ທ່ານຜູ້ຟັງທັງຫຼາຍ ໃນລາຍການຊີວິດຊາວລາວ ສຳລັບວັນ
ພະຫັດມື້ນີ້ ເຮົາຈະພາທ່ານໄປພົບກັບ ທ່ານສຸທັດ ສີພົມ ລູກ
ບ້ານຫລານເມືອງຂອງ ເມືອງໂຂງ ເຂດສີ່ພັນດອນ ແຂວງຈຳ
ປາສັກ ຕັ້ງຢູ່ພາກໃຕ້ສຸດຂອງ ປະເທດລາວ. ທ່ານສຸທັດ ໄດ້
ບວດເປັນຈົວ ເດີນທາງເຂົ້າມາສືກສາຝ່າຍທຳ ແລະຝ່າຍທຸ
ລະກິດ ທີ່ບາງກອກ ປະເທດໄທ ຈົນສຳເລັດ. ຫລັງຈາກນັ້ນ
ຜູ້ກ່ຽວກໍໄດ້ ສິກອອກມາປະກອບອາຊີບ ສາລະພັດຢ່າງ ໃນ
ທີ່ສຸດກໍໄດ້ສ້າງທຸລະກິດຂອງຕົນເອງ ຈົນເປັນທີ່ສຳເລັດ ຢູ່
ໃນບາງກອກ ປະເທດໄທ. ສ່ວນຄວາມເປັນມາ ຂອງທ່ານ
ສຸທັດ ເປັນຢ່າງໃດນັ້ນ ກິ່ງສະຫວັນຈະນຳມາສະເໜີທ່ານໃນ
ອັນດັບຕໍ່ໄປ.
ທ່ານຜູ້ຟັງທີ່ເຄົາລົບ ພົບກັນອີກຕາມນັດໝາຍ ກັບລາຍການຊີວິດຊາວລາວ. ມື້ນີ້ ຂ້າພະ
ເຈົ້າ ຈະຂໍແນະນຳໃຫ້ທ່ານຮູ້ຈັກກັບ ທ່ານສຸທັດ ສີພົມ ເຊື້ອສາຍລາວ ເຈົ້າຂອງຮ້ານທຸລະ
ກິດ online ຂາຍເຄຶ່ອງບູຊາສັງຄະພັນ ຫລືເຄື່ອງຂອງສັກກາຣະບູຊາ ຢູ່ໃນ ນະຄອນ
ຫລວງບາງກອກ ປະເທດໄທ. ແຕ່ກ່ອນ ທ່ານສຸທັດ ຈະໄດ້ປະສົບກັບຜົນສຳເລັດນັ້ນ ຊີ
ວິດຂອງ ທ່ານສຸທັດ ໄດ້ຜ່ານກັບຄວາມທຸກຍາກລຳບາກ ຜະຈົນໄພ ມີມານະອົດທົນ ຕັ້ງ
ອົກຕັ້ງໃຈ ສະແຫວງຫາການສຶກສາຊັ້ນສູງ ອັນເປັນເປົ້າໝາຍສູ່ການດຳລົງຊີວິດຢ່າງ
ປະສົບຜົນສຳເລັດ ຢູ່ໃນ ນະຄອນຫລວງບາງກອກ ປະເທດໄທ.
ໃນລະຍະທີ່ຜ່ານມາ ຫຸກໆຄັ້ງທີ່ເຮົາໄດ້ຍິນຂ່າວກ່ຽວກັບວ່າຄົນລາວ ຂ້າມໄປຫາຢູ່ຫາກິນ
ຢູ່ໃນປະເທດໄທນັ້ນ ເຮົາມັກຈະຍິນຂ່າວທີ່ບໍ່ເປັນມົງຄຸນ ເຊັ່ນວ່າລັກລອບເຂົ້າເມືອງຜິດ
ກົດໝາຍ ຍິງສາວລາວຖືກຫລອກລໍ້ໃຫ້ຄ້າປະເວນີ ແລະຜູ້ຊາຍພາກັນຫາຮັບຈ້າງເປັນ ກຳມະກອນ ຢູ່ຕາມຮ້ານຄ້າ ສະຖານທີ່ຕ່າງໆ ໃນປະເທດໄທແລະ ສິ່ງທີ່ໜ້າເວດທະນາ
ແລະເປັນໂສກນາດຕະກຳທີ່ສຸດກໍຄື ການຖືກຄາດຕະກໍາ ແລະ ເກີດເຫດຮ້າຍຕ່າງໆເຖິງ
ແກ່ຊີວິດ.
