ລິ້ງ ສຳຫລັບເຂົ້າຫາ

logo-print

ການ​ກໍ່​ສ້າງ​ສະ​ໜາມ​ບິນ ໃນ​ແຂວງ ຫົວ​ພັນ ທີ່​ລົງ​ທຶນ ແລະ ກໍ່​ສ້າງ​ໂດຍບໍ​ລິ​ສັດ ເອ​ກະ​ຊົນ ຫວຽດ​ນາມ ຄືບ​ໜ້າ​ແລ້ວ 60 ເປີ​ເຊັນ


ເຮືອ​ບິນ ATR ຂອງ​ສາຍ​ການ​ບິນ​ລາວ​ຢູ່​ສະ​ໜາມ​ບິນ​ສາ​ກົນ​ວັດ​ໄຕ, ນະ​ຄອນຫຼວງ ວຽງ​ຈັນ.

ການ​ກໍ່​ສ້າງ​ສະ​ໜາມ​ບິນ​ແຫ່ງ​ໃໝ່​ໃນ​ແຂວງ ຫົວ​ພັນ ທີ່​ລົງ​ທຶນ ແລະ ກໍ່​ສ້າງ​ໂດຍ​ວິ​ສາ​ຫະ​ກິດ​ເອ​ກະ​ຊົນ ຫວຽດ​ນາມ ຄືບ​ໜ້າ​ແລ້ວ 60 ເປີ​ເຊັນ ຂອງ​ແຜນ​ການ ແຕ່​ກໍ​ຍັງ​ບໍ່​ຊ​ັດ​ເຈນ​ວ່າ​ຈະ​ກໍ່​ສ້າງ​ແລ້ວ​ສຳ​ເລັດ​ເມື່ອ​ໃດ​ແທ້.


ທ່ານ ສ​ົມ​ບູນ ດາວ​ສະ​ຫວັນ ຫົວ​ໜ້າ​ກອງ​ສະ​ໜາມ​ບິນ ກ​ະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ​ຖະ​ແຫຼງວ່າ​ການ​ກໍ່​ສ້າງ​ສະ​ໜາມ​ບິນ​ແຫ່ງ​ໃໝ່​ກໍ​ຄື​ສະ​ໜາມ​ບິນ ໜອງ​ຄ້າງ ໃນ​ແຂວງ ຫົວ​ພັນ ແລະ ການ​ພັດ​ທະ​ນາ​ເພື່ອ​ຍົກ​ລະ​ດັບ​ສະ​ໜາມ​ບິນ​ ຫ້ວຍ​ຊາຍ ໃນ​ແຂ​ວງບໍ່​ແກ້ວ ນັ້ນ​ຍັງ​ສືບ​ຕໍ່​ດຳ​ເນີນ​ການ​ກໍ່​ສ້າງ​ໃນ​ປັດ​ຈຸ​ບັນ​ນີ້​ໂດຍ​ສະ​ໜາມ​ບິນ​ໜອງ​ຄ້າງ​ທີ່​ບໍ​ລິ​ສັດ ຫວາງ ອ່ານ ເຈຍ ລ່າຍ ຈາກ ຫວຽດ​ນາມ ເປັນ​ຜູ້​ລົງ​ທຶນ ແລະ ດຳ​ເນີນ​ການ​ກໍ່​ສ້າງ​ໃຫ້​ກ່ອນ​ໂດຍ​ລັດ​ຖະ​ບານ ຈະ​ຊຳ​ລະ​ເງິນ