ໃນລາຍການຊີວິດຊາວລາວ ຂອງ ວີໂອເອ ມື້ນີ້ເຮົາຈະຂໍແນະນຳໃຫ້ທ່ານຮູ້ຈັກ ກັບຄອບຄົວ ທ່ານບຸນລັດ ສຸກສະວົງ ທີ່ລັດ California ເປັນຄອບຄົວໂຕຢ່າງ ອາເມຣິກັນເຊື້ອສາຍລາວ ທີ່ປະສົບຜົນສຳເລັດການສຶກສາຊັ້ນສູງ. ທ່ານບຸນລັດ ຫົວໜ້າຄອບຄົວ ເປັນຜູ້ຊ່ວຍດອກເຕີ ແລະລູກສາວສາມຄົນ ແຕ່ລະຄົນໄດ້ ຮັບປະລິນຍາຝ່າຍການແພດ. ສ່ວນວ່າຜົນສຳເລັດຈາກຄວາມມີມານະອົດທົນ ເປັນມາຢ່າງໃດນັ້ນ ກິ່ງສະຫວັນ ຈະນຳເລື້ອງນີ້ມາສະເໜີທ່ານໃນອັນດັບຕໍ່ໄປ.
ສະບາຍດີທ່ານຜູ້ຟັງທີ່ເຄົາລົບ ມື້ນີ້ຂ້າພະເຈົ້າມີຄວາມພາກພູມໃຈທີ່ຈະນຳພາ ທ່ານໄປ ຮູ້ຈັກກັບ ຄອບຄົວສຸກສະວົງ ອາເມຣິກັນເຊື້ອສາຍລາວ ຕັ້ງຖິ່ນຖານ ຢູ່ໃນລັດ California ທາງພາກຕາເວັນຕົກສຽງໃຕ້ຂອງສະຫະລັດ. ທ່ານບຸນລັດ ສຸກສະວົງ ຫົວໜ້າຄອບຄົວ ແມ່ນລູກບ້ານຫລານເມືອງນະຄອນຫລວງພະບາງ ມີຄວາມສົນໃຈດ້ານການແພດມາແຕ່ໃດໆ ແລະໄດ້ບາກບັ່ນຕັ້ງເປົ້າໝາຍ ມາສູ່ ຜົນສຳເລັດ ອັນເປັນໂຕຢ່າງໃຫ້ແກ່ພວກລູກໆ ທີ່ໄດ້ຕິດຕາມຮ່ອງຮອຍຂອງພໍ່ ແລະຜູ້ເປັນແມ່ ຍານາງເພັນພິດ ທີ່ໃຫ້ການສະໜັບສະໜູນຊຸກຍູ້ຢຸູ່ເບື້ອງຫລັງ ມາຕະຫລອດ ອັນນຳມາສູ່ຜົນສຳເລັດຢ່າງໜ້າສັນລະເສີນ ດັ່ງຜູ້ກ່ຽວອະທິບາຍວ່າ:
ທ່ານບຸນລັດ ປັດຈຸບັນເຮັດວຽກໃຫ້ແກ່ ຄລິນິກຂອງຫຼວງຢູ່ Golden Valley Health Center ທີ່ເມືອງ Merced ລັດ California. ທ່ານໄດ້ເລົ່າຊີວິດເບື້ອງຕົ້ນ ແລະເວົ້າ ກ່ຽວກັບໜ້າທີ່ວຽກການ ສູ່ຟັງດັ່ງນີ້ :
ທ່ານໝໍບຸນລັດ ໄດ້ເຮັດວຽກຮັບໃຊ້ສັງຄົມປິ່ນປົວຄົນທຸກຈົນມາໄດ້ 25 ປີແລ້ວ ແລະເຖິງກຳນົດກິນເບ້ຍບຳນານໄດ້ແລ້ວ ແຕ່ວ່າທ່ານໄດ້ເລົ່າເຖິງການຕັດສິນໃຈໃນຕອນນີ້ສູ່ ວີໂອເອ ຟັງວ່າ :
