ລິ້ງ ສຳຫລັບເຂົ້າຫາ

ວັນເສົາ, ໑໓ ເມສາ ໒໐໒໔

ທຳ​ນຽບ​ຂາວ​ ກ່າວ​ວ່າ ສະ​ຫະ​ລັດ​ຈະ​ຮັບ​ເອົາ​ ອົບ​ພະ​ຍົບ​ ຢູ​ເຄ​ຣນ ນຶ່ງ​ແສນ​ຄົນ


ອົບພະຍົບພັກຜ່ອນຢູ່ສະຖານີລົດໄຟໃຕ້ດິນ ຫຼັງຈາກໄດ້ຫຼົບໜີອອກຈາກ ຢູເຄຣນ, ນະຄອນຫຼວງ ເບີລິນ, ປະເທດ ເຢຍຣະມັນ. 14 ມີນາ, 2022.
ອົບພະຍົບພັກຜ່ອນຢູ່ສະຖານີລົດໄຟໃຕ້ດິນ ຫຼັງຈາກໄດ້ຫຼົບໜີອອກຈາກ ຢູເຄຣນ, ນະຄອນຫຼວງ ເບີລິນ, ປະເທດ ເຢຍຣະມັນ. 14 ມີນາ, 2022.

ທຳນຽບຂາວໄດ້ປະກາດແຜນການຂອງ ສະຫະລັດ ໃນວັນພະຫັດວານນີ້ສຳລັບການຕ້ອນຮັບເອົາຊາວ ຢູເຄຣນ ຫຼາຍເຖິງ 100,000 ຄົນ ແລະ ຄົນອື່ນໆທີ່ຫຼົບໜີຈາກການບຸກລຸກປະເທດໃນ ຢູໂຣບ ຕາເວັນອອກດັ່ງ​ກ່າວໂດຍ ຣັດເຊຍ.

ໃນຖະແຫຼງການສະບັບນຶ່ງຢູ່ເວັບໄຊ້ຂອງເຂົາເຈົ້ານັ້ນ, ທຳນຽບຂາວໄດ້ກ່າວວ່າແຜນການດັ່ງກ່າວແມ່ນສ່ວນນຶ່ງຂອງກົດໝາຍການຊ່ວຍເຫຼືອດ້ານມະນຸດສະທຳທີ່ມີມູນຄ່າ 1 ຕື້ໂດລາ ເພື່ອຊ່ວຍ ເຫຼືອຜູ້ທີ່ຖືກກະທົບໂດຍ “ສົງຄາມຂອງ ຣັດເຊຍ ໃນ ຢູເຄຣນ.”

ທຳນຽບຂາວ ໄດ້ກ່າວວ່າໃນຂະນະທີ່ເຂົາເຈົ້າຄາດວ່າຊາວ ຢູເຄຣນ ສ່ວນໃຫຍ່ຈະເລືອກຢູ່ໃນ ຢູໂຣບ ໃກ້ຊິດກັບຄອບຄົວ ແລະ ບ້ານເຮືອນຂອງເຂົາເຈົ້ານັ້ນ, ອົບພະຍົບດັ່ງກ່າວຈະຖືກຕ້ອນຮັບຜ່ານໂຄງການຮັບເອົາອົບພະຍົບ ສະຫະລັດ ແລະ ທາງຜ່ານທີ່ຖືກຕ້ອງການກົດໝາຍອື່ນໆຕາມປົກກະຕິ. ຖະແຫຼງການນັ້ນເວົ້າວ່າ ເຂົາເຈົ້າຍັງພະຍາຍາມທີ່ຈະຂະຫຍາຍ ແລະ ພັດທະນາໂຄງ ການທີ່ເພັ່ງເລັງໃສ່ຊາວ ຢູເຄຣນ ຜູ້ທີ່ມີສະມາຊິກຄອບຄົວໃນ ສະຫະລັດ.

