ການໂອນອຳນາດ ໃຫ້ແກ່ປະທານາທິບໍດີທີ່ຖືກເລືອກໃໝ່ ທ່ານ Donald Trump ໄດ້ເປັນທີ່ຄອບງໍາ ໃນວັນສຸດຂອງສະພາ ທີ່ເຕັມໄປດ້ວຍວຽກງານຕະຫຼອດອາທິດ ຫລັງຈາກທີ່ໄດ້ກັບຄືນມາລຸນຫລັງວັນເລືອກຕັ້ງ. ໃນຂະນະທີ່ບັນດາ ສະມາຊິກພັກຣີພັບບລິກັນ ກັບຄືນມາພ້ອມກັບສຽງນອງນັນຂອງໄຊຊະນະ ໃນວັນເລືອກຕັ້ງໄດ້ກ່າວປ້ອງກັນການໂອນອຳນາດຂອງປະທານາທິບໍດີທີ່ຖືກເລືອກ ໃໝ່ ໃນຂະນະທີ່ສະມາຊິກພັກເດໂມແຄຣັດໄດ້ຊອກຫາຊ່ອງທາງໄປໜ້າ ຫລັງຈາກໄດ້ເສຍໄຊຄັ້ງປະຫວັດສາດ. Katherine Gypson ນັກຂ່າວວີໂອເອ ມີລາຍງານຈາກລັດຖະສະພາ ຊຶ່ງ ກິ່ງສະຫວັນ ຈະນຳເອົາລາຍລະອຽດ ມາສະ ເໜີທ່ານ.
ຮອງປະທານາທິບໍດີທີ່ຖືກເລືອກໃໝ່ ທ່ານ Mike Pence ຍ່າງເລາະຢູ່ດິນແດນເກົ່າຂອງທ່ານທີ່ຕຶກລັດຖະສະພາ. ອະດີດສະມາຊິກສະພາຕໍ່າຄາດວ່າຈະເປັນກະແຈເຊື່ອມໂຍງທີ່ສຳຄັນ ລະຫວ່າງປະທານາທິບໍດີ Trump ແລະບັນດາສະມາຊິກພັກຣີພັບບລິກັນ ຢູ່ໃນລັດຖະສະພາ ທີ່ໄດ້ກັບຄືນມາໃນອາທິດແລ້ວນີ້.
ທ່ານ Pence ກ່າວວ່າ “ໝັ້ນໃຈທີ່ສຸດ ໝັ້ນໃຈທີ່ສຸດວ່າ ໃນຂະນະທີ່ພວກເຮົາເຄື່ອນໄຫວໄປສູ່ວັນສາບານໂຕເຂົ້າຮັບຕຳແໜ່ງ ແລະປະກອບທີມງາມອັນຍິ່ງໃຫຍ່ຂຶ້ນ. ການເຮັດວຽກທີ່ປະສານງານກັນກັບບັນດາຜູ້ນຳຢູ່ໃນສະພາຕໍ່າແລະສະພາສູງ ພວກເຮົາຈະພາກັນເຄື່ອນໄຫວເພື່ອເສີມສ້າງກອງທັບຂອງພວກເຮົາຄືນໃໝ່ ແລະຟື້ນຟູເສດຖະກິດຂອງພວກເຮົາ ແລະຢູ່ໃນຄຳເວົ້າ ເພື່ອເຮັດໃຫ້ອາເມຣິກາຍິ່ງໃຫຍ່ອີກ.”
ປະທານສະພາຕໍ່າທີ່ຖືກເລືອກໃຫ້ເຂົ້າຮັບຕຳແໜ່ງຄືນອີກ ທ່ານ Paul Ryan ກ່າວວ່າ ລາຍການທີ່ກະຕືລືລົ້ນນັ້ນ ຍັງຢູ່ໃນຂັ້ນເລີ້ມຕົ້ນ.
ທ່ານ Ryan ກ່າວວ່າ “ພວກເຮົາຫາກໍ່ເລີ້ມຕົ້ນຂອງລະຍະການໂອນອຳນາດ ເພາະສະນັ້ນເວລານີ້ພວກເຮົາພຽງແຕ່ເຮັດວຽກກັບລັດຖະບານທີ່ກຳລັງເຂົ້າມາ ເພື່ອວາງແຜນ ການໂອນອຳນາດ.”
ແຕ່ວ່າອາທິດທຳອິດຂອງການໂອນອຳນາດໄດ້ມີການຊັກຊ້າຈາກການຜິດຖຽງກັນພາຍໃນ ການປ່ຽນບຸກຄົນ ແລະການຕ້ອງຕິ ຕໍ່ການແຕ່ງຕັ້ງຂອງທ່ານ Trump.
ທ່ານນາງ Nancy Pelosi ຜູ້ນຳສຽງສ່ວນນ້ອຍໃນສະພາຕ່ຳ ກ່າວວ່າ “ການແຕ່ງຕັ້ງໃຫ້ທ່ານ Steve Bannon ເປັນຫົວໜ້າຍຸດທະສາດຂອງທ່ານນັ້ນ ໄດ້ເປັນສັນຍານທີ່ໜ້າ ຕື່ນຕົກໃຈວ່າ ປະທານາທິບໍດີ Trump ທີ່ຖືກເລືອກຕັ້ງໃໝ່ ຍັງມີຄວາມໝັ້ນໝາຍຕໍ່ວິໄສທັດແຫ່ງການກຽດຊັງ ແລະການແບ່ງແຍກກັນ ຊຶ່ງໄດ້ກຳນົດການໂຄສະນາຫາສຽງຂອງທ່ານນັ້ນ.” ບັນຫານຶ່ງທີ່ທ່ານນາງ Pelosi ມີລາຍງານ ໄດ້ຊຸກຍູ້ກັບທ່ານ Pence ຢູ່ໃນການພົບປະຂອງທ່ານຕໍ່ມາ ແມ່ນຮວມທັງການຫາລືເພື່ອຊອກຫາພື້ນຖານຮ່ວມກັນທີ່ໄດ້ຄອບງໍາເວລາພວກທ່ານ ຢູ່ຕໍ່ໜ້າກ້ອງຖ່າຍຮູບນັ້ນ.
