ທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວຂອງ ວີໂອເອ ປະຈຳວັນພະຫັດ ມື້ນີ້ ເຮົາຈະນຳສະເໜີການສຳພາດ ຍານາງອະນຸສອນ ສີລິວົງໄຊ ຜູ້ບໍລິຫານອົງ ການພັນທະ ມິດແຫ່ງຊາດລາວອາເມຣິກັນ Laotian American National Alliance ຫລື LANA ເປັນ ອົງການອາສາສະມັກທີ່ບໍ່ຫວັງຜົນກຳໄລ. ອະນຸສອນ ເປັນຄູສອນປະຫວັດສາດ ແລະພາສາອັງກິດ ນອກນັ້ນຍັງເປັນການເຄື່ອນໄຫວ ເປັນປາກເປັນສຽງດ້ານສັງຄົມ ແລະເສດ ຖະກິດການເປັນຢູ່. ຄວາມເປັນມາ ຂອງອະນຸສອນເປັນຢ່າງໃດນັ້ນ ກິ່ງສະຫວັນ ຈະນຳມາສະເໜີທ່ານໃນອັນດັບ ຕໍ່ໄປ.
ສະບາຍດີທ່ານຜູ້ຟັງທີ່ເຄົາລົບ ໃນລາຍການຊີວິຊາວລາວຂອງ ວີໂອເອ ມື້ນີ້ ຂ້າພະເຈົ້າຂໍ ແນະນຳໃຫ້ທ່ານຮູ້ຈັກກັບ ຍານາງອະນຸສອນ ສີລິວົງໄຊ ຜູ້ບໍລິຫານ ອົງການພັນທະມິດ ແຫ່ງ ຊາດລາວອາເມຣິກັນຫຼື Laotian American National Alliance ມີຊື່ຫຍໍ້ວ່າ (LANA). ອົງການ LANA ນີ້ ຕັ້ງຂຶ້ນມາໃນປີ 1999 ເປັນອົງການອາສາສະມັກທີ່ບໍ່ຫວັງຜົນກຳໄລ ຈຸດປະສົງກໍຄືເປັນປາກ ເປັນສຽງທາງດ້ານສັງຄົມ ເສດຖະກິດ ແລະຄວາມກ້າວໜ້າດ້ານ ການສຶກສາ ໃຫ້ແກ່ບັນດາຊາວໜຸ່ມອາເມຣິກັນເຊື້ອ ສາຍລາວ ທີ່ໄດ້ມາເກີດ ແລະເຕີບ ໃຫຍ່ຢູ່ໃນສະຫະລັດ.
ເປັນເວລາສີ່ທົດສະວັດຜ່ານມາແລ້ວບັດນີ້ເຮົາສາມາດສັງເກດເຫັນໝາກຜົນ ຄວາມແຕກ ຕ່າງ ແລະຊ່ອງຫວ່າງດ້ານການສຶກສາ ລະຫວ່າງບັນດາຜູ້ປົກຄອງ ແລະລູກເຕົ້າຜູ້ທີ່ໄດ້ ມາເຕີບໃຫຍ່ຢູ່ໃນຕ່າງປະເທດ ໂດຍສະເພາະ ຢູ່ໃນສະຫະ ລັດອາເມຣິກາ ທີ່ພວກລູກຫລານຜູ້ເກີດໃໝ່ໃຫຍ່ລຸນ ໄດ້ມີໂອກາດສຶກສາຮໍ່າຮຽນ. ບັນດາພໍ່ແມ່ຜູ້ປົກຄອງ ຜູ້ທີ່ໄດ້ ບຸກເບີກປູທາງການຕັ້ງຊີວິດໃໝ່ ເພື່ອຄວາມຢູ່ດີເປັນສຸກ ແລະຄວາມປອດໄພແກ່ຄອບຄົວ ບັດນີ້ພາກັນມີ ຄວາມ ພາກພູມໃຈ ທີ່ເຫັນລູກເຕົ້າໄດ້ຮັບຜົນສຳ ເລັດດ້ານການສຶກສາ ສູງ ຢູ່ໃນຂະແໜງການຕ່າງໆ.
ບັດນີ້ເຮົາມາຕິດຕາມຟັງການສົນທະນາກັບ ຍານາງອະນຸສອນ ສີລິວົງໄຊ ອາເມຣິກັນ ເຊື້ອສາຍລາວ ຜູ້ເປັນໂຕຢ່າງທີ່ດີຄົນນຶ່ງ ທີ່ໄດ້ມາເຕີບໃຫຍ່ຢູ່ ໃນສະຫະລັດ ເປັນພົນລະເມືອງທີ່ດີຂອງຊາດ ແລະເປັນຜູ້ປະສົບຜົນສຳເລັດດ້ານການສຶກສາ. ອະນຸສອນສຳເລັດປະລິນ ຍາໂທ ຝ່າຍປະ ຫວັດສາດ ແລະພາສາອັງກິດ. ອ້າຍນ້ອງຂອງອະນຸສອນທັງສີ່ຄົນ ສຳເລັດປະລິນຍາຕີ ແລະປະລິນຍາເອກ. ປັດຈຸບັນນີ້ ອະນຸສອນເປັນນາຍຄູສອນປະ ຫວັດສາດ ແລະພາສາອັງກິດຢູ່ໂຮງຮຽນມັດທະຍົມ. ດ້ວຍຄວາມເປັນຫ່ວງກັບສັງຄົມລາວອາເມຣິກັນ ນາງໄດ້ກ້າວເຂົ້າມາຮັບໃຊ້ເປັນປະທານອົງການ LANA ໄດ້ກາຍມາ ເປັນນັກເຄື່ອນໄຫວ ແລະເປັນປາກເປັນສຽງໃຫ້ແກ່ສັງຄົມ ຊຶ່ງອະນຸສອນ ໄດ້ກ່າວສູ່ ວີໂອເອ ເຖິງ ຂັ້ນຕອນຄວາມເປັນມາດັ່ງນີ້.