ບັນດາຜູ້ສະໜັບສະໜູນອົບພະຍົບ ໄດ້ສະແດງຄວາມຍິນດີກັບການປະກາດດັ່ງ ກ່າວ ແຕ່ໄດ້ມີຄວາມສົງໄສໃນຄວາມສາມາດຂອງລັດຖະບານທີ່ຈະດຳເນີນການເຄື່ອນຍ້າຍອົບພະຍົບໄວກວ່າລະດັບຂອງເຂົາເຈົ້າໃນປັດຈຸບັນ.

ທ່ານ ຊູນິລ ວາກີສ, ຜູ້ອຳນວຍການນະໂຍບາຍຢູ່ໂຄງການຊ່ວຍເຫຼືອອົບພະຍົບສາກົນ (IRIP) ກ່າວວ່າ ໃນຖະແຫຼງການນັ້ນລັດຖະບານທ່ານ ໄບເດັນ ແມ່ນໄດ້ເຮັດຖືກຕ້ອງທີ່ຈະຕອບສະໜອງຕໍ່ວິກິດການໃນ ຢູເຄຣນ ດ້ວຍ “ຄວາມເຫັນອົກເຫັນໃຈ” ແລະ “ການກະທຳທີ່ກ້າຫານ,” ແລະ ບັນດາຜູ້ສະໜັບສະໜູນຈະລໍຖ້າຂໍ້ມູນເພີ່ມເຕີມ ກ່ຽວກັບ ໂຄງການດັ່ງກ່າວ.

ທ່ານໄດ້ຂຽນວ່າ “ແຕ່ບໍ່ເປັນຈັ່ງໂຊກ, ການຕັ້ງຖິ່ນຖານໃໝ່ຂອງອົບພະຍົບຍັງສືບຕໍ່ຢູ່ໃນລະດັບທີ່ຊ້າຫຼາຍ, ແລະ ການລົງທຶນຢ່າງຫຼວງຫຼາຍ ແລະ ການປັບ ປຸງໃໝ່ແມ່ນມີຄວາມຕ້ອງການ ເພື່ອຮັບປະກັນວ່າຈຸດປະສົງຂອງລັດຖະບານທ່ານ ໄບເດັນ ຈະສາມາດເຮັດໃຫ້ກາຍເປັນຈິງ. ພວກເຮົາຫວັງວ່າຈະໄດ້ຮັບລາຍລະອຽດເພີ່ມເຕີມ ກ່ຽວກັບ ໂຄງການນັ້ນເພື່ອປົກປ້ອງຊາວ ຢູເຄຣນ ທີ່ມີຄວາມສ່ຽງ ແລະ ສະໜັບສະໜູນໃຫ້ລັດຖະບານອອກແຜນການທີ່ຈະແຈ້ງເພື່ອບັນລຸຄຳສັນຍາຂອງເຂົາເຈົ້າທີ່ຈະສ້າງໂຄງການຮັບເອົາອົບພະຍົບໂດຍລວມ.”

ໂຄງການຮັບເອົາອົບພະຍົບຂອງ ສະຫະລັດ ໄດ້ຖືກຕັດລົງຢ່າງຫຼວງຫຼາຍພາຍໃຕ້ລັດຖະບານທີ່ຜ່ານມາຂອງທ່ານ ທຣຳ, ເຮັດໃຫ້ມີແຫຼ່ງຊັບພະຍາກອນ ພຽງ ໜ້ອຍດຽວຢູ່ພາຍໃນລັດຖະບານ ແລະ ບັນດາອົງການຕັ້ງຖິ່ນຖານໃໝ່ ເພື່ອຮັບມືກັບການເພີ່ມຂຶ້ນຢ່າງຫຼວງຫຼາຍຂອງໃບຄຳຮ້ອງອົບພະຍົບ ແລະການເດີນທາງ ມາຮອດ.

ອ່ານຂ່າວນີ້ເປັນພາສາອັງກິດ

XS
SM
MD
LG