ສຳລັບອິນເດຍ ການກັບຄືນເຂົ້າກຳອຳນາດຂອງທ່ານນາງຊິກ ຮາຊີນາ ຈາກພັກສັນນິບາດອາວາມີ ຢູ່ໃນບັງກລາແດັສ ເປັນສະໄໝທີ 4 ລຽນຕິດ ແມ່ນເປັນການເຄື່ອນໄຫວໃນທາງທີ່ດີ ອີງຕາມພວກນັກວິເຄາະ.
ໃນຂະນະທີ່ສະຫະລັດ ແລະອັງກິດ ກ່າວວ່າ ການເລືອກຕັ້ງເມື່ອໄວໆມານີ້ ທີ່ຕໍ່ເວລາການປົກຄອງ ຂອງຊິກຫາຊີນາອອກໄປຕື່ມ ໃນປະເທດເອເຊຍໃຕ້ດັ່ງກ່າວ ແມ່ນບໍ່ເປັນທີ່ໜ້າເຊື່ອຖື ມີເສລີ ແລະຄວາມເປັນທຳນັ້ນ ແຕ່ນິວເດລີພິຈາລະນາວ່າ ທ່ານນາງເປັນພັນທະມິດທີ່ໃກ້ຊິດ ຢູ່ໃນປະເທດເພື່ອນບ້ານ ບ່ອນທີ່ກອງທັບຂອງຕົນພວມປະເຊີນໜ້າກັບທັງປາກິສຖານ ແລະຈີນ ຢູ່ຕາມເຂດຊາຍແດນທີ່ມີການຂັດແຍ້ງກັນ.
ນັ້ນຄືເຫດຜົນທີ່ວ່າ ເປັນຫຍັງລັດຖະບານທີ່ເປັນມິດໃນບັງກລາແດັສ ຊຶ່ງອິນເດຍມີຊາຍແດນຮ່ວມກັນທີ່ຍາວຢຽດ ຈຶ່ງມີຄວາມສຳຄັນຕໍ່ຄວາມໝັ້ນຄົງຂອງອິນເດຍ ອີງຕາມທ່ານ ຮາສ ແພນທ໌ (Hash Pant) ຮອງປະທານ ການສຶກສາແລະນະໂຍບາຍການຕ່າງປະເທດ ທີ່ມູນນິທິສັງເກດການ ດ້ານການຄົ້ນຄວ້າ ທີ່ນະຄອນຫຼວງນິວເດລີ.
“ອິນເດຍປະເຊີນໜ້າກັບຄວາມວຸ້ນວາຍ ໃນຄວາມສຳພັນລະຫວ່າງດາກາ-ເດລີກ່ອນທີ່ທ່ານນາງຮາຊີນາ ຂຶ້ນກຳອຳນາດ ແຕ່ຫຼັງຈາກທ່ານນາງ ເຂົ້າກຳອຳນາດໃນປີ 2009 ທ່ານນາງແມ່ນກາຍເປັນ ພັນທະມິດທີ່ໝັ້ນຄົງ” ທ່ານແພນທ໌ ກ່າວ. “ເມື່ອເວົ້າເຖິງປະເທດເພື່ອນບ້ານທີ່ທ້າທາຍ ທີ່ອິນເດຍອາໄສຢູ່ ບ່ອນທີ່ກຳລັງປະເຊີນໜ້າກັບກະແສລົມຕ້ານຢ່າງແຮງ ເຊັ່ນຈີນພວມເພີ້ມການມີໜ້າ ມັນເປັນຈຶ່ງເປັນເລື້ອງທຳມະດາສຳລັບອິນເດຍ ຈຶ່ງຕ້ອງການຢາກໃຫ້ທ່ານນາງ ກຳອຳນາດຕໍ່ໄປ.”
ນາຍົກລັດຖະມົນຕີອິນເດຍ ທ່ານນາເຣັນດຣາ ໂມດີ ແມ່ນຮວມຢູ່ໃນບັນດາຜູ້ນຳຈຸທຳອິດ ທີ່ໄດ້ສະແດງຄວາມຊື່ນຊົມຍິນດີ ກັບທ່ານນາງຊິກ ຮາຊີນາ ຫຼັງຈາກທີ່ທ່ານນາງໄດ້ເຂົ້າກຳອຳນາດເປັນສະໄໝທີ 4 ລຽນຕິດ.