ປະທານາທິບໍດີສະຫະລັດ ທ່ານບາຣັກ ໂອບາມາ ຈະເປັນເຈົ້າ
ພາບຈັດກອງປະຊຸມສຸດຍອດ ວ່າດ້ວຍຄວາມໝັ້ນຄົງດ້ານນິວ
ເຄລຍຄັ້ງທີສີ່ ແລະກໍເປັນຄັ້ງສຸດທ້າຍທີ່ນະຄອນຫຼວງວໍຊິງຕັນ
ໃນອາທິດນີ້ ໃນຂະນະທີ່ ວັດຖຸນິວເຄລຍຫລາຍໆໂຕນຍັງບໍ່ມີ
ການຄຸ້ມຄອງຮັກສາຢ່າງແໜ້ນໜາພຽງພໍແລະອາດຈະຕົກໄປ
ຢູ່ໃນກຳມືຂອງພວກກໍ່ການຮ້າຍຫຼືສ່ວນບຸກຄົນ ທີ່ມີຈຸດປະສົງ
ຮ້າຍກໍໄດ້.
ທຳນຽບຂາວກ່າວວ່າ ໃນຂະນະທີ່ມັນເປັນໄປບໍ່ໄດ້ ທີ່ຈະຄາດ
ຄະເນກ່ຽວກັບໂອ ກາດໃນການທີ່ຈະມີການໂຈມຕີໂດຍພວກ
ຫົວຮຸນແຮງຈັດ ແຕ່ກໍມີທາດຢູເຣນຽມທີ່ກັ່ນແລ້ວໃນລະດັບສູງ
2,000 ໂຕນ ແລະທາດປລູໂຕນຽມທີ່ແຍກແລ້ວ ຢູ່ນຳໂຄງການຕ່າງໆຂອງພວກພົນລະ
ເຮືອນແລະທະຫານ ໃນທົ່ວໂລກ.
ທ່ານ Ben Rhodes ຮອງທີ່ປຶກສາທາງດ້ານຄວາມໝັ້ນຄົງແຫ່ງຊາດກ່າວວ່າ ພວກເຮົາ
ຮູ້ວ່າ ອົງການກໍ່ການຮ້າຍຕ່າງໆມີຄວາມປະສົງ ທີ່ຈະເຂົ້າເຖິງວັດຖຸດິບເຫຼົ່ານີ້ແລະຄວາມ
ປະສົງຂອງພວກເຂົາກໍແມ່ນເພື່ອເຮັດອຸບປະກອນນິວເຄລຍ. ທ່ານ Rhodes ກ່າວຕື່ມວ່າ ພວກເຮົາມີຄວາມຈຳເປັນ ທີ່ຈະຕ້ອງໄດ້ເພີ້ມການຮ່ວມມືທາງດ້ານນິວເຄລຍລະຫວ່າງປະ
ເທດຂຶ້ນເປັນສອງເທົ່າ.
ນີ້ແມ່ນເທື່ອທຳອິດທີ່ກອງປະຊຸມສຸດຍອດຈະຈັດປະຊຸມນັດພິເສດຂຶ້ນເພື່ອຫາທາງຄ້ຳປະ
ກັນວ່າເຮັດແນວໃດກຸ່ມຕ່າງໆເຊັ່ນກຸ່ມລັດອິສລາມຈຶ່ງຈະບໍ່ສາມາດໄດ້ຮັບວັດຖຸນິວເຄລຍ.
ກອງປະຊຸມສຸດຍອດວ່າດ້ວຍຄວາມໝັ້ນຄົງນິວເຄລຍ ຊຶ່ງມີຂຶ້ນໃນທຸກໆສອງປີເລີ້ມຂຶ້ນໃນ
ວັນພະຫັດມື້ນີ້ ແລະວັນສຸກມື້ອື່ນ ຈະມີຄະນະຜູ້ຕາງໜ້າ ຈາກ 50 ກວ່າປະເທດ ເຂົ້າຮ່ວມ
ຊຶ່ງຈະມີການປຶກສາຫາລືກັນ ກ່ຽວກັບໄພຂົ່ມຂູ່ຈາກນິວເຄລຍ ແລະວິທີປ້ອງກັນ ໄພຂົ່ມຂູ່ເຫຼົ່ານີ້.
