ທ່ານເຫວິ້ນເຈຍບາວ ນາຍົກລັດຖະມຸນຕີຈີນ ກ່າວວ່າ ມີຄວາມຕ້ອງການຢ່າງຮີບດ່ວນເພື່ອຫລີກລ້ຽງ
ບັນຫາຂັດແຍ້ງກັນລະຫວ່າງສອງເກົາຫລີຫລັງຈາກເຮືອລົບຂອງເກົາຫລີໃຕ້ລຳນຶ່ງຈົມລົງນ້ຳແລ້ວ.
ແຕ່ທ່ານເຫວິ້ນເຈຍບາວ ທ່ີກ່າວຖ້ອຍຖະແຫລງໃນວັນອາທິດມື້ນີ້ ຫລັງຈາກທຳການພົບປະຫາລືຂັ້ນສຸດຍອດ
ກັບທ່ານ ຫລີ ມິອອງພັກ ປະທານາທິບໍດີເກົາຫລີໃຕ້ ແລະນາຍົກລັດຖະມຸນຕີຍີ່ປຸ່ນ ທ່ານຢູກິໂອະ ຮາໂຕຢາມະ
ເປັນເວລາສອງມື້ແລ້ວ ບໍ່ໄດ້ສະແດງຮ່ອງຮອຍໃດໆໃຫ້ເຫັນວ່າ ຈີນຕຽມພ້ອມຈະຮ່ວມກັບພວກຜູ້ນຳທັງສອງ
ຖິ້ມໂທດເລື້ອງໂສກນາຕະກຳເຮືອລົບເກົາຫລີໃຕ້ນີ້ໃສ່ເກົາຫລີເໜືອນັ້ນ.
ຈີນເປັນພັນທະມິດທ່ີສຳຄັນປະເທດດຽວເທົ່ານັ້ນຂອງເກົາຫລີເໜືອ ຊຶ່ງໄດ້ປະຕິເສດຢ່າງໂມໂຫໂທໂສວ່າຕົນບໍ່
ມີສ່ວນພົວພັນໃດໆໃນເຫດການທ່ີເຮືອລົບ Cheonan ຈົມນ້ຳນັ້ນ.
ພວກຜູ້ນຳເຫລົ່ານີ້ໄດ້ເລີ້ມທຳການພົບປະຫາລືກັນມື້ທຳອິດຂອງພວກທ່ານໃນວັນເສົາວານນີ້ ໂດຍໄດ້ພາກັນສະງົບ
ຈິດເປັນເວລາສັ້ນໆເພື່ອລະລຶກເຖິງດວງວິນຍານຂອງພວກທະຫານເຮືອເກົາຫລີໃຕ້ 46 ຄົນທ່ີເສຍຊີວິດໄປໃນເດືອນ
ມິນາຜ່ານມາຈາກການໂຈມຕີດ້ວຍລະເບີດ ຕອກປີໂດໃສ່ເຮືອລົບ Cheonan ຂອງເກົາຫລີໃຕ້ນັ້ນ.
ກ່ອນການພົບປະກັນນັດວັນເສົາວານນີ້ ທ່ານຫລີແລະທ່ານຮາໂຕຢະມະ ໄດ້ຕົກລົງທ່ີຈະຮ່ວມໄມ້ຮ່ວມມື
ກັນໃນການລົງໂທດຕໍ່ເກົາຫລີເໜືອກ່ຽວກັບເລື້ອງເຮືອລົບທ່ີຈົມນ້ຳນີ້.
