ມື້ນີ້ ວັນພະຫັດ ອາທິດທີສີ່ ເດືອນພະຈິກ ຊຶ່ງປີນີ້ກົງກັບວັນທີ 24 ຕາມປະເພນີແລ້ວ ຊາວ ອາເມຣິກັນພາກັນສະຫລອງບຸນ Thanksgiving ຫລືບຸນຂອບຄຸນພະເຈົ້າ ປະຈໍາປີ ທີ່ໄດ້ສະເຫຼີມສະຫລອງກັນມາ ເປັນເວລາ ດົນກວ່າສອງຮ້ອຍປີແລ້ວ. ເພາະສະນັ້ນ ລາຍການຊີວິດຊາວລາວຂອງ ວີໂອເອ ແລງມື້ນີ້ ເຮົາຈຶ່ງຈະຖືໂອກາດນໍາເອົາການສໍາພາດກັບສະຕີ ລາວ-ອາເມຣິກັນ ຢູ່ເຂດນະຄອນຫລວງ ວໍຊິງຕັນ ມາສະເໜີທ່ານ ວ່າເຂົາເຈົ້າພາກັນຫ້າງຫາ ແລະສະຫລອງບຸນດັ່ງກ່າວນີ້ຢ່າງໃດຊຶ່ງ ກິ່ງສະວັນ ຈະນຳມາສະເໜີທ່ານໃນອັນດັບຕໍ່ໄປ.
ສະບາຍດີ ທ່ານຜູັຟັງທີ່ເຄົາລົບ ມື້ນີ້ແມ່ນ ວັນພະຫັດ ທີ 24 ເດືອນພະຈິກກົງກັບ ວັນ Thanksgiving ຫລືວັນສະຫລອງບຸນຂອບຄຸນພະເຈົ້າ ສຳລັບປີ 2016 ຊຶ່ງເປັນບຸນໃຫຍ່ຂອງຊາດປາງນຶ່ງຂອງສະຫະລັດ. ບຸນດັ່ງກ່າວນີ້ ໄດ້ສະຫລອງກັນມາເປັນເວລາສອງ ຮ້ອຍກວ່າປີແລ້ວ. ປັດຈຸບັນນີ້ ຢູ່ພາກເໜືອຂອງສະຫະລັດ ອາກາດໄດ້ເລີ້ມໜາວ ແລະມີຫິມະຕົກໜັກ ຕົ້ນໄມ້ຍັງເຫລືອໄວ້ໃຫ້ເຫັນແຕ່ຮ່າງ ປາດສະຈາກໃບ ຍົກເວັ້ນແຕ່ຕົ້ນແປກ ແລະຕົ້ນໄມ້ຊະນິດທີ່ສູ້ທົນກັບຄວາມໜາວໄດ້ນັ້ນ ຊຶ່ງຍັງພາກັນຂຽວງາມໄວ້ໃຫ້ເຫັນຢູ່. ປະຊາຄົມອາເມຣິກັນ ແມ່ນເຕັມໄປດ້ວຍ ການຕົກແຕ່ງດ້ວຍແສງສີ ແລະເຄື່ອງເອ້ຕ່າງໆ ຢູ່ຕາມບ້ານເຮືອນ ຖະໜົນຫົນທາງ ແລະຮ້ານຄ້າຕ່າງໆ ເພື່ອຕ້ອນຮັບການສະຫລອງບຸນ ອື່ນໆ ທີ່ຈະຕິດຕາມມາໃນເທດສະການບຸນນີ້ຄືບຸນ Christmas ໃນວັນທີ 25 ເດືອນທັນວາ ຊຶ່ງຈະຕິດຕາມມາໃນວັນເສົາທີ 31 ມື້ສຸດທ້າຍຂອງປີ ກໍຈະແມ່ນມື້ສະຫລອງສົ່ງທ້າຍປີເກົ່າ ແລະຕ້ອນຮັບປີໃໝ່ ຄ.ສ 2017.
