ອົງການສະຫະປະຊາຊາດ ກ່າວວ່າ ຊາວອັຟການິສຖານ ຫຼາຍກວ່າ 400 ຄົນ ໄດ້ຖືກ
ສັງຫານ ຫຼື ໄດ້ຮັບບາດເຈັບ ໃນການໂຈມຕີຫຼາຍຄັ້ງ ໃນລະຫວ່າງ ການເລືອກຕັ້ງ
ສະມາຊິກສະພາ ເມື່ອເດືອນແລ້ວນີ້.
ໃນບົດລາຍງານສະບັບນຶ່ງ ທີ່ໄດ້ຖືກເຜີຍແຜ່ ໂດຍ ຄະນະທູດຊ່ວຍເຫຼືອ ຂອງອົງການ
ສະຫະປະຊາຊາດ ໃນອັຟການິສຖານ ຫຼື UNAMA ນັ້ນ ວ່າ 56 ຄົນ ໄດ້ຖືກສັງຫານ
ແລະ 379 ຄົນ ໄດ້ຮັບບາດເຈັບ ໃນວັນທີ 20 ຕຸລາ ຜ່ານມາ ຊຶ່ງເປັນວັນທຳອິດ ຂອງ
ການປ່ອນບັດອອກສຽງ ແລະ ໃນສອງສາມມື້ຕໍ່ມານັ້ນ ໃນເວລາທີ່ມີການເລື່ອນ ການ
ປ່ອນບັດ ອອກໄປ. ອົງການ UNAMA ກ່າວວ່າ ຈຳນວນຂອງຜູ້ລົ້ມຕາຍຫຼືບາດເຈັບ
ແມ່ນສູງກວ່າ ໃນການເລືອກຕັ້ງນີ້ ເມື່ອປຽບທຽບໃສ່ການເລືອກຕັ້ງ 4 ຄັ້ງກ່ອນໜ້ານີ້.
ບົດລາຍງານຂອງອົງການສະຫະປະຊາຊາດນີ້ ຍັງໄດ້ກ່າວອີກວ່າ ກຸ່ມຕາລີບານ ໄດ້
ປະຕິບັດການໂຈມຕີ ດ້ວຍການໃຊ້ພວກ ລູກຈະຫຼວດ ລະເບີດ ປືນຄົກ ແລະອຸປະກອນ
ວັດຖຸລະເບີດຜະລິດຂຶ້ນເອງ. ຄະນະກຳມະການນີ້ ໄດ້ກ່າວວ່າ ກຸ່ມຕາລີບານ ຍັງໄດ້ໃຊ້
ການການຂຸກຄາມ ແລະ ຂົ່ມຂູ່ ພວກມີສິດອອກສຽງທັງຫຼາຍ ກ່ອນໜ້າການເລືອກຕັ້ງ
ລວມທັງການລັກພາໂຕ ພົນລະເຮືອນໄປຫຼາຍຮ້ອຍຄົນນຳ.
ບັດເລືອກຕັ້ງທັງຫຼາຍ ຈາກການເລືອກຕັ້ງ ເມື່ອວັນທີ 20 ຕຸລາ ຜ່ານມານີ້ ກໍຍັງຖືກ ນັບຢູ່ໃນປັດຈຸບັນນີ້ ແລະ ຜົນຂອງການເລືອກຕັ້ງ ໃນເບື້ອງຕົ້ນ ແມ່ນຄາດກັນວ່າ
ຈະບໍ່ໄດ້ຖືກປະກາດອອກມາ ຈົນກວ່າທ້າຍເດືອນນີ້.