ຢູ່ໃນສະຫະລັດອາເມຣິກາ ແຕ່ລະປີເລີ້ມຕົ້ນແຕ່ເດືອນພຶດສະພາ ຢູ່ຕາມມັດທະ ຍົມຕ່າງໆ ຈະມີພິທີມອບໃບປະກາດສະນີຍະບັດ ໃຫ້ແກ່ພວກນັກຮຽນທີ່ຮຽນ ຈົບ ທີ່ຈະພາກັນສືບຕໍ່ຮຽນຂັ້ນສູງຢູ່ຕາມມະຫາວິທະຍາໄລຕ່າງໆ. ສ່ວນວ່າບັນ ດານັກສຶກ ສາຊັ້ນສູງທີ່ຮຽນຈົບຈາກມະຫາວິທະຍາໄລໃນເວລາ ດຽວກັນເຂົາເຈົ້າກໍຈະໄດ້ຮັບ ໃບປະກາດສະນີຍະບັດໃນຂະແໜງການຕ່າງໆ ຫລັງຈາກໄດ້ບຶກບືນ ມາເປັນເວລາສີ່ຫາຫົກປີ. ບັດນີ້ບັນດາຜູ້ສຳເລັດການສຶກສາເຫລົ່ານີ້ຈະພາກັນ ນໍາໃຊ້ວິຊາຕ່າງໆໃຫ້ເປັນປະໂຫຍດແກ່ສັງຄົມ ແລະປະເທດຊາດ. ຢູ່ໃນພິທີອັນສະ ງ່າຜ່າເຜີຍ ແລະ ໜ້າພາກພູມໃຈນີ້ ບັນດາພໍ່ແມ່ອ້າຍນ້ອງພ້ອມດ້ວຍຍາດມິດ ຈະມາເຕົ້າໂຮມກັນສະໜັບສະໜູນ ຮ້ອງໂຮຊົມເຊີຍກັບຜົນສຳເລັດດັ່ງກ່າວ.
ບັດນີ້ເຮົາມາພົບກັບນາງສາວ Joanna Han ສຸກສະວົງ ເໜາະທ່ານ. ຜູ້ກ່ຽວ ອາຍຸ 26 ປີ ລູກສາວຄົນທີສອງຂອງທ່ານບຸນລັດ ແລະຍານາງເພັນພິດ ສຸກສະວົງ. Joanna ແມ່ນຜູ້ ນຶ່ງ ທີ່ຫາກໍສຳເລັດປະລິນຍາເອກຝ່າຍເພສັດຊະກຳ ຫລື pharmacy ແລະປະລິນຍາໂທ ຝ່າຍສາທາລະນະສຸກຈາກ ມະຫາວິທະຍາໄລ Touro ລັດ California. ກ່ອນໜ້ານັ້ນ Joanna ໄດ້ຮັບ ປະລິນຍາຕີຝ່າຍ Arts of Chemistry ຈາກ California States University of Fresno.
ຫລາຍໆທ່ານອາດຄິດວ່າ pharmacy ຫລືເພສັດຊະກຳ ຜູ້ປຸງແຕ່ງຢາ ເປັນຄົນນັບກ້ອນ ຢາຢູ່ຫລັງໂຕະຂາຍຢາ ເຖິງຢ່າງໃດກໍດີ ການປິ່ນປົວຢູ່ໃນສະຫະລັດ ທີ່ພົວພັນກັບ pharmacists ນີ້ໃຫ້ການຊ່ວຍເຫລືອປະສານງານກັບ ບັນດານາຍ ແພດຕ່າງໆ ປິ່ນປົວ ຄົນເຈັບໃຫ້ດີທີ່ສຸດຢູ່ ໃນຫລາຍໆສະພາບການ ທີ່ຮວມທັງ ການໃຊ້ຢາໃນເວລາສຸກເສີນ ພະຍາດຕິດແປດ ຢາສຳລັບເດັກນ້ອຍ ແລະການ ປິ່ນປົວມະເຮັງ. Joanna ມີຄວາມພາກ ພູມໃຈທີ່ສຸດ ທີ່ຈະປະຕິບັດໜ້າທີ່ວຽກ ງານກ່ຽວກັບວິຊາການດັ່ງກ່າວນີ້ ໃນນາມຊາວ ອາເມຣິກັນເຊື້ອສາຍລາວລຸ້ນໃໝ່ຈຸທຳອິດ. Joanna ໄດ້ກ່າວຕໍ່ ວີໂອເອ ກ່ຽວກັບຜົນ ສຳເລັດຂອງນາງດັ່ງນີ້
