ລິ້ງ ສຳຫລັບເຂົ້າຫາ

ສຳພາດ ຍານາງນານາ ຊະນະວົງໄຊ ນັກຄົວກິນພື້ນເມືອງລາວ ທາງຢູທູບ ໃນສະຫະລັດ


ຍານາງນານາ ຊະນະວົງໄຊ ແມ່ຄົວອາຫານພື້ນເມືອງລາວ ຜ່ານທາງ Youtube ທີ່ມີຊື່ງສຽງໃນສະຫະລັດ.

ໃນລາຍການຊີວິດຊາວລາວມື້ນີ້ ເຮົາຈະໃຫ້ທ່ານ ຟັງການສຳພາດກັບ ຍານາງນານາ ຊະນະວົງໄຊ ນັກຄົວກິນອາຫານພື້ນເມືອງລາວ ທີ່ເມືອງ Merced ລັດ California. ແຕ່ ຫົວທີ ນານາ ບໍ່ມັກຄົວກິນແລະບໍ່ໃຫ້ຄວາມສົນໃຈກ່ຽວກັບການຄົວກິນ ໂດຍສະເພາະ ອາຫານພື້ນເມືອງລາວທີ່​ແມ່​ເຮັດ​ໃຫ້​ກິນ. ແຕ່ວ່າມາ​ບັດ​ນີ້ ນານາ​ໄດ້ເກີດ​ມີ​ຄວາມ​ສົນ​ໃຈ​ກ່ຽວ​ກັບ​ອາຫານ​ພື້ນ​ເມືອງ​ລາວ. ເປັນຫຍັງ ນານາ ​ຈຶ່ງໄດ້​ປ່ຽນ​ໃຈ ກິ່ງສະຫວັນ ຈະນຳ ເອົາຄຳຕອບ ສຳລັບຄຳຖາມຂໍ້ນີ້ມາສະເໜີທ່ານ.

ສະບາຍດີທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວມື້ນີ້ ຂ້າພະເຈົ້າ ຈະຂໍແນະນຳ ໃຫ້ທ່ານຮູ້ຈັກກັບ ຍານາງນານາ ຊະນະວົງໄຊ ນັກຄົວກິນ ອາຫານພື້ນເມືອງລາວ ປັດຈຸ ບັນນີ້ຕັ້ງຖິ່ນຖານຢູ່ເມືອງ Merced ລັດ California. ນານາແມ່ນເຊື້ອສາຍລາວອາເມຣິ
ກັນ ເກີດທີ່ບ້ານສີໄຄ ນະຄອນຫລວງວຽງຈັນ ນາງໄດ້ເຂົ້າມາຕັ້ງຖິ່ນຖານຢູ່ໃນສະຫະລັດ ກັບຄອບຄົວເມື່ອ 40 ປີກ່ອນ ​ເວລາ​ນັ້ນ​ມີ​ອາຍຸ​ໄດ້ 5 ປີ. ນານາເປັນລູກສາວຫລ້າໃນຈຳ ນວນອ້າຍເອື້ອຍນ້ອງຮ່ວມກັນທັງໝົດແປດຄົນ ແລະສາມາດປາກພາສາລາວສຳນຽງ​ວຽງ​ຈັນໄດ້ຢ່າງຄ່ອງແຄ້ວ. ອີງຕາມປະເພນີລາວແລ້ວແມ່ນວ່າ ບັນດາລູກແມ່ຍິງຕ້ອງຮູ້ຈັກ ຄົວກິນ ແຕ່ວ່າ​ເວລາທີ່ນານາຍັງ​ເປັນ​ເດັກນ້ອຍຢູ່​ຈົນ​ຮອດ​ໃຫຍ່​ເປັນ​ສາວ ນານາບໍ່ເຄີຍໄດ້ ໃຫ້ຄວາມສົນໃຈກ່ຽວກັບເລື້ອງນີ້ ອີກປະການນຶ່ງກໍເພາະວ່າ ນານາໄດ້ມາເຕີບໃຫຍ່ຢູ່ ໃນ
ບັນຍາກາດ ຂອງ​ສັງຄົມ​ໂລກ​ໃໝ່​ທີ່ ສະຫະລັດອາ​ເມຣິກາ.

