ການຮຸກຮານອີຣັກ ຂອງສະຫະລັດ ເມື່ອ 13 ປີກ່ອນ ໂດຍກອງກຳລັງປະສົມທີ່ນຳພາໂດຍ
ສະຫະລັດ ແລະອັງກິດ ນັ້ນ ແມ່ນ “ບໍ່ຈຳເປັນ” ແລະຜູ້ນຳຜະເດັດການອີຣັກ Saddam Hussein ໄດ້ສະແດງໃຫ້ເຫັນວ່າ “ບໍ່ໄດ້ເປັນໄພຂົ່ມຂູ່ທີ່ຮີບດ່ວນ” ຕໍ່ອັງກິດ ຫຼືປະເທດມະ ຫາອຳນາດຕາເວັນຕົກອື່ນໆ ອິງຕາມລາຍງານທາງການ ທີ່ມີການລໍຄອຍຖ້າມາເປັນເວລາດົນນານ ກ່ຽວກັບການພົວພັນຂອງອັງກິດ ໃນສົງຄາມອີຣັກ.
ການສືບສວນທີ່ນຳພາໂດຍ ທ່ານ John Chilcot ອະດີດຂ້າຣາຊະການພົນລະເຮືອນຂັ້ນສູງຂອງອັງກິດ ໄດ້ຖິ້ມໂທດໃສ່ພວກນັກການເມືອງ ເຈົ້າໜ້າທີ່ສືບລັບ ພວກນັກການທູດ ແລະບັນດານາຍພົນ ໃນບົດບາດຂອງພວກເຂົາເຈົ້າ ໃນການຮຸກຮານ ແລະໃນການປະຕິ ບັດພາລະກິດທາງດ້ານການທະຫານໃນຮອບຫຼາຍໆປີ ໂດຍກອງກຳລັງອັງອິດ ໂດຍສະເພາະ ຢູ່ໃນພາກໃຕ້ຂອງອີຣັກ.
ໃນການປະເມີນແບບບໍ່ໄວ້ໜ້ານັ້ນ ທ່ານ Chilcot ໄດ້ບອກກອງປະຊຸມຖະແຫຼງຂ່າວ ໃນນະຄອນຫຼວງລອນດອນວ່າ ການວາງແຜນແລະການປະຕິບັດງານທາງທະຫານ ແມ່ນການຜິດພາດແທ້ໆ “ແລະດຳເນີນໄປຢ່າງຜິດໆ ໂດຍມີຜົນທີ່ຕິດຕາມມາຈົນຮອດທຸກມື້ນີ້,” ທ່ານໄດ້ກ່າວອ້າງອີງເຖິງການໂຈມຕີດ້ວຍລະເບີດສະລະຊີບ ໃນນະຄອນຫຼວງ Baghdad ທີ່ຍັງຜົນໃຫ້ມີຫຼາຍກວ່າ 250 ຄົນ ເສຍຊີວິດ.
ທ່ານ Chilcot ໄດ້ກ່າວວ່າ “ພວກເຮົາໄດ້ສະຫຼຸບວ່າອັງກິດ ເລືອກທີ່ຈະເຂົ້າຮ່ວມການຮຸກຮານອີຣັກ ກ່ອນທາງເລືອກແບບສັນຕິ ທີ່ຈະປົດອາວຸດ ໝົດລົງນັ້ນ. ການເອົາບາດກ້າວທາງການທະຫານ ໃນຕອນນັ້ນ ບໍ່ແມ່ນທາງອອກສຸດທ້າຍທີ່ຈະຕ້ອງເລືອກເອົາ.”
ໃນຂະນະທີ່ປະທານການສືບສວນ ໄດ້ອະທິບາຍເຖິງລາຍງານທີ່ກ້ວາງຂວາງນັ້ນ ພວກນັກຂ່າວ ຍັງສືບຕໍ່ເລືອກເບິ່ງຫຼັກຖານແລະສິ່ງທີ່ພົບເຫັນທີ່ບັນຈຸຢູ່ໃນ 13 ຫົວ. ສ່ວນໃຫຍ່ຂອງລາຍງານຂອງທ່ານ Chilot ໄດ້ເພັ່ງເລັງໃສ່ພື້ນຖານດ້ານກົດໝາຍ ແລະການໃຫ້ເຫດຜົນຂອງການສືບລັບກ່ຽວກັບການເຂົ້າຮ່ວມການຮຸກຮານດັ່ງກ່າວ. ລາຍງານຍັງໄດ້ກ່າວເນັ້ນ
ເຖິງການທີ່ໃນຕອນນັ້ນ ນາຍົກລັດຖະມົນຕີອັງກິດ ແມ່ນທ່ານ Tony Blair ບັນດາລັດຖະ ມົນຕີຂອງທ່ານ ແລະໜ່ວຍສືບລັບ ໂດຍກ່າວວ່າ ການໃຫ້ເຫດຜົນຕໍ່ການຮຸກຮານນີ້ ແມ່ນຍັງຫ່າງໄກ ຈາກຄວາມເພິງພໍໃຈ.