“ເວລາຍັງເປັນເດັກນ້ອຍຢູ່ ພໍ່ຂ້ານ້ອຍເປັນຜູ້ຊ່ວຍດອກເຕີ ເພາະສະນັ້ນເພີ່ນຈຶ່ງໄດ້ແນະນຳໃຫ້ພວກຂ້ານ້ອຍຮຽນກ່ຽວກັບການແພດ ເວລາຂ້ານ້ອຍໃຫຍ່ຂຶ້ນມາ ຂ້ານ້ອຍມີຄວາມສົນໃຈກ່ຽວກັບ pharmacy ແລະການແພດ ມັນມີຄວາມຍາກລໍາບາກ ຂ້ານ້ອຍຕ້ອງດຳເນີນການຮຽນອີກເປັນເວລາແປດປີຫລັງຈາກ ມັດທະຍົມ. ຂະນ້ອຍຕ້ອງໄດ້ນັ່ງຮຽນຫລາຍຊົ່ວໂມງໃນແຕ່ລະມື້ ແທນທີ່ຈະໄດ້ອອກໄປຫລິ້ນມ່ວນຊື່ນກັບໝູ່. ຂ້ານ້ອຍມີຄວາມ ດີໃຈຫລາຍທີ່ໄດ້ຮຽນຈົບ ພໍ່ຂອງຂ້ານ້ອຍໄດ້ຊັກຊວນໃຫ້ພວກລູກໆຮຽນການແພດ ເອື້ອຍ ຂອງຂ້ານ້ອຍ Christina ປັດຈຸບັນນີ້ເປັນນາງພະຍາບານ ທີ່ Career Delta ທີ່ ລັດ California ຫວ່າງມໍ່ໆມານີ້ລາວໄດ້ຍືນຄຳຮ້ອງໄປເຂົ້າໂຮງຮຽນ podiatry ຫລືການແພດກ່ຽວກັບຕີນ ແລະໄດ້ຖືກຮັບເອົາແລ້ວ ເພາະສະນັ້ນ ລາວຈະຕ້ອງຍ້າຍໄປຢູ່ເມືອງ Oakland ເພື່ອຮຽນຕໍ່ເອົາດອກເຕີ. Sherina ນ້ອງສາວຫລ້າ ສົນໃຈໃນດ້ານການແພດເຊັນດຽວກັນ ປັດຈຸບັນນີ້ລາວກຳລັງຕຽມເສັງເຂົ້າໂຮງຮຽນນາງພະຍາບານ.
ຂ້ານ້ອຍຈະເປັນໝໍປະຈຳຢູ່ໂຮງໝໍ Sutter Health ແລະຫວັງວ່າຈະເປັນນັກການແພດຄລິນິກ ຊຶ່ງໝາຍຄວາມວ່າ ຂ້່ານ້ອຍຈະເຮັດວຽກແຈກຢາຍຢາຢູ່ໃນໂຮງໝໍຢ່າງ ປອດໄພ ແລະເໝາະສົມແກ່ບັນດາຄົນເຈັບ. ນອກນັ້ນຂະນ້ອຍກໍຫວັງວ່າຈະໄດ້ເຮັດວຽກຢູ່ຕາມຊັ້ນຕ່າງໆຢູ່ໂຮງໝໍ ກັບບັນດາດອກເຕີ ນາງພະ ຍາບານ ຝ່າຍກາຍຍະພາບບຳບັດ ແລະນັກການແພດຕ່າງໆ ເພື່ອໃຫ້ພວກຄົນເຈັບໄດ້ຮັບການປິ່ນປົວ ພ້ອມດ້ວຍພວກທີ່ໄດ້ຮັບບາດເຈັບໜັກຢູ່ໃນຫ້ອງສຸກເສີນ. ຂະນ້ອຍມີຄວາມຕື່ນເຕັ້ນກ່ຽວກັບວຽກນີ້ ເພາະວ່າວຽກ pharmacy ພັດທະນາໃຫ້ເຂົ້າກັບໜ້າວຽກພິເສດ.”
ວີໂອເອ ຂໍສະແດງຄວາມພາກພູມໃຈມາຍັງ ຄອບຄົວສຸກສະວົງ ແລະບັນດານັກສຶກສາ ອາເມຣິກັນເຊື້ອສາຍລາວທັງຫລາຍ ທີ່ໄດ້ພາກັນບາກບັ່ນປະສົບຜົນສຳເລັດ ສ້າງຊື່ສຽງມາສູ່ຕົນເອງ ຄອບຄົວ ແລະປະເທດຊາດ.
