ກໍາລັງປ້ອງກັນຄວາມສະຫງົບໃນລາວດຳເນີນມາດຕະການເຂັ້ມງວດໃນການຄວບຄຸມ ແລະຈໍາກັດການເຄື່ອນໄຫວຂອງຜູ້ນຳ ແລະປະຊາຊົນທີ່ເຊື່ອຖື ໃນສາສະໜາທີ່ມີຄຳສອນບໍ່ສອດຄ່ອງກັບແນວທາງຂອງພັກ, ຊົງຣິດ ໂພນເງິນມີລາຍງານເລື້ອງນີ້ ມາສະເໜີທ່ານໃນອັນດັບຕໍ່ໄປ.
ຜູ້ປະສານງານດ້ານສິດທິມະນຸດຂອງອົງການບໍ່ຂຶ້ນກັບລັດຖະບານໃນອາຊຽນ ເປີດເຜີຍວ່າ ທາງກະຊວງປ້ອງກັນຄວາມສະຫງົບໃນລາວ ໄດ້ອອກຄໍາສັ່ງເຖິງກຳລັງປ້ອງກັນຄວາມສະຫງົບໃນທົ່ວປະເທດເພື່ອໃຫ້ເພີ່ມຄວາມເຂັ້ມງວດ ເຂົ້າໃນການດຳເນີນມາດຕະການຄວບຄຸມ-ກວດກາເພື່ອຈຳກັດການເຄື່ອນໄຫວຂອງບັນດາຜູ້ນຳ ແລະປະຊາຊົນລາວບັນດາເຜົ່າ ທີ່ເຊື່ອຖືໃນສາສະໜາທີ່ມີຫລັກຄຳສອນທີ່ບໍ່ສອດຄ່ອງກັບແນວທາງຂອງພັກປະຊາຊົນປະຕິວັດລາວ ແລະຖ້າຫາກກວດພົບວ່າໄດ້ມີການເຄື່ອນໄຫວໃນລັກສະນະດັ່ງກ່າວ ກໍໃຫ້ ສາມາດຈັບກຸມໄດ້ທັນທີ ແລະຄວບຄຸມຕົວຜູ້ກ່ຽວເຂົ້າສູ່ຂະບວນການສຶກສາ-ອົບຮົມ ແລະ ສັນຍາວ່າ ຈະບໍ່ເຄື່ອນໄຫວໃນລັກສະນະດັ່ງກ່າວອີກ ຈຶ່ງຈະອະນຸຍາດໃຫ້ປ່ອຍຕົວຜູ້ກ່ຽວເປັນອິດສະຫຼະ ແລະ ກັບຄືນໄປສູ່ພູມລຳເນົາຂອງຜູ້ກ່ຽວ ຊຶ່ງສອດຄ່ອງກັບການເປີດເຜີຍຂອງພະນັກງານ ໃນກະຊວງປ້ອງກັນຄວາມສະຫງົບພາຍໃນລາວ ທີ່ຢືນຢັນວ່າ:
“ຜ່ານມາກໍໄດ້ມີການເຄື່ອນໄຫວວຽກງານສາສະໜາຢູ່ບັນດາແຂວງຕ່າງໆ ແລະຢູ່ຂັ້ນສູນກາງ ແລະກະເກັບກຳ ໄດ້ຫາງສຽງຂອງສັງຄົມກ່ຽວກັບສາສະໜາຕ່າງໆ ຍັງເຫັນໄດ້ວ່າສະພາບມີຜູ້ເຊື່ອຖືສາສະໜາບາງກຸ່ມຄົນມີການເຄື່ອນໄຫວບໍ່ໄປຕາມຫຼັກສິນທຳສາສະໜາຂອງຕົນ ເປັນຕົ້ນບັນຫາການສ້າງບ່ອນນະມັດສະການ, ການເຄື່ອນໄຫວສາສະຫນາ ໂດຍບໍ່ແຈ້ງຕໍ່ອົງການ-ອຳນາດການປົກຄອງທ້ອງຖິ່ນ, ມີການໂຄສະນາຊວນເຊື່ອ ເກີນຄວາມຈິງ, ການສິດສອນຂອງຄະນະແປກໆ ທີ່ບໍ່ຖືກຕ້ອງຕາມຫຼັກທຳ-ຄໍາສອນ.”
