ບັນດາພັນທະມິດໃນ ຢູໂຣບ ແມ່ນກຳລັງໂຕ້ຖຽງກັນວ່າ ໄຊຊະນະຂອງທ່ານ ດໍໂນລ ທຣຳ ໃນການເລືອກຕັ້ງປະທານານທິບໍດີ ສະຫະລັດ ອາດມີຄວາມ ໝາຍແນວໃດສຳລັບຄວາມໝັ້ນຄົງ ແລະ ເສດຖະກິດ. ການດຳລົງຕຳແໜ່ງສະ ໄໝທຳອິດຂອງທ່ານ ທຣຳ ແມ່ນເຕັມໄປດ້ວຍຄວາມສຳພັນທີ່ວຸ້ນວາຍກັບພັນ ທະມິດໃນສະຫະພາບຢູໂຣບ ແລະ ອົງການ ເນໂຕ້, ຕາມລາຍງານຂອງ ນັກຂ່າວວີໂອເອ ທ່ານ ເຮັນຣີ ຣິດຈແວລ໌ ການຮຸກຮານຂອງ ຣັດເຊຍ ໄດ້ເຮັດ ໃຫ້ ຢູໂຣລ ມີຄວາມກັງວົນຕໍ່ພັນທະມິດຂ້າມມະຫາສະໝຸດ ແອັດແລນຕິກ ຫຼາຍຂຶ້ນ. ພວກເຮົາມີລາຍລະອຽດມາສະເໜີທ່ານໃນອັນດັບຕໍ່ໄປ.
ບັນດາຜູ້ນຳປະມານ 50 ຄົນໄດ້ປະຊຸມກັນໃນນະຄອນຫຼວງ ບູດາເປັສ ຂອງ ຮັງກາຣີ ໃນວັນພະຫັດວານນີ້ ສຳລັບກອງປະຊຸມສຸດຍອດຂອງປະຊາຄົມ ການເມືອງ ຢູໂຣບ, ທີ່ຖືກຈັດຂຶ້ນຍ້ອນການບຸກລຸກ ຢູເຄຣນ ໂດຍ ຣັດເຊຍ.
ປະທານາທິບໍດີ ຝຣັ່ງ ທ່ານ ເອັມມານູແອລ ມາກຣົງ ໄດ້ກ່າວວ່າ ຢູໂຣບ ຕ້ອງລຸກຂຶ້ນສູ້ເພື່ອຕົນເອງ ໃນຂະນະທີ່ເຂົາເຈົ້າກະກຽມສຳລັບການເປັນ ທານາທິບໍດີ ສະຫະລັດ ຄົນຕໍ່ໄປຂອງທ່ານ ທຣຳ.
ທ່ານ ເອັມມານູແອລ ມາກຣົງ ປະທານາທິບໍດີ ຝຣັ່ງ ກ່າວວ່າ “ຜົນກະທົບອັນທໍາອິດສໍາລັບພັນທະມິດກໍຄື ຈະສະໜັບສະໜູນ ຢູເຄຣນ ຕໍ່ໄປຈັ່ງໃດ ຖ້າຫາກວ່າການຊ່ວຍເຫຼືອທາງທະຫານຈາກ ສະຫະລັດ ຫຼຸດລົງ.
ຢູໂຣບ ຈະສາມາດຊົດເຊີຍຄວາມຂາດແຄນນັ້ນໄດ້ບໍ່?
ທ່ານ ອຽນ ບອນດ໌, ຈາກສູນກາງເພື່ອການປະຕິຮູບ ຢູໂຣບ ກ່າວວ່າ “ໄດ້, ແຕ່ມັນຈະໃຊ້ຄວາມພະຍາຍາມຫຼາຍກວ່າທີ່ ຢູໂຣບ ກຳລັງເຮັດດຽວນີ້.”
ໃນການໂຄສະນາຫາສຽງ, ທ່ານ ທຣຳ ໄດ້ກ່າວວ່າທ່ານຈະຢຸດສົງຄາມ ລະຫວ່າງ ຣັດເຊຍ ແລະ ຢູເຄຣນ ພາຍໃນນຶ່ງວັນ, ແນວໃດກໍຕາມ ທ່ານບໍ່ ໄດ້ເວົ້າວ່າດ້ວຍວິທີໃດ. ບັນດານັກວິເຄາະກ່າວວ່າ ຢູເຄຣນ ຢ້ານວ່າຈະຖືກ ບັງຄັບໃຫ້ເຮັດຂໍ້ຕົກລົງສັນຕິພາບທີ່ເຂົາເຈົ້າບໍ່ມັກ.
ທ່ານ ເອັດ ອາໂນລ, ຈາກສະຖາບັນ Royal United Services ກ່າວວ່າ “ແທ້ຈິງແລ້ວ, ມັນອາດມີຄວາມເປັນຫ່ວງໜ້ອຍນຶ່ງ ເຊິ່ງມັນມີບາງຄົນຢູ່ໃນ ຢູໂຣບ ຜູ້ທີ່ເວົ້າວ່າ, ເປັນຫຍັງຈຶ່ງເລັ່ງເພີ່ມການຊ່ວຍເຫຼືອໃນເວລານີ້ ຖ້າມັນ ຈະມີການເຈລະຈາແກ້ໄຂບັນຫາໃນໄວໆນີ້?”
ອະດີດເຈົ້າໜ້າທີ່ລັດຖະບານ ສະຫະລັດ ເວົ້າວ່າ ທ່ານ ທຣຳ ອາດຖອນ ສະຫະລັດ ອອກຈາກອົງການ ເນໂຕ ໃນສະໄໝທຳອິດຂອງທ່ານ.
ທ່ານ ໂຈນາທານ ມອນເທັນ, ຈາກມະຫາວະທະຍາໄລ ວິທະຍາໄລ ລອນດອນ ກ່າວວ່າ “ຂ້າພະເຈົ້າຄິດວ່າລາວມັກຄວາມຄິດທີ່ວ່າ ລາວຈະເຮັດ ໃຫ້ບັນດາພັນທະມິດຕ່າງປະເທດ ພ້ອມກັບສັດຕູເດົາເຈດຈຳນົງໃນທີ່ສຸດ ຂອງທ່ານ. ຂ້າພະເຈົ້າຄິດວ່າລາວເຫັນມັນດັ່ງກັບແຫຼ່ງທີ່ມາຂອງອິດທິພົນ, ດັ່ງກັບແຫຼ່ງຂອງອຳນາດ.”
ແຕ່ເລຂາທິການໃຫຍ່ອົງການ ເນໂຕ ທ່ານ ມາກ ຣັດ ກໍໄດ້ເຂົ້າຮ່ວມກອງ ປະຊຸມສຸດຍອດ ບູດາເປັສ ເຊັ່ນກັນ, ທ່ານໄດ້ຍົກຍ້ອງ ທ່ານ ທຣຳ ສຳລັບ ການເຮັດໃຫ້ບັນດາພັນທະມິດໃຊ້ເງິນຫຼາຍຂຶ້ນສຳລັບການປ້ອງກັນປະເທດ.
ທ່ານ ມາກ ຣັດ ເລຂາທິການໃຫຍ່ອົງການ ເນໂຕ້ ກ່າວວ່າ “ເວລາທ່ານເປັນປະທານາທິບໍດີ, ທ່ານແມ່ນຜູ້ນຶ່ງໃນອົງການ ເນໂຕ ຜູ້ທີ່ໄດ້ ກະຕຸ້ນພວກເຮົາໃຫ້ທຳການເຄື່ອນໄຫວ ກ່ຽວກັບ ເປົ້າໝາຍການໃຊ້ຈ່າຍຈາກ GDP 2 ເປີເຊັນ.”
ບັນດາພັນທະມິດ ສະຫະລັດ ຍັງປະເຊີນກັບຄວາມວຸ້ນວາຍທາງເສດຖະກິດ ເວລາທີ່ທ່ານ ທຣຳ ເຂົ້າໄປຢູ່ໃນທຳນຽບຂາວ.
ທ່ານ ກາເຣັດ ມາຕິນ, ຈາກມະຫາວິທະຍາໄລ ອາເມຣິກັນ ກ່າວວ່າ “ຖະແຫຼງການ ທຣໍາ ຫຼື ການກ່າວ ກ່ຽວກັບ ການກໍານົດປະມານ 60 ເປີເຊັນ ຫຼື ເກັບພາສີເພີ່ມເຕີມໃສ່ການນຳເຂົ້າທຸກຢ່າງຈາກ ຈີນ ຈະມີຜົນກະທົບທີ່ຮ້າຍ ແຮງຕໍ່ການຄ້າໂລກ, ແລະ ມັນຈະມີຜົນກະທົບຕໍ່ ສະຫະພາບ ຢູໂຣບ, ຕໍ່ ຢູໂຣບ, ຕໍ່ສະຫະຣາຊະອານາຈັກ ອັງກິດ ແລະ ບ່ອນອື່ນໆ. ແລະ ພວກເຮົາ ຄາດວ່າຈະມີການເກັບພາສີຕໍ່ການນຳເຂົ້າຈາກ ສະຫະພາບ ຢູໂຣບ ເຊັ່ນກັນ.”
ເມື່ອພິຈາລະນາໂດຍລວມແລ້ວ ໃນ ຢູໂຣບ ມີຄວາມວິຕົກກັງວົນວ່າ ການທີ່ ທ່ານ ດໍໂນລ ທຣຳ ດຳລົງຕຳແໜ່ງປະທານາທິບໍດີສະໄໝທີສອງ ຈະສົ່ງ ຜົນແນວໃດ. ນັກວິເຄາະກ່າວວ່າ ຄວາມບໍ່ແນ່ນອນດັ່ງກ່າວ ເຮັດໃຫ້ຜູ້ນຳໃນ ຢູໂຣບ ບໍ່ສາມາດຕຽມຕົວໄດ້ຫຼາຍປານໃດ.
ຟໍຣັມສະແດງຄວາມຄິດເຫັນ