ທ່ານນາງ Pelosi ກ່າວວ່າ “ພວກເຮົາໄດ້ສົນທະນາກັນແບບກົງໄປໂລດກ່ຽວກັບວ່າ ເຮົາສາມາດເຮັດວຽກຮ່ວມກັນໄດ້ຢ່າງໃດ ກ່ຽວກັບເລື້ອງພື້ນຖານໂຄງລ່າງ ບັນຫາທີ່ ພົວພັນ ກັບການເບິ່ງແຍງພວກເດັກນ້ອຍ ແລະອື່ນໆ ພ້ອມທັງ ຕິດຕາມເບິ່ງການຫ້າລື ທີ່ຂ້າພະເຈົ້າໄດ້ມີກັບປະທານາທິບໍດີທີ່ຖືກເລືອກໃໝ່ໃນອາທິດແລ້ວນີ້.”
ແຕ່ວ່າຜູ້ນຳສຽງສ່ວນນ້ອຍໃນສະພາຕໍ່າ ກໍປະເຊີນໜ້າກັບບັນຫາທ້າທາຍ ທີ່ຕຳ ແໜ່ງຜູ້ ນຳຂອງທ່ານນາງຕົກຢູ່ໃນອັນຕະລາຍໃນຂະນະທີ່ພັກເດໂມແຄຣັດຊອກ ຫາຊ່ອງທາງໃໝ່ເພື່ອເຂົ້າໄປເຖິງບັນດາຜູ້ມີສິດປ່ອນບັດ.
ໃນຂະນະທີ່ຮອງປະທານາທິບໍດີທີ່ຖືກເລືອກໃໝ່ ໄດ້ພົບປະກັບບັນດາຜູ້ນຳພັກເດໂມແຄ ຣັດຄົນປັດຈຸບັນຢູ່ໃນລັດຖະສະພາ ຜູ້ຊາຍທີ່ຫລາຍໆຄົນມອງເຫັນວ່າເປັນອະນາຄົດຂອງ ພັກ ໄດ້ເຕົ້າໂຮມບັນດາຜູ້ສະໜັບສະໜູນຢູ່ທາງນອກ ເພື່ອສົນທະນາກ່ຽວກັບຊ່ອງທາງໄປໜ້າ.
ທ່ານ Bernie Sanders ສະມາຊິກສະພາສູງຈາກລັດ Vermont ກ່າວວ່າ “ທ່ານ Donald Trump ໄດ້ຊະນະຍ້ອນເຫດຜົນຫລາຍຢ່າງ ແຕ່ວ່ານຶ່ງເຫດ ຜົນທີ່ທ່ານໄດ້ຊະນະ ຢູ່ໃນສາຍຕາຂອງຂ້າພະເຈົ້ານັ້ນ ແມ່ນເພາະວ່າຄວາມລົ້ມແຫລວຂອງພັກເດໂມແຄຣັດ ທີ່ຈະຕ້ອງໄດ້ປົວແປງ.”
ບັນດາຜູ້ສະໜັບສະໜູນຢູ່່ທີ່ນີ້ຫວັງວ່າ ທ່ານ Sanders ສາມາດຍື່ນມືໄປຫາຊົນຊັ້ນອອກແຮງງານ ທີ່ຢູ່ໃນໜ້າທີ່ການນຳພາສະພາສູງໃໝ່ຂອງທ່ານ.
ທ່ານ John Kim ຜູ້ສະໜັບສະໜູນ ທ່ານ Sanders ກ່າວວ່າ “ຂ້າພະເຈົ້າຄິດວ່່າ ເຮົາສາມາດເຕົ້າໂຮມປະຊາຊົນໄດ້ ພວກຊົນຊັ້ນອອກແຮງງານທີ່ປ່ອນບັດເອົາທ່ານ Donald Trump ຈະປ່ອນບັດເອົາຜູ້ສະໝັກຂອງພັກທີ່ດີກວ່າໃນປີ 2020."
ແລະຮັບໜ້າທີ່ເປັນຜູ້ກວດກາ ໃນໄລຍະສີ່ປີຂ້າງໜ້າ ຂອງລັດຖະບານທ່ານ Trump.
ທ່ານ Bernie ກ່າວວ່າ “ທ່ານ Donald Trump ຈະບໍ່ຢືນຂຶ້ນຕໍ່ສູ້ກັບພວກທີ່ມີການຈັດ ຕັ້ງ ຄືດັ່ງກັບພວກເຮົາ.”
“ສະພາບັດນີ້ໄດ້ພາກັນໄປພັກຜ່ອນເປັນເວລາດົນສີ່ອາທິດ ພ້ອມດ້ວຍຄຳຖາມຕ່າງໆເພີ້ມຂຶ້ນຫລາຍກວ່າຄຳຕອບ ທີ່ສະມາຊິກພັກເດໂມແຄຣັດກຳລັງຊອກຫາຜູ້ນຳ ໃນຂະນະທີ່ສະມາຊິກພັກຣີພັບບລິກັນ ລໍຖ້າການໂອນອຳນາດຂອງທ່ານ Trumpຢູ່ນັ້ນ.”
