ເນຶ່ອງໃນໂອກາດບຸນປີໃໝ່ລາວ ພ.ສ 2559 ລາຍການຊີວິດຊາວລາວ ຂອງ ວີໂອເອ ຈະນຳສະເໜີການສຳພາດ ບັນດາພຣະອາຈານ ແລະອອກຕົນຍາດໂຍມ ທີ່ພາກັນສະຫລອງບຸນປີໃໝ່ລາວຢູ່ຕາມທ້ອງຖິ່ນໃນລັດຕ່າງໆ ຂອງສະຫະລັດ ຊຶ່ງຍັງດຳເນີນກັນ ຢູ່ໃນຂະນະນີ້ໄປຈົນເຖິງທ້າຍເດືອນເມສາ. ການສະຫລອງບຸນປີໃໝ່ລາວ ຢູ່ໃນສະຫະ ລັດ ມີຄວາມແຕກຕ່າງກັບຢູ່ເມືອງລາວຢ່າງໃດນັ້ນ ກິ່ງສະຫວັນ ຈະນຳເລື້ອງນີ້ມາສະ ເໜີທ່ານໃນອັນດັບຕໍ່ໄປ.
ສະບາຍດີປີໃໝ່ ພ.ສ 2559. ປີນີ້ແມ່ນປີວອກ ຫລືປີລີງ. ໃນລາຍການຊີວິດຊາວລາວ ປະຈຳວັນພະຫັດມື້ນີ້ ຂ້າພະເຈົ້າຈະນຳເອົາການສຳພາດກັບ ພຣະອາຈານບຸບຜາ ທັນຍາວົງ ເຈົ້າອະທິການວັດລາວບຸບຜາຣາມ ທີ່ເມືອງ San Diego ລັດ California ຕັ້ງຢູ່ທາງພາກຕາເວັນຕົກສຽງໃຕ້ຂອງສະຫະລັດ ແລະພຣະອາຈານອຸຕະມະ ປັນໂຍ ຄຳຜາງ ສຸວັນນະສານ ເຈົ້າອະທິການວັດລາວ ສັນຕິທຳມະຣາມ ທີ່ເມືອງ Fort Worth ລັດ Texas ຕັ້ງຢູ່ພາກໃຕ້ຂອງສະຫະລັດ ມາສະເໜີທ່ານ ກ່ຽວກັບຊີວິດການເປັນຢູ່ ແລະ ຮີດຄອງປະເພນີການສະຫລອງບຸນປີໃໝ່ລາວ ຢູ່ໃນສະຫະລັດ ອາເມຣິກາ.
ເຖິງແມ່ນວ່າການສະຫລອງບຸນປີໃໝ່ລາວ ໄດ້ສິ້ນສຸດຜ່ານພົ້ນໄປຢ່າງມ່ວນຊື່ນຢູ່ປະເທດ ລາວ ອັນເປັນບ້ານເກີດເມືອງນອນທີ່ມາ ຂອງຊາວອາເມຣິກັນເຊື້ອສາຍລາວກໍຕາມ ແຕ່ວ່າຊາວລາວອາເມຣິກັນ ຍັງດຳເນີນສະຫລອງບຸນປີໃໝ່ລາວທົ່ວປະເທດ ຢູ່ໃນຂະນະນີ້ ອັນເປັນຮີດຄອງປະເພນີເກົ່າແກ່ໂບຮານຂອງລາວ. ຢູ່ນອກປະເທດບັນດາຄົນເຊື້ອສາຍລາວຕ້ອງໄດ້ເລືອກເອົາວັນເສົາ ວັນອາທິດ ແລະວັນພັກລາດຊະການ ເພາະວ່າເຂົາເຈົ້າຕ້ອງໄດ້ເຮັດວຽກທຳມາຫາກິນ ແລະມີຄວາມຮັບຜິດຊອບຕ່າງໆນາໆ ເໝືອນດັ່ງປະຊາ ກອນທົ່ວໆໄປ. ເພາະສະນັ້ນວັນພັກການທ້າຍສັບປະດາ ຈຶ່ງເປັນວັນປະເສີດສຸດ ທີ່ທຸກຄົນຈະໄດ້ມີໂອກາດມາເຕົ້າໂຮມພົບພໍ້ກັນ.
ການສະຫລອງບຸນປີໃໝ່ຢູ່ໃນສະຫະລັດ ຈະສັງເກດເຫັນໄດ້ວ່າ ເດີ່ນວັດວາອາຣາມໄດ້ກາຍມາເປັນບ່ອນຄ້າຂາຍ ບ່ອນວາງສິນຄ້າຕ່າງໆ ອັນມີເຄື່ອງປູກຂອງຝັງ ອາຫານພື້ນເມືອງລາວ ບ່ອນສະແດງສິນລະປະພື້ນເມືອງລາວ ແລະການສະແດງລື້ນເລີງຕ່າງໆ ທີ່ມີປະຊາກອນເດີນທາງມາຈາກທາງໃກ້ ແລະທາງໄກ ພາກັນມາມ່ວນຊື່ນ ແລະພົບພໍ້ກັນປະຈຳປີ.
ພຣະອາຈານບຸບຜາ ທັນຍາວົງ ເຈົ້າອະທິການວັດລາວ ບຸບຜາຣາມ ຊຶ່ງແມ່ນວັດນຶ່ງໃນຈຳນວນສາມວັດ ຢູ່ໃນເມືອງ San Diego ລັດ California ໄດ້ກ່າວຕໍ່ ວີໂອເອ ກ່ຽວກັບການສະຫລອງບຸນປີໃໝ່ລາວທີ່ຜ່ານມານີ້ວ່າ :
ບັດນີ້ ຂ້າພະເຈົ້າຈະນຳພາທ່ານໄປຢ້ຽມຢາມຖາມຂ່າວ ພະພິຂຸອຸຕະມະປັນໂຍ ຄໍາຜາງ ສຸວັນນະສານ ເຈົ້າອະທິການວັດລາວສັນຕິທຳມະຣາມ ທີ່ເມືອງ Fort Worth ລັດ Texas ຕັ້ງຢູ່ພາກໃຕ້ຂອງສະຫະລັດ. ພະຄູຄຳຜາຍ ໄດ້ເລົ່າຊີວີດການເປັນຢູ່ ແລະການສະຫຼອງບຸນປີໃໝ່ລາວທີ່ຜ່ານມາວ່າດັ່ງນີ້ :
ນັ້ນແມ່ນການສຳພາດບັນດາພຣະພິຂຸສົງ ກ່ຽວກັບການສະຫລອງບຸນປີໃໝ່ລາວ ພ.ສ. 2559 ຢູ່ໃນສະຫະລັດອາເມຣິກາ. ໃນວັນພະຫັດໜ້າ ເຮົາຈະນຳເອົາລາຍງານການສະຫລອງບຸນປີໃໝ່ ທີ່ວັດລາວພຸດທະວົງ ປະຈຳເຂດນະຄອນຫລວງ ວໍຊິງຕັນ ດີຊີ ທີ່
ຈະຈັດຂຶ້ນໃນວັນເສົາທີ່ 23 ເມສານີ້ ມາເລົ່າສູ່ທ່ານຟັງ.