ແຕ່ສຳລັບມື້ນີ້ ເຮົາຈະພາທ່ານຫັນມາເບິ່ງຊີວິດໃນທາງບວກຈັກບາດ. ໂຕຢ່າງອັນນີ້ກໍ
ຄືຂອງ ທ່ານສຸທັດ ສີພົມ ເຊື້ອສາຍລາວ ທີ່ໄດ້ຜະຈົນໄພເຂົ້າມາຢູ່ປະເທດໄທໃນນາມ
ນັກບວດ ສຳເລັດການສຶກສາຝ່າຍທຳ ແລະຝ່າຍທຸລະກິດ ແລະໄດ້ສິກອອກມາປະກອບ
ວິຊາອາຊີບ ຢ່າງເປັນຜົນສຳເລັດໃນ ນະຄອນຫລວງບາງກອກ. ຫົນທາງອັນຍາວນານ
ຄົດລ້ຽວ ແລະຜະຈົນໄພຂອງ ທ່ານສຸທັດ ສີພົມ ລູກບ້ານຫລານເມືອງ ດອນທໍຣະທີ ນຶ່ງ
ໃນຈຳນວນໝູ່ເກາະ ສີ່ພັນດອນ ເປັນມາດັ່ງນີ້.
ທ່ານສຸທັດ ສີພົມ ເກີດຢູ່ດອນທໍຣະທີ ຕິດກັບຊາຍແດນກຳປູເຈຍ ແຂວງຈຳປາສັກ ພາກ
ໃຕ້ສຸດຂອງ ປະເທດລາວ. ເຖິງແມ່ນວ່າປັດຈຸບັນນີ້ ເຮົາຕົກຢູ່ໃນ ສັດຕະວັດທີ່ 21 ທີ່ເຕັມ
ໄປດ້ວຍຄວາມຈະເລີນຮຸ່ງເຮຶອງດ້ານເທັກໂນໂລຈີ ແລະລະດັບການເປັນຢູ່ສູງຂຶ້ນແລ້ວກໍ
ຕາມ ແຕ່ວ່າຊີວິດການເປັນຢູ່ຂອງປະຊາກອນລາວ ໃນເກາະດອນ ສີ່ພັນດອນ ຍັງບໍ່ມີ
ຫຍັງປ່ຽນແປງພໍທໍ່ໃດ ແລະຍັງສືບຕໍ່ການດຳລົງຊີວິດແບບທີ່ໄດ້ປະຕິບັດກັນມາເປັນເວ
ລາຫລາຍຮ້ອບປີນັ້ນ. ດອນທໍຣະທີ ແມ່ນນຶ່ງໃນຈຳນວນບັນດາໝູ່ເກາະ ສີ່ພັນດອນ ມີ
ຢູ່ປະມານຮ້ອຍກວ່າຫລັງຄາເຮືອນ ສອງຮ້ອຍກວ່າຄອບຄົວ ອາໄສໃຊ້ແມ່ນຳ້ຂອງ ເປັນ
ນຳ້ອາບ ນຳ້ໃຊ້ຢູ່ກິນທຸກຢ່າງ ບໍ່ມີໄຟຟ້າໃຊ້ ຍັງຕ້ອງໄດ້ໃຊ້ຕະກຽງ. ຊາວເກາະດອນ
ທໍຣະທີ ພາກັນປູກຝັງເຮັດຮົ້ວສວນ ໂດຍສະເພາະຫາປາເປັນສ່ວນໃຫຍ່. ດອນທໍຣະທີ
ມີໂຮງຮຽນປະຖົມ ມີວັດວາອາຮາມ ການຄົມມະນາຄົມຫາກັນ ຕ້ອງໄດ້ອາໄສເຮືອພາຍ
ແລະເຮືອຈັກ.
