ບັນດາເຈົ້າໜ້າທີ່ ສາທາລະນະສຸກ ບຣາຊິລ ກ່າວວ່າ ເຂົາເຈົ້າ
ໄດ້ພົບເຫັນໂຕຢ່າງຂອງເຊື້ອໄວຣັສ Zika ຢູ່ນຳນໍ້າລາຍ ແລະ
ປັດສະວະ.
ໃນການຖະແຫຼງທີ່ກອງປະຊຸມສຳພາດຂ່າວໃນວັນສຸກວານນີ້
ປະທານ ມູນນິທິ Oswaldo Cruz ຫຼື Fiocruz ທ່ານ Paulo
Gadelha ກ່າວວ່າ ການຈູບກັນແມ່ນ “ເພີ້ມຄວາມສ່ຽງ” ຕໍ່ການ
ຕິດແປດເຊື້ອໄວ ຣັສນີ້. ທ່ານໄດ້ຮຽກຮ້ອງ ເຖິງຢ່າງໃດກໍດີກໍບໍ່
ຄວນທີ່ຈະມີນະໂຍບາຍ “ຕໍ່ຕ້ານບໍ່ໃຫ້ຈູບກັນ.”
ບັນດານັກວິທະຍາສາດ ທີ່ສະຖາບັນຄົ້ນຄວ້າພະຍາດເຂດຮ້ອນ Fio-cruz ກ່າວວ່າ ເຂົາເຈົ້າພະຍາຍາມ ທີ່ຈະລົງຄວາມເຫັນວ່າ ນໍ້າຢູ່ໃນ ຮ່າງກາຍຂອງເຮົາສາມາດແຜ່ຂະຫຍາຍເຊື້ອໄວຣັສ Zika ໄປຫາຄົນອື່ນໆໄດ້ຫລືບໍ່.
ບຣາຊິລ ໄດ້ກ້າວເຂົ້າສູ່ລະດູການສະຫຼອງບຸນ Carnival ປະຈຳປີທີ່ເຕັມໄປດ້ວຍການດື່ມເຫລົ້າ ໃນວັນສຸກມື້ນີ້ ຊຶ່ງເປັນເວລາທີ່ຜູ້ຄົນ ມັກຈູບຄົນທີ່ບໍ່ລຶ້ງໜ້າ ທີ່ເຂົາເຈົ້າພົບເຫັນຢູ່ຕາມຖະໜົນໃຫຍ່ບ່ອນມີການຊຸມແຊວກັນ.
ໃນຂະນະດຽວກັນ ອົງການອະນາໄມໂລກ ຫລື WHO ກຳລັງເຕືອນບັນດາເຈົ້າໜ້າທີ່ ບໍ່ໃຫ້ຮັບເອົາການບໍລິຈາກເລືອດ ຈາກຄົນຜູ້ທີ່ຫາກໍ່ກັບມາຈາກບັນດາປະເທດ ທີ່ຕິດແປດກັບເຊື້ອໄວຣັສ Zika.
ເຊື້ອໄວຣັສທີ່ແຜ່ຜາຍດ້ວຍຍຸງດັ່ງກ່າວນີ້ ສ່ວນໃຫຍ່ແລ້ວມີຢູ່ທົ່ວລາຕິນອາເມຣິກາໂດຍສະເພາະບຣາຊິລ ແລະເຮັດໃຫ້ເປັນອັນຕະລາຍທີ່ໃຫຍ່ ຫລວງແກ່ບັນດາແມ່ຍິງຖືພາ.