ສ່ວນພົນໂທ ທອງລອຍ ສີລິວົງ, ຮອງລັດຖະມົນຕີກະຊວງປ້ອງກັນປະເທດ ແລະຫົວໜ້າກົມໃຫຍ່ການເມືອງ ກອງທັບປະຊາຊົນລາວຖະແຫລງວ່າ ການຈັດຕັ້ງປະຕິບັດຍຸດທະສາດ 2 ໜ້າທີ່ຄື ການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍກອງທັບປະຊາຊົນລາວນັບຈາກປີ 2000 ເປັນຕົ້ນມາ ໄດ້ເຮັດໃຫ້ສາມາດຮັບປະກັນສະຖຽນລະພາບທາງດ້ານການເມືອງ ແລະຄວາມໝັ້ນຄົງແຫ່ງຊາດ ໄດ້ຢ່າງຄັກແນ່ ທັງຍັງ ສາມາດຄວບຄຸມ ແລະ ຈຳກັດການເຄື່ອນໄຫວຂອງກຸ່ມກຳລັງປະກອບອາວຸດທີ່ຕ້ອງການຈະກໍ່ເຫດຮຸນແຮງ ແລະຕໍ່ຕ້ານອຳນາດຂອງລັດຖະບານລາວໄດ້ຢ່າງສິ້ນເຊີງແລ້ວ ໂດຍສະເພາະໃນພື້ນທີ່ເປົ້າໝາຍຄື ແຂວງວຽງຈັນ, ໄຊສົມບູນ, ຊຽງຂວາງ, ບໍລິຄຳໄຊ ແລະ ຫຼວງພະບາງນັ້ນ ດັ່ງທີ່ທ່ານ ພົນໂທທອງລອຍ ໄດ້ໃຫ້ການຢືນຢັນວ່າ:
“ແຕ່ປີ 2000 ພວກເຮົາສືບຕໍ່ສຸມກຳລັງກໍ່ສ້າງຮາກຖານການເມືອງໝົດທົ່ວປະເທດ. ອັນນີ້ແມ່ນ ວຽກນຶ່ງ. ວຽກທີ 2 ແມ່ນວ່າໃຊ້ກຳລັງສືບຕໍ່ກວດລ້າງພວກທີ່ເສດເຫລືອໂດຍສະເພາະແມ່ນເຂດໃຈກາງຂອງປະເທດ ມີແຂວງໄຊສົມບູນ, ຊຽງຂວາງ, ແຂວງວຽງຈັນ, ແຂວງບໍລິຄຳໄຊ ແລະ ແຂວງຫຼວງພະ ບາງ. 5 ແຂວງນີ້ ກໍມີເຫດກໍ່ຄວາມບໍ່ສະຫງົບ ສະນັ້ນພວກເຮົາຈຶ່ງວາງມາດຕະການ ເພື່ອແກ້ໄຂຄວາມບໍ່ສະຫງົບຢູ່ 5 ແຂວງໃຫ້ສຳເລັດ, ຕີ-ກວາດລ້າງພວກທີ່ເສດເຫຼືອຈົນມີຄວາມສະຫງົບໂດຍພື້ນຖານ.”
ກ່ອນໜ້ານີ້ ສະພາແຫ່ງຊາດລາວ ໄດ້ຮັບຮອງເອົາກົດໝາຍວ່າດ້ວຍຊາຍແດນແຫ່ງຊາດ ໃນທ້າຍປີ 2021 ຊຶ່ງແນໃສ່ເພີ້ມປະສິດທິພາບການປາບປາມ ອາດຊະຍາກຳທຸກຮູບແບບ ຢູ່ຊາຍແດນລາວກັບປະເທດ ເພື່ອນບ້ານ ລວມເຖິງການພັດທະນາເສດຖະກິດ, ການຄ້າ ແລະ ການລົງທຶນທີ່ປາດສະຈາກບັນຫາອາດຊະຍາກຳໃຫ້ໄດ້ຢ່າງແທ້ຈິງໂດຍກະຊວງປ້ອງກັນປະເທດ ກໍຄືພາກສ່ວນທີ່ຮັບຜິດຊອບໃນການຮັບປະກັນດ້ານ ຄວາມໝັ້ນຄົງ ແລະສະຖຽນລະພາບທາງການເມືອງໃຫ້ໄດ້ຢ່າງເຕັມສ່ວນ ທັງຍັງຈະຕ້ອງສາມາດປົກປັກຮັກສາ ແລະເສີມສ້າງການເມືອງ-ການປົກຄອງໃນລາວໃຫ້ແຂງແຮງ ແລະເປັນທີ່ຍອມຮັບໃນ ສາກົນເພີ່ມຂຶ້ນນັບມື້ ໂດຍສະເພາະແມ່ນກອງທັບປະຊາຊົນລາວນັ້ນ ຍັງຈະຕ້ອງປະສານງານກັບກອງທັບຂອງປະເທດເພື່ອນບ້ານ ເພື່ອປ້ອງກັນ ແລະປາບປາມອາດຊະຍາກຳ ທຸກຮູບແບບອີກດ້ວຍ.
ທັງນີ້ ແກັ່ງອາດຊະຍາກຳຈີນ ຖືເປັນແກ້ງອາດຊະຍາກອນທີ່ຖືກຈັບກຸມໃນລາວຫຼາຍທີ່ສຸດ ນັບຕັ້ງແຕ່ປີ 2018 ເປັນຕົ້ນມາ ຊຶ່ງພະແນກປ້ອງກັນຄວາມສະຫງົບແຂວງບໍ່ແກ້ວ ແລະແຂວງຫຼວງນໍ້າທາ ໄດ້ສົ່ງຕົວຊາວຈີນ ໃຫ້ກັບຕໍາຫຼວດຈີນ ຫລາຍກວ່າ 1,000 ຄົນ ທີ່ພົວພັນກັບການຄ້າຢາເສບຕິດ, ການຄ້າ ມະນຸດ, ການພະນັນໃນລະບົບອອນໄລນ໌, ການຟອກເງິນ, ການສໍ້ໂກງ ແລະ ການຫຼອກລວງຜ່ານລະບົບ Call Center ທີ່ມີລັກສະນະເປັນອາດຊະຍາກຳຂ້າມຊາດ ແລະ ມີທ່າອ່ຽງຮຸນແຮງຂຶ້ນນັບມື້ ອັນເຮັດໃຫ້ທາງການແຂວງບໍ່ແກ້ວ ໄດ້ເພີ່ມມາດຕະການເຂັ້ມງວດເຂົ້າໃນການປາບປາມ ອາດຊະຍາກຳຢູ່ເຂດ 39 ບ້ານຕົ້ນເຜິ້ງ ເຊິ່ງເປັນທີ່ຕັ້ງຂອງເຂດເສດຖະກິດພິເສດສາມຫຼ່ຽມຄຳ ທັງຍັງໄດ້ລົງໂທດເຈົ້າໜ້າທີ່ລັດ ທີ່ມີ ສ່ວນພົວພັນກັບການກໍ່ອາດຊະຍາກຳໃນເຂດດັ່ງກ່າວ 100 ກວ່າຄົນໃນປີ 2022 ທີ່ຜ່ານມາ.
