ໃນຂະນະທີ່ວໍຊິງຕັນ ແລະເຕຫະຣ່ານໄດ້ດຳເນີນການແລກປ່ຽນນັກໂທດໃນວັນຈັນ, ລາຍລະອຽດໃຫມ່ ໄດ້ປາກົດອອກມາ ກ່ຽວກັບສະຖານະພາບຂອງຊາວອີຣ່ານ ສາມ ໃນຫ້າຄົນ ທີ່ໄດ້ຮັບການຜ່ອນຜັນຈາກວໍຊິງຕັນ ແລະຍັງຄົງຢູ່ໃນດິນແດນຂອງສະຫະລັດ ໃນຂະນະທີ່ການສົ່ງນັກໂທດກຳລັງດໍາເນີນຢູ່.
ວີໂອເອໄດ້ຮັບຂ່າວວ່າ ຊາວອີຣ່ານສາມຄົນທີ່ຍັງເຫຼືອຢູ່ໃນສະຫະລັດ, ເຊິ່ງເວັບໄຊທ໌ຂອງກະຊວງຍຸຕິທໍາສະຫະລັດ ໄດ້ສະແດງໃຫ້ເຫັນວ່າ ກາມບິຊ ອາດຕາ ກາຊີນີ (Kambiz Attar Kashani) ຍັງຖືກກັກຂັງຢູ່ໃນຄຸກ ຂອງລັດຖະບານກາງໃນລັດມິຊິແກນ; ບັນທຶກຂອງສານສະແດງໃຫ້ເຫັນວ່າອາມິນ ຮາຊັນຊາເດ (Amin Hasanzadeh) ໄດ້ສູນເສຍທີ່ຢູ່ອາໄສຖາວອນ ໃນສະຫະລັດໃນວັນທີ 23 ສິງຫາ; ແລະ ກາເວ ລອດໂຟລາ ອາຟ-ຣາເຊຍບີ (Kaveh Lotfolah Afrasiabi) ໄດ້ຮັບການໃຫ້ອະໄພໂທດ ໃນຂະນະທີ່ລໍຖ້າການພິຈາລະນາຄະດີໃນຂໍ້ກ່າວຫາຂອງລັດຖະບານກາງ.
ຫ້ອງການສຳນັກງານນັກໂທດໄດ້ສະແດງໃຫ້ເຫັນວ່າ ກາຊີນີ (Kashani), ເຊິ່ງເປັນພົນລະເມືອງສອງສັນຊາດ ສະຫະລັດ - ອີຣ່ານ, ຍັງຖືກກັກຂັງ ຢູ່ທີ່ສະຖາບັນການປັບປຸງຕົວ ຂອງລັດຖະບານກາງໃນ ເມືອງ ມີລານ (Milan), ລັດມິຊິແກນ, ໃນວັນຈັນ. ລາວໄດ້ຖືກຕັດສິນລົງໂທດ ໃນເດືອນກຸມພາໃຫ້ຕິດຄຸກ 30 ເດືອນ ໃນຂໍ້ຫາສົມຮູ້ຮ່ວມຄິດໃນລະເມີດກົດໝາຍ ວ່າດ້ວຍອຳນາດເສດຖະກິດສຸກເສີນສາກົນ ແລະ ມີກຳນົດຖືກປ່ອຍຕົວໃນເດືອນກຸມພາ.
ເອກະສານຂອງສານທີ່ວີໂອເອ ໄດ້ເຫັນ ສະແດງໃຫ້ເຫັນວ່າ ຮາຊັນຊາເດ (Hasanzadeh), ເຊິ່ງຖືກປ່ອຍໂຕພາຍໃຕ້ການຄວບຄຸມຢູ່ພາຍໃນບ້ານຂອງລາວເພື່ອລໍຖ້າການດຳເນີນຄະດີ ໃນຂໍ້ຫາລະເມີດມາດຕະການລົງໂທດ ຂອງສະຫະລັດ, ໄດ້ສູນເສຍສະຖານະຜູ້ຢູ່ອາໄສຖາວອນຂອງລາວ ເມື່ອມັນໝົດອາຍຸໃນວັນທີ 23 ສິງຫາ. ຈົດໝາຍທີ່ຂຽນເຖິງຜູ້ພິພາກສາໃນລັດມິຊິແກນໃນມື້ນັ້ນ ໂດຍທະນາຍຄວາມຂອງ ຮາຊັນຊາເດ (Hasanzadeh) ກ່າວວ່າ ການຫມົດອາຍຸຈະເຮັດໃຫ້ມັນ "ຍາກຂຶ້ນຫຼາຍ" ສໍາລັບລາວທີ່ຈະພິສູດ "ສະຖານະພາບທີ່ຖືກຕ້ອງຕາມກົດຫມາຍເພື່ອຈຸດປະສົງຂອງການໄດ້ຮັບການຈ້າງງານ ແລະຜົນປະໂຫຍດສາທາລະນະບາງຢ່າງ." ຈົດໝາຍດັ່ງກ່າວຍັງກ່າວວ່າ ມັນຈະເປັນໄປບໍ່ໄດ້ສຳລັບລາວ ທີ່ຈະກັບຄືນມາສະຫະລັດ ຖ້າລາວເດີນທາງໄປຕ່າງປະເທດ.
ນຶ່ງໃນທະນາຍຄວາມແມ່ນ ທ່ານ ເບັນຕັນ ມາຕິນ (Benton Martin) ໄດ້ປະຕິເສດທີ່ຈະໃຫ້ຄວາມເຫັນ ເມື່ອ ວີໂອເອ ໄດ້ຕິດຕໍ່ຫາທ່ານ ໃນວັນຈັນນີ້ ເພື່ອສອບຖາມກ່ຽວກັບສະຖານະພາບຂອງ ຮາຊັນຊາເດ (Hasanzadeh).
ໃນການຍື່ນຟ້ອງໃນວັນຈັນວານນີ້ ທີ່ວີໂອເອ ໄດ້ເຫັນ, ທະນາຍຄວາມຂອງ ອາ ຟຣາເຊຍບີ (Afrasiabi) ທ່ານນາງຊາບຣີນາ ຊຣັອຟ (Sabrina Shroff) ໄດ້ຂໍໃຫ້ຜູ້ພິພາກສາຍົກເລີກວັນພິຈາລະນາຄະດີໃນເດືອນມັງກອນ ເນື່ອງຈາກຄະດີອາຍາຂອງລາວໄດ້ຖືກ “ແກ້ໄຂ (ໂດຍ) ການດຳເນີນການ ຂອງຝ່າຍບໍລິຫານ” ລັດຖະບານສະຫະລັດ. ນາງຍັງໄດ້ຮ້ອງຂໍໃຫ້ປ່ອຍໂຕ ອາຟ-ຣາເຊຍບີ ຈາກການຄວບຄຸມການປະພຶດຂອງລາວກ່ອນການພິຈາລະນາຄະດີ ແລະໃຫ້ສົ່ງເງິນຄ່າປະກັນຕົວຂອງລາວ ຄືນໃຫ້ລາວ.