ອົງການອະນາໄມໂລກລາຍງານໃນວັນຈັນວານນີ້ວ່າ ມີຄວາມຄືບໜ້າໃນຄວາມພະຍາຍາມເພື່ອປ້ອງກັນ ແລະ ຕອບໂຕ້ຕໍ່ກໍລະນີການປະພຶດທີ່ຜິດທາງເພດ ແຕ່ຍອມຮັບວ່າ ການລ່ວງລະເມີດຂອງພະນັກງານຂອງ WHO ຍັງຄົງເປັນບັນຫາຢູ່.
“ໃນໄລຍະສອງປີທີ່ຜ່ານມາ, WHO ໄດ້ເພີ່ມທະວີຄວາມເຂັ້ມງວດໃນການປະຕິບັດງານຂອງພວກເຮົາ ໃນການປ້ອງກັນ ແລະຕອບໂຕ້ຕໍ່ການປະພຶດຜິດທາງເພດ, ການສະແຫວງຫາຜົນປະໂຫຍດທາງເພດ, ການລ່ວງລະເມີດທາງເພດ ໃນທຸກຮູບແບບ”, ທ່ານນາງກາຢາ ແກມຮິວເກ (Gaya Gamhewage), ຜູ້ອຳນວຍການຝ່າຍປ້ອງກັນ ແລະຕອບໂຕ້ຕໍ່ການປະພຶດຜິດທາງເພດຂອງ WHO ກ່າວ.
"ຢ່າງໃດກໍ່ຕາມ, ຕົວເລກຍັງຄົງເພີ່ມຂຶ້ນດ້ວຍເຫດຜົນງ່າຍໆ, ຂ້າພະເຈົ້າເຊື່ອວ່າຄະດີທັງຫມົດຍັງບໍ່ທັນໄດ້ປະກົດຂຶ້ນເທື່ອ. ດັ່ງນັ້ນ, ຕົວເລກກໍຈະສືບຕໍ່ເພີ່ມຂຶ້ນເລື້ອຍໆ ເປັນໄລຍະ. ແຕ່ນີ້ບໍ່ໄດ້ຫມາຍຄວາມວ່າ ສິ່ງທີ່ພວກເຮົາກໍາລັງດຳເນີນການຢູ່ ບໍ່ມີຜົນຫຍັງ. ໃນຄວາມເປັນຈິງ, ສິ່ງທີ່ພວກເຮົາກຳລັງເຮັດຢູ່ກໍ່ຄືການແກ້ໄຂບັນຫານີ້ເຊັ່ນກັນ,” ທ່ານນາງກ່າວ.
ຕົວເລກເບິ່ງຄືວ່າ ຈະຢືນຢັນຕໍ່ເລື່ອງນີ້. ໃນໄລຍະ 12 ເດືອນຜ່ານມາ, ຫ້ອງການກວດກາພາຍໃນຂອງສະຫະປະຊາຊາດ ຫຼື IOS, ລາຍງານວ່າ ໄດ້ສອບສວນ 287 ຂໍ້ກ່າວຫາ ກ່ຽວກັບການປະພຶດຜິດທາງເພດໃນທຸກຂົງເຂດຂອງອົງການອະນາໄມໂລກ.
