ລິ້ງ ສຳຫລັບເຂົ້າຫາ

ວີໂອເອ ລົງນາມ ກັບມຽນມາ ເພື່ອອອກອາກາດ ລາຍການສອນ ພາສາອັງກິດ

  • ທອງປານ ເທບວົງສາ

ຜູ້​ອໍານວຍ​ການ VOA ທ່ານ David Ensor (ຂວາ) ກັບ​ ປະທານສະພາ​ມຽນມາ ທ່ານ Thura Shwe Mann (ກາງ) ແລະຫົວໜ້າວີໂອເອພະແນກພາສາມຽນມາ ທ່ານ Than Lwin Htun (ຊ້າຍ), ທີ່ນະຄອນຫລວງເນປີດໍ, ວັນທີ 4 ມີຖຸນາ 2012.

ທ່ານ David Ensor ຜູ້​ອໍາ​ນວຍ​ການ​ວີ​ໂອ​ເອ ​ໄດ້​ເຊັນ​ຂໍ້​ຕົກລົງ​ສະບັບ​ນຶ່ງ ກັບ​ມຽນມາຊຶ່ງພາຍ​ໃຕ້​ຂໍ້​ຕົກລົງ​ສະບັບ​ນີ້​ສະຖາ​ນີວິທະຍຸ​ຂອງ​ທາງ​ການມຽນ ມາ​ມີ​ແຜນການ​ຈະ​ເລິ່ມອອກອາກາດ​ລາຍການ​ສອນ​ພາສາ​ອັງ​ກິດ​ສັ້ນໆ ທີ່​ຜະລິດ​ໂດຍ​ວີ​ໂອ​ເອ ນັ້ນ.

ທ່ານ Endor ​ໄດ້​ປະກາດ​ໃຫ້​ຊາບ​ ກ່ຽວ​ກັບຂໍ້​ຕົກລົງ​ດັ່ງກ່າວ ​ເມື່ອ​ວັນ​ອັງ​ຄານວານ​ນີ້ຈາກ​ເມືອງຫຼວງການ​ປົກຄອງ​ເນ​ປິ​ດໍຂອງ​ມຽນມາ ບ່ອນ​ທີ່​ທ່ານ ​ໄດ້​ພົບ​ປະກັນຫຼາຍໆ​ບັ້ນ​ ກັບ​ບັນດາ​ເຈົ້າໜ້າ​ທີ່​ອາວຸ​ໂສຂອງ​ລັດຖະບານ​ຊຸດ​ໃໝ່​ ຊຶ່ງ​ເປັນ​ລັດຖະບານພົນລະ​ເຮືອນພຽງ​ແຕ່
​ໃນ​ນາມ​ນັ້ນ. ທ່ານ Ensor ກ່າວ​ໃນຕອນ​ນຶ່ງ​ວ່າ:

“ນອກ​ນີ້​ແລ້ວ ບັນດາ​ເຈົ້າໜ້າ​ທີ່ມຽນມາ ຍັງ​ມີ​ຄວາມ​ເປັນ​ໄປ​ໄດ້​ ທີ່​ຈະໃຊ້ລາຍ​ການໂທລະພາບ​
ບາງ​ຢ່າງ ​ສໍາລັບ​ສອນ​ພາສາອັງກິດນໍາ.”

ທ່ານ Ensor ຍັງ​ກ່າວ​ອີກ​ວ່າ ທ່ານ ກຽວ ຊານ ລັດຖະມົນຕີ​ກະຊວງ​ຖະແຫຼງຂ່າວມຽນມາ​ຍັງ​ໄດ້​ສະ​ເໜີ​ການ​ສະໜັບສະໜຸນ​ຂອງ​ທ່ານ ຕໍ່ການອອກ​ວີ​ຊ່າ ທີ່​ເຂົ້າອອກ​ໄດ້​ຫຼາຍໆ​ຄັ້ງ ​ໃຫ້​ແກ່​ຜູ້​ສື່​ຂ່າວ​ຄົນ​ນຶ່ງຫຼືສອງ​ຄົນ ​ຈາກວີ​ໂອ​ເອ ພະ​ແນ​ກພາສາ​ມຽນມາ ​ເພື່ອອະນຸຍາດ​ໃຫ້​ພວກ​ເຂົາ
​ເ​ຈົ້າ​ ເຂົ້າ​ໄປ​ປະຕິບັດ​ງານ ​ໃນ​ມຽນມາ​ຊົ່ວໄ​ລຍະ​ໃດ​ນຶ່ງ​ໄດ້. ທ່ານ Ensor ອະທິບາຍ​ວ່າ ການ​ໃຫ້​ວີຊ່າທີ່​ວ່າ​ນີ້ ​ເປັນ​ບາດກ້າວ​ອັນທໍາ​ອິດ ໃນ​ຂັ້ນຕອນທີ່ອາດ​ເຮັດ​ໃຫ້​ວິ​ທະຍຸ​ວີ​ໂອ​ເອຂອງ​ສະຫະລັດ ເປີດ​ສໍານັກງານ​ຂ່າວ​ຂອງ​ຕົນ ​ຢູ່​ໃນ​ປະ​ເທດ​ດັ່ງ ກ່າວ.

ການ​ຢ້ຽມ​ຢາມ​ຂອງ​ທ່ານ Ensor ຄັ້ງ​ນີ້​ເປັນ​ພາກສ່ວນນຶ່ງຂອງ​ການ​ລິ​ເລີ່​ມທາງ​ດ້ານການ​ທູດ ​ໃນຂອບ​ເຂດທີ່ກວ້າງຂວາງ ​ແນ​ໃສ່ເພື່ອ​ເປີດ​ປະ​ເທດ​ມຽນມາໃຫ້​ແກ່ປະ​ເທດ​ຕາ​ເວັນ​ຕົກ ຫຼັງ ຈາກການ​ປົກຄອງ​ໂດຍ​ຝ່າຍ​ທະຫານ​ຢ່າງເຄັ່ງ​ຄັດ​ມາ​ໄດ້ຫຼາຍສິບ​ປີແລ້ວນັ້ນ.

ລັດຖະບານ​ຊຸດ​ໃໝ່ຂອງ​ມຽນມາ ທີ່​ເຂົ້າມາ​ບໍລິຫານ​ປະ​ເທດ ​ເມື່ອ​ປີກາຍ​ນີ້ ​ໄດ້​ຢຸດເຊົາ​ກີດ​ກັນ​ເວັບ​ໄຊ້ຂ່າວ​ຂອງ​ວີ​ໂອ​ເອໃນ​ປີຜ່ານມາ ​ແຕ່​ວີ​ໂອ​ເອກໍ​ບໍ່​ເຄີຍໄດ້​ສົ່ງນັກ​ຂ່າວ​ໄປ​ປະ​ຈໍາ​ການ​ຢູ່​ໃນ​ມຽນມາ​ຢ່າງ​ເປັນ​ທາງ​ການ ​ເທື່ອ​ນັບ​ຕັ້ງ​ແຕ່​ມຽນມາ​ໄດ້​ຮັບ​ເອກະລາດ​ຈາກ​ອັງກິດ​ໃນ​ປີ 1948 ​ເປັນ​ຕົ້ນ​ມາ​.

XS
SM
MD
LG