ສິດເສລີພາບໃນດ້ານຂ່າວສານ ໄດ້ຫລຸດຕ່ຳລົງຢູ່ທົ່ວໂລກ ໃນປີແລ້ວນີ້ ຈົນເຖິງຈຸດຕໍ່າ ສຸດ ໃນຮອບນຶ່ງທົດສະວັດກວ່າໆທີ່ຜ່ານມາ ອີງຕາມການສະຫຼຸບຂອງກຸ່ມ ຄຸ້ມຄອງສິດ ເສລີພາບໃນດ້ານນີ້ ທີ່ນະຄອນຫລວງວໍຊິງຕັນ.
ອົງການ Freedom House ທີ່ໃຫ້ການສະໜັບສະໜຸນ ຕໍ່ການຂະຫຍາຍສິດເສລີພາບ ແລະປະຊາທິປະໄຕຢູ່ໃນທົ່ວໂລກນັ້ນກ່າວຢູ່ໃນລາຍງານທີ່ອອກໃນວັນພຸດມື້ນີ້ວ່າ ມີພຽງແຕ່ນຶ່ງໃນທຸກເຈັດຄົນໃດຢູ່ໃນທົ່ວໂລກ ອາໄສຢູ່ໃນບັນດາປະເທດບ່ອນທີ່ລາຍງານຂ່າວ ການເມຶອງເປັນທີ່ເຂັ້ມແຂງ ຄວາມປອດໄພຂອງນັກຂ່າວ ໄດ້ຮັບການຄ້ຳປະກັນ ມີການ ລ່ວງລໍ້າຕໍ່ທຸລະກິດສື່ມວນຊົນພຽງເລັກນ້ອຍຈາກລັດຖະບານແລະສື່ມວນຊົນ “ບໍ່ໄດ້ສ້າງ ຄວາມຍາກລຳບາກທາງດ້ານກົດ ໝາຍຫລືການກົດດັນທາງດ້ານເສດຖະກິດ.”
ທ່ານນາງ Jennifer Dunham ຜູ້ອຳນວຍການຝ່າຍຄົ້ນຄວ້າ ຂອງລາຍງານ ກ່າວຕໍ່ວີ ໂອເອ ວ່າບັນດາຜູ້ປົຄອງຜະເດັດການ ແລະພວກກຸ່ມກໍ່ການຮ້າຍຢູ່ໃນທົ່ວໂລກ ກຳລັງ ທັບມ້າງການລາຍງານ ທີ່ເປັນອິດສະຫຼະ ຂອງພວກນັກຂ່າວ ໃນຂະນະທີ່ມີການຈັບໃສ່ຄຸກ ທຳຮ້າຍ ແລະສັງຫານພວກນັກຂ່າວ ຜູ້ທີ່ກ້າຂຽນຂ່າວ ແລະ ລາຍງານຂ່າວໂທລະ ພາບທີ່ຂັດຕໍ່ຄຳສັ່ງເຈົ້າໜ້າທີ່ລັດຖະບານຫລືເປີດເຜີຍ ການສໍ້ລາດບັງຫຼວງ. ທ່ານນາງກ່າວວ່າ ຢູ່ໃນປະເທດອຶ່ນໆເຊັ່ນຈີນການຈຳກັດການເຂົ້າຫາອິນເຕີແນັດຂອງບາງເວັບໄຊທີ່ອາດເປັນຜົນສະທ້ອນຢ່າງແຮງຕໍ່ລັດຖະບານທີ່ກຳອຳນາດຢູ່ນັ້ນ.
ທ່ານນາງໄດ້ຖິ້ມໂທດ ການຊຸດໂຊມລົງຂອງສິດເສລີພາບດ້ານຂ່າວສານ ຢູ່ໃນທົ່ວໂລກ ໃສ່ “ການກໍ່ຄວາມຮຸນແຮງເພີ້ມຂຶ້ນຕໍ່ບັນດານັກຂ່າວ” ແລະການມີຄວາມລຳອຽງຕື່ມຂຶ້ນໃນການລາຍງານຂ່າວແລະການແຍກອອກເປັນສອງຂົ້ວຂອງອົງການສື່ມວນຊົນຕ່າງໆ ຢູ່ໃນທົ່ວໂລກ ໂດຍທີ່ມີພວກນັກຂ່າວຈຳນວນນຶ່ງ ຖືກບັງຄັບຈາກລັດຖະບານ ແລະ ບັນ ດາກຸ່ມກະບົດເພື່ອໃຫ້ເຂົ້າຂ້າງຕົນ ໃນການປະທະກັນດ້ວຍອາວຸດ ຫລືໂດຍກຸ່ມສື່ມວນ ຊົນທີ່ມີອິດທິພົນເພື່ອປົກປ້ອງຜົນປະໂຫຍດທາງທຸລະກິດຂອງເຂົາເຈົ້າ.
