ການ​ສືບສວນ​ສອບ​ສວນ​ ເພື່ອ​ຄົ້ນ​ຫາ​ຄວາມຈິງ​ກ່ຽວ​ກັບ​ກໍລະນີ​
ດັ່ງກ່າວ​ນີ້​ຢູ່​ເລື້ອຍ​ມາ.

ເບິ່ງຄວາມເຫັນ (17)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ
XS
SM
MD
LG