ທ່ານສຸທັດ ສີພົມ ລູກຊາຍຜູ້ທີ່ຫົກຂອງອ້າຍເອື້ອຍນ້ອງທັງໝົດເກົ້າຄົນ ຫລັງຈາກຮຽນ
ຈົບຊັ້ນປະຖົມແລ້ວ ໄດ້ເຂົ້າບວດເປັນຈົວ ເວລານັ້ນມີອາຍຸໄດ້ 12 ປີ. ເນື່ອງຈາກວ່າ ພໍ່
ແມ່ເປັນຊາວໄຮ່ຊາວນາ ເພາະສະນັ້ນ ເປັນທາງອອກທາງດຽວທີ່ຈະໃຫ້ລູກມີໂອກາດ
ໄດ້ຮຳ່ຮຽນຕໍ່ກໍຄື ເຂົ້າບວດຢູ່ໃນວັດ. ທ່ານສຸທັດ ໄດ້ກ່າວຕໍ່ ວີໂອເອ ຕອນຕົ້ນໆຂອງ
ຊີວິດນີ້ວ່າ :
ໃນຂະນະທີ່ ອ້າຍຈົວນ້ອຍສຸທັດ ບວດຢູ່ໃນວັດນັ້ນ ລາວໄດ້ມີໂອກາດຕິດຕາມຄູບາອາ
ຈານ ໄປທ່ຽວອຸບົນຣາດຊະທານີ ປະເທດໄທ ຈົວນ້ອຍສຸທັດ ໄດ້ໄປ ເຫັນຄວາມຈະເລີນ
ຮຸ່ງເຮືອງຂອງ ປະເທດໄທ ແລະຍັງເປັນທີ່ຮັກຫອມຈາກຄູບາອາຈານ ທ່ານສຸທັດ ໄດ້
ເລົ່າຊີວິດບັ້ນນີ້ຕໍ່ໄປອີກວ່າ :
ທ່ານສຸທັດ ໄດ້ບວດມາແຕ່ນ້ອຍ ເພື່ອສະແຫວງຫາການສຶກສາຮຳ່ຮຽນອັນເປັນເປົ້າ
ໝາຍ ທີ່ໄດ້ຕັ້ງເອົາໄວ້ ບັດນີ້ໄດ້ສຳເລັດຝ່າຍທຳ ມະຫາປະລຽນ ຝ່າຍສັນສະກຣິດ ແລະ
ຝ່າຍວິຊາອາຊີບ ຊັ້ນສູງທາງໂລກ. ບັດນີ້ ທ່ານສຸທັດ ສິກອອກມາ ເພື່ອປະກອບວິຊາອາ
ຊີບເປັນຄະລືຫັດ ຫລືຄົນທຳມະດາ ທ່ານໄດ້ເລົ່າຊີວິດພະຈົນໄພ ຂອງການຊອກວຽກເພື່ອທຳມາຫາກິນຢູ່ໃນນະຄອນຫລວງ ບາງກອກດັ່ງນີ້ :
ດ້ວຍຄວາມມີມານະອົດທົນ ຊື່ສັດ ຖະໜຸຖະໜອມ ມີພອນສະຫວັນ ແລະສະເນ່ ໃນການ
ປາກເວົ້າ. ບັດນີ້ ທ່ານສຸທັດ ຕ້ອງໄດ້ຕັດສິນໃຈໃນຊີວິດ ບັ້ນສຳຄັນອີກບັ້ນນຶ່ງ ທີ່ບໍ່ສາ
ມາດຫລຽວເຫັນວ່າ ອານາຄົດຈະເປັນຢ່າງໃດ ທ່ານສຸທັດ ໄດ້ກ່າວດັ່ງນີ້.
ກະລຸນາຕິດຕາມເບິ່ງຮູບພາບ ແລະການສຳພາດຈາກ ໂທລະທັດ ຊ່ອງ 3 ປະເທດໄທ ໄດ້ຢູ່ທີ່ເວັບໄຊລ ຂ້າງລຸ່ມນີ້ :
http://www.kidbuak.com/
http://www.buchasangkapan.com
ວີໂອເອ ຂໍສະແດງຄວາມຂອບໃຈ ທີ່ທ່ານສຸທັດ ສີພົມ ທີ່ໄດ້ແບ່ງປັນປະສົບການດ້ານ
ຊີວິດ ໃຫ້ແກ່່ທ່ານຜູ້ຟັງຂອງເຮົາໄດ້ຮູ້ໄດ້ຮຽນນຳ ແລະຂໍຊົມເຊີຍກັບຜົນສຳເລັດຂອງ
ທ່ານ. ກະລຸນາຕິດຕາມເບິ່ງ ວິດີໂອ ຮູບພາບ ແລະການສຳພາດທັງໝົດໄດ້ທີ່ໜ້າເວັບ
ໄຊຍ lao.voanews.com