ອະນຸສອນ ເປັນນາຍຄູວິຊາປະຫວັດສາດ ແລະພາສາອັງກິດ ແລະໄດ້ຖືກຍ້ອງຍໍເປັນພິເສດມາຕະຫລອດ. ເນື່ອງຈາກວ່າ ນາງເປັນພັນລະຍາຂອງທະຫານສະຫະລັດ ເພາະສະນັ້ນຊີວິດຄອບຄົວຕ້ອງໄດ້ຍົກຍ້າຍໄປຢູ່ຫລາຍໆແຫ່ງ ແລະອະນຸສອນ ກໍໄດ້ສິດສອນ ຢູ່ ໂຮງຮຽນມັດທະຍົມຫຼາຍໆແຫ່ງ ດັ່ງນາງໄດ້ກ່າວຕໍ່ໄປວ່າ.
ປະເທດສະຫະລັດ ເປັນປະເທດເສລີປະຊາທິປະໄຕ ໂດຍສະເພາະທາງດ້ານການສຶກສາ ເປີດກວ້າງໃຫ້ແກ່ທຸກໆຄົນມີສິດຮໍ່າຮຽນເອົາວິຊາໃດໆໄດ້ຕາມໃຈມັກ. ບັນດາພໍ່ແມ່ຜູ້ປົກຄອງຫລາຍໆຄົນ ທີ່ມາຈາກປະເທດກຳລັງພັດທະນາ ບໍ່ຄ່ອຍເຂົ້າໃຈເຖິງຫລັກສູດການຮຽນສະໄໝໃໝ່ຂອງປະເທດອຸດສາຫະກຳ ແລະຮັ່ງມີ ຊຶ່ງເຂົາເຈົ້າພາກັນສະໜຸກສະໜານເລືອກເອົາວິຊາຮຽນຢູ່ຂັ້ນມະຫາວິທະຍາໄລ ເຊັນວ່າດ້ານມະນຸດສະທຳ ຫລື humanities ຄືດັ່ງວິຊາປະຫວັດສາດ ພາສາສາດ ສົງຄົມສາດ ມະນຸດສາດ ການຟ້ອນ ແລະດົນຕີເຫລົ່ານີ້ເປັນຕົ້ນ. ຢູ່ໃນສາຍຕາ ແລະແນວຄິດຂອງບັນດາຜູ້ປົກຄອງທີ່ມາ
ຈາກ ປະເທດທີ່ກຳລັງພັດທະນາແລ້ວເຂົາເຈົ້າ ຍັງເຫັນວ່າ ເປັນວິຊາອາຊີບທີ່ບໍ່ສ້າງລາຍໄດ້ ແລະບໍ່ມີຊື່ສຽງເທົ່າກັບການເປັນທ່ານໝໍ ເປັນທະນາຍຄວາມ ນັກວິຊະວະກອນເຫລົ່ານີ້ເປັນຕົ້ນ ຊຶ່ງອະນຸສອນ ໄດ້ເລົ່າປະສົບການສູ່ຟັງດັ່ງນີ້.
ທຸກໆລະດູຮ້ອນ ອົງການ LANA ໄດ້ຈັດໃຫ້ມີການສຳມະນາຫລາຍໆຢ່າງແກ່ບັນດາໜຸ່ມນ້ອຍອາເມຣິກັນເຊື້ອສາຍລາວ ເຊັ່ນວ່າ ປະຫວັດ ສາດລາວ ພາສາລາວ ປະເພນີລາວ ໂດຍສະເພາະຢ່າງຍິ່ງກ່ຽວກັບສະ ພາບການຢູ່ໃນສະຫະລັດ ເຊັ່ນບັນຫາຄົນເຂົ້າເມືອງ ການເນລະເທດຄົນອອກປະເທດ ການກັກຂັງບັນດາເຍົາວະຊົນທີ່ບໍ່ເຖິງກະສຽນ ແລະບັນ ຫາຍິງສາວຖືພາແຕ່ຍັງນ້ອຍ ເຫລົ່ານີ້ເປັນຕົ້ນ. ອະນຸສອນ ໄດ້ເປັນປະ ທານອົງການ LANA ມາໄດ້ສີ່ປີແລ້ວ ນາງໄດ້ເຫລົ່າເຖິງ ການຊອກຫາທຶນຮອນມາບໍລິຫານອົງການແລະຍັງມີຄວາມເປັນຫ່ວງຢາກຊ່ວຍປະຊາຄົມອາເມຣິກັນເຊື້ອສາຍລາວ ຊຶ່ງອະນຸສອນ ໄດ້ເລົ່າສູ່ວີໂອເອຟັງ ເພື່ອເປັນການມ້ວນທ້າຍດັ່ງນີ້ :
ໃນເດືອນສິງຫາ ແຕ່ວັນທີ 5 ຫາ 6 ຈະມາເຖິງນີ້ ອົງການ LANA ຈະຈັດສຳມະນາປະຈຳປີ ຄັ້ງທີ 7 ຂຶ້ນທີ່ເມືອງ Las Vegas ທາງພາຕາເວັນຕົກສຽງໃຕ້ຂອງສະຫະລັດ ຊຶ່ງເຂົາເຈົ້າຈະມາພົບພໍ້ແລກປ່ຽນຄວາມຄິດເຫັນກັນເປັນເວລສອງວັນ ທ່ານສາມາດຕິດຕາມໄດ້ທີ່:
https://www.eventbrite.com/e/7th-laotian-american-national-conference-tickets-24840804515