ໃນວາລະໂອກາດສະຫລອງບຸນຂອບຄຸນພະເຈົ້ານີ້ ປະຊາກອນສະຫະລັດ ຫລາຍລ້ານຄົນພາກັນເດີນທາງໄປຢ້ຽມຢາມຖາມຂ່າວ ຍາດຕິພີ່ນ້ອງຢູ່ທຸກຫົນແຫ່ງ. ນອກຈາກນັ້ນແລ້ວ ເຂົາເຈົ້າກໍຈະພາກັນຊື້ອາຫານການກິນ ເຄື່ອງດື່ມເພື່ອຕ້ອນຮັບລ້ຽງສະຫລອງ ໃນວັນຂອບຄຸນພະເຈົ້າ ແລະໃນຕອນເຊົ້າຂອງວັນພະຫັດມື້ນີ້ ທີ່ນະຄອນນິວຢອກກໍຈະມີການເດີນສວນສະໜາມຢ່າງຄຶກຄື້ນຂະໜາດໃຫຍ່ຈັດຂຶ້ນໂດຍບໍຣິສັດສັບພະສິນຄ້າ ເມຊີ້ ເປັນປະຈຳທຸກໆປີ.
ໃນຄໍ່າຄືນຂອງວັນຂອບໃຈພະເຈົ້ານີ້ ວີໂອເອ ໄດ້ຖືໂອກາດສໍາພາດ ບັນດາສະຕີອາເມ ຣິກັນເຊື້ອສາຍລາວ ຜູ້ກຳກັບນຳການຄົວຢູ່ຄົວກີນ ສະແດງຝີມືໃຫ້ຄອບຄົວ ຍາດຕິພີ່ ນ້ອງ ແລະເພື່ອນຝູງໄດ້ຮັບປະທານກັນ.
ສະຕີຄົນທຳອິດໄດ້ແກ່ ຍານາງແກ້ວວຽງໄຊ ທໍາວົງສາ ປະທານສະມາຄົມຮ່ວມມິດ ທີ່ເຂດນະຄອນຫລວງວໍຊິງຕັນ ຊຶ່ງໄດ້ກ່າວເຖິງຄວາມຣູ້ສຶກຂອງການສະຫລອງບຸນ Thanksgiving ນີ້ວ່າ :
ປະຊາຄົມ ອາເມຣິກັນ ໄດ້ສະຫລອງບຸນ Thanksgiving ນີ້ມາເປັນເວລາຫຼາຍກວ່າ 200 ປີແລ້ວ. ແຕ່ວ່າ ບຸນດັ່ງກ່າວນີ້ບໍ່ໄດ້ປະກາດສະຫລອງ ຢ່າງເປັນທາງການຈົນເຖິງປີ 1863 ໃນລະດູໃບໄມ້ຫລົ່ນ ໃນວັນພະຫັດ ອາທິດ ທີສີ່ ເດືອນພະຈິກ. ເວລານັ້ນ ປະເທດຊາດ ແມ່ນຕົກຢູ່ພາຍໃຕ້ ການປົກຄອງຂອງ ປະທານາທິບໍດີ Abraham Lincoln ປະທານາ ທິບໍດີ ຄົນທີ 16 ຂອງ ສະຫະລັດ ອາເມຣິກາ.
ກໍາເໜີດການສະຫລອງບຸນວັນຂອບຄຸນພະເຈົ້າ ໄດ້ເລີ້ມມີມາແຕ່ປີ 1621 ເພາະວ່າເວລານັ້ນ ໄດ້ມີນັກສະແຫວງບຸນຊາວອັງກິດ 102 ຄົນ ຊຶ່ງເປັນກຸ່ມທໍາອິດ ທີ່ພາກັນເດີນທາງມາເຖິງແຜ່ນດິນໃໝ່ ເພື່ອສະແຫວງຫາສິດທິ ໃນການນັບຖືບູຊາ. ເຂົາເຈົ້າພາກັນເດີນທາງໂດຍທາງເຮືອ ທີ່ມີຊື່ວ່າ Mayflower ໃຊ້ເວລາຢູ່ 66 ມື້ຈຶ່ງໄດ້ຕົກມາເຖິງແຜ່ນດິນໃໝ່ ຊຶ່ງເຂດນັ້ນເອີ້ນກັນໃນປັດຈຸບັນນີ້ວ່າ New England.
ຊາວອັງກິດເຫລົ່ານີ້ ໄດ້ມາຕັ້ງບ້ານໃໝ່ທີ່ຮູ້ກັນວ່າ Plymouth ຢູ່ໃນລັດ Massachu- setts ທາງພາກຕາເວັນອອກສຽງເໜືອຂອງ ສະຫະລັດ ອາເມຣິກາ ນີ້ເອງ. ຈາກການ ລ່ອງເຮືອ ຂ້າມມະຫາສະມຸດ ອັນກວ້າງໃຫຍ່ ເວລາເຂົາເຈົ້າ ເດີນທາງມານັ້ນ ເຂົາເຈົ້າ ໄດ້ປະສົບກັບຄວາມອິດເໝື່ອຍ ອ່ອນເພຍ ໂຫຍຫີວ ແລະປະເຊີນກັບອາກາດໜາວ. ຈໍາ ນວນນຶ່ງໄດ້ເກີດເຈັບປ່ວຍຍ້ອນຂາດອາຫານ ເປັນພະຍາດ ແລະໄດ້ລົ້ມຫາຍຕາຍໄປເກືອບເຄິ່ງນຶ່ງ.
ຊາວອິນເດຍແດງ ທີ່ເປັນຊົນເຜົ່າທ້ອງຖິ່ນ ໄດ້ເຫັນຄວາມຍາກລໍາບາກ ຂອງຊາວອັງກິດເຫລົ່ານີ້ ທີ່ບໍ່ລຶ້ງເຄີຍກັບສິ່ງແວດລ້ອມໃໝ່ ຈຶ່ງໄດ້ພາກັນຊ່ວຍສິດສອນນໍາພາຊາວອັງກິດເຫຼົ່ານັ້ນ ໃຫ້ຮູ້ຈັກວິທີປູກໝາກສາລີ ຫາປາຢູ່ຕາມແມ່ນໍ້າລໍາເຊ ໂຮ່ເນື້ອ ໂດຍສະເພາະຢ່າງຍິ່ງ ແມ່ນການຈັບໄກ່ງວງປ່າມາເປັນອາຫານ ແລະຫລີກລ້ຽງພືດຕ່າງໆທີ່ເປັນພິດ.
ເມື່ອໄດ້ພົ້ນຈາກຄວາມໂຫຍຫີວ ໃນປີຕໍ່ມາ ຊາວອັງກິດພວກນັ້ນ ຈຶ່ງໄດ້ພາກັນສະແດງຄວາມຮູ້ບຸນຄຸນ ຕໍ່ຊາວອິນເດຍແດງດ່ັງກ່າວ ໂດຍເຊື້ອເຊີນເຂົາເຈົ້າມາຮ່ວມຮັບປະທານອາຫານຈາກຜົນປູກທີ່ຊາວອິນເດຍແດງ ໄດ້ສິດສອນໃຫ້ເຂົາເຈົ້າໄດ້ພົ້ນຈາກຄວາມອຶດຢາກ ແລະລົ້ມຫາຍຕາຍໄປນັ້ນ.
ບັດນີ້ ຂ້າພະເຈົ້າຢາກຂໍແນະນຳໃຫ້ທ່ານຮູ້ຈັກກັບ ຍານາງນ້ອຍ Truax ທີ່ກຳລັງຊຸມແຊວກັບບັນດາສະມາຊິກຄອບຄົວ ແລະເພື່ອນຝູງຢູ່ໃນປ່າ ຊຶ່ງເປັນເຮືອນພັກຜ່ອນຢ່ອນອາລົມທີ່ຮ້ອງວ່າ cabin. ສະຖານທີ່ແຫ່ງນີ້ ໄກຈາກນະຄອນຫລວງວຊິງຕັນ ອອກໄປທາງທິດຕາເວັນຕົກຕັ້ງຢູ່ຕີນພູ Shenandoah ຊຶ່ງເປັນປ່າສະຫງວນແຫ່ງຊາດ ທີ່ງຽບສະຫງົບດີ. ຍາ ນາງນ້ອຍໄດ້ໂອ້ລົມກັບ ວີໂອເອ ກ່ຽວກັບການສະຫລອງບຸນ Thanksgiving ຄັ້ງນີ້ວ່າ :
ມື້ນີ້ເປັນວັນພັກລັດຖະການທົ່ວປະເທດ ຮ້ານຄ້າຕ່າງໆພາກັນປິດ ຖະໜົນຫົນທາງງຽບສະຫງັດ ຢູ່ຕາມບ້ານເຮືອນຕ່າງໆ ບໍ່ວ່າຄົນຈະມີພື້ນຖານສາສະໜາ ແລະຮີດຄອງປະເພນີ ທີ່ມາຈາກໃສກໍຕາມ ບັນດາສະມາຊິກຄອບຄົວພ້ອມດ້ວຍ ຍາດຕິພີ່ນ້ອງ ໝູ່ເພື່ອນທີ່ຢູ່ໃກ້ ແລະໄກໄດ້ພາກັນເດີນທາງມາເຕົ້າໂຮມພົບພໍ້ ຮັບປະທານອາຫານ ແລະຖາມ ຂ່າວຄາວກັນຢ່າງຄຶກຄື້ນ.