ບັດນີ້ເຮົາມາເວົ້າເຖິງການປຸງແຕ່ງອາຫານພື້ນເມືອງລາວ ຊຶ່ງໃຜໆກໍຈະມັກ ກ່າວວ່າ “ແມ່ຂ້ອຍຄົວກິນແຊບອີ່ຫລີ” ຄຳ​ເວົ້າ​ດັ່ງກ່າວ​ນີ້​ກໍ​ເພາະວ່າ​ພວກ​ລູກໆ ​ໄດ້​ລື້​ງ​ເຄີຍ​ກັບ​ສີມື​ການປຸງ​ແຕ່ງອາຫານຂອງ​ແມ່​ມາ​ແຕ່​ເກີດ ​ແລະ​ນີ້​ແມ່ນ​ໂຕ​ຢ່າງ​ອັນ​ນຶ່ງ​ທີ່​ນຳພານານາ ຊະນະ​ວົງ​ໄຊ ມາ​ມີ​ບົດບາດ​ການ​ປຸງ​ແຕ່ງອາຫານ​ພື້ນ​ເມືອງ​ລາວ ຊຶ່ງ​ນານາ​ໄດ້​ເລົ່າ​ຊີວິດ ເບື້ອງຕົ້ນ​ໃຫ້ ວີ​ໂອ​ເອ ດັ່ງ​ນີ້ :

ໃນ​ເວລາ​ທີ່​ເຮົາ​ຍັງ​ເປັນເດັກນ້ອຍຢູ່ ມັນກໍເປັນຂອງ​ທຳ​ມ​ະດາ​ທີ່ບໍ່​ມັກ​ໃຫ້​ຄວາມ​ສົນ​ໃຈກ່ຽວ​ກັບ​ສັງຄົມສິ່ງ​ແວດ​ລ້ອ​ມ ​ເວົ້າ​ໂດຍ​ສະ​ເພາະ​ກໍ​ຄື​ຮີດຄອງ​ປະ​ເພ​ນີລາວ ການ​ປຸງ​ແຕ່ງອາ ຫານ ​ແລະ​ພິທີການ​ຕ່າງໆ​ຂອງ​ລາວທີ່​ພໍ່​ແມ່ ​ແລະ​ຜູ້​ອາວຸ​ໂສມີ​ຄວາມ​ເປັນ​ຫ່ວງ​ນຳພາລູກ​ຫລາ​ນ​ປະຕິບັດ​ມາ. ບັດ​ນີ້​ຊີວິດ​ຂອງພວກ​ເຮົາ​ໄດ້​ກ້າວ​ເຂົ້າມາ​ທົດແທນບັນດາພໍ່​ແມ່​ເຖົ້າ​ແກ່​ທີ່​ໄດ້​ຈາກ​ໂລກ​ນີ້​ໄປ​ແລ້ວ ​ໂດຍ​ທີ່​ບໍ່​ມີ​ຜູ້​ມາ​ໃຫ້​ຄຳ​ປຶກສາ​ຫາລື ​ແລະ​ບໍ່​ມີ​ບັນທຶກ​ຄົ້ນ​ຄວ້າ​ໃດໆ​ບອກ​ໄວ້​ໃຫ້. ນານາໄດ້​ກ່າວ​ເຖິງ​ຊີວິດ​ໃນ​ຕອນ​ນີ້​ວ່າ :

ບັດ​ນີ້​ນານາ​ໄດ້​ໃຫຍ່​ກ້າ​ໜ້າບານ ສ້າງ​ຄອບຄົວ ມີ​ລູກ​ສາມ​ຄົນ ​ແລະ​ມີ​ຄວາມ​ຮັບ ຜິດຊອບ​ກັບ​ກິດຈະການຄອບຄົວຫລາຍໆ​ຢ່າງ​ໃນ​ແຕ່​ລະ​ວັນ. ນານາ​ຕ້ອງ​ໄດ້​ຄົວ​ກິນ​ໃຫ້​ແກ່​ຄອບ ຄົວ ​ແລະ​ນີ້​ໄດ້​ນຳພາ​ນານາ​ກ້າວ​ເຂົ້າ​ມາ​ໃຫ້​ຄວາມ​ສົນ​ໃຈ​ດ້ານ​ການ​ຄົວກິນ​ຫລາຍ​ຂຶ້ນ ແລະ​ໄດ້​ເລີ້ມ​ເຜີຍ​ແຜ່​ອອກ​ທາງ YouTube ​ເພື່ອ​ໃຫ້​ເພື່ອນຝຸງໄດ້​ຮຽນ​ຮູ້​ຈາກ​ຄວາມ​ຈົດ​ຈຳທີ່​ໄດ້ສັງ​ເກດ ​ແລະ​ຮຽນ​ມາ​ຈາກ​ແມ່ ຊຶ່ງ​ນີນາ ກ່າວ​ຕໍ່​ໄປ​ອີກ​ວ່າ :

ອາ​ຫານ​ທີ່​ນານາໄດ້ປຸງແຕ່ງ​ອອກ​ມາ ​ເປັນ​ອາຫານ​ທີ່ມີ​ຄວາມ​ນິຍົມຊົມ​ຊອບ​ໃນ​ວົງ​ສັງຄົມເຊື້ອສາຍຊາວ​ລາວ ເປັນ​ອາຫານ​ທີ່​ຕ້ອງໃຊ້​ເວລາຫ້າງ​ຫາ​ ມີ​ເຄື່ອງປຸງ​ແຕ່ງ​ທີ່​ບໍ່​ມີ​ຢູ່​ໃນ ​ຕະຫລາດ​ທົ່ວໆ​ໄປ​ໃນ​ສະຫະລັດ ແລະ​ກໍ​ເປັນ​ອາຫານ​ພື້ນ​ເມືອງ​ລາວທີ່​ຫາ​ກິນ​ໄດ້​ຍາກ ຊຶ່ງ​ນານາ​ໄດ້​ກ່າວ​ດັ່ງ​ນີ້ :

ສະຫະລັດ​ອາ​ເມຣິກາ ​ເປັນ​ປະ​ເທດ​ທີ່​ກວ້າງ​ໃຫຍ່ໄພສານ ພາກ​ໃຕ້ ​ແລະ​ພາ​ກຕາ​ເວັນຕົກ​ສຽງໃຕ້ມີ​ອາກາດ​ອົບ​ອຸ່ນ​ຢູ່​ຕະຫລອດ​ປີ ​ເພາະສະ​ນັ້ນ​ບັນດາ​ພີ່ນ້ອງ​ເຊື້ອສາຍ​ລາວ​ຜູ້ທີ່​ຕັ້ງ​ຖິ່ນ​ຖານ​ຢູ່​ໃນ​ເຂດ​ນີ້ ​ຈຶ່ງມັກພາກັນ​ເຮັດ​ຮົ້ວ​ເຮັດ​ສວນປູກ​ຝັງ​ ​ແລະ​ມ່ວນ​ຊື່ນ​ກັບຜົນ​ລະປູກ ອັນ​ເປັນພືດ​ຜັກ​ທີ່​ຫາ​ກິນ​ໄດ້​ຍາກ ຊຶ່ງ​ນານາ​ໄດ້​ກ່າວ​ກ່ຽວ​ກັບ​ເລື້ອງ​ນີ້​ວ່າ :

ປັດ​ຈຸ​ບັນ​ນີ້​ເຮົາ​ຢູ່​ໂລກ​ອັນ​ທັນ​ສະ​ໄໝ​ຂອງ​ສັດຕະວັດ​ທີ່ 21 ການ​ໂທລະ​ຄົ​ມມະ​ນາ​ຄົມ​ຫາ​ກັນ​ພຽງ​ແຕ່​ຢູ່​ປາຍ​ນີ້ວມື​ເທົ່າ​ນັ້ນ ​ເພາະສະ​ນັ້ນ​ນານາ​ຈຶ່ງໄດ້​ຖື​ໂອກາດ​ນີ້ໃຊ້​ເທັກ​ໂນ​ໂລ​ຈີ​ອັນ​ຫລ້າ​ສຸດ​ ​ນຳເອົາ​ການສະ​ແດງ​ຄົວກິນມາສະ​ເໜີ​ທ່ານຜ່ານ​ທາງ YouTube ຊຶ່ງມີ​ຜູ້​ເຂົ້າຊົມ​ກວ່າ​ແສນ​ຄົນ ​ແລະ​ນານາ​ໄດ້​ກ່າວ​ມ້ວ​ນທ້າຍ​ດັ່ງ​ນີ້ :

ນານາ​ສຳ​ເລັດ​ການ​ສຶກສາ​ອະນຸ​ປີ​ຍາຝ່າຍທຸລະ​ກິດ ​ແລະ​ສາມີ​ທ່ານ​ອະລິ​ສັກ​ເປັນ​ນັກຊ່ຽວ ຊານ​ດ້ານ​ຄອມພິມເຕີ ​ແລະ​ອາສາ​ສະໝັກ​ແກ່​ອົງການ​ທີ່​ບໍ່​ຫວັງຜົນ​ກຳ​ໄລ. ອະລິ​ສັກ​ເປັນ​ຄົນ​ນຶ່ງ​ທີ່​ໄດ້​ຊ່ວຍ​ປະດິດ​ຄິດ​ສ້າງການ​ຕີ​ພິ​ມພາສາ​ລາວ​ຢູ່ໃນ iPhone ​ແລະ iPad. ທ່ານ​ສາມາດ​ເຂົ້າ​ຊົມ ວີ​ດີ​ໂອ ການ​ປຸງ​ແຕ່ງອາຫານ​ລາວ​ຂອງນານາໄດ້ທີ່​ໜ້າ YouTube ພາຍໃຕ້​ຊື່ Nana Sanavongsay.

ຍໍ່າຕີນໄກ່ ມີລົດຊາດສົ້ມ ເຄັມ ເຜັດ ຫຍໍ້າປັອດໆ ແຊບອີ່ຫລີ.

ທ່ານອາດຈະມັກເລື້ອງນີ້ຄືກັນ

XS
SM
MD
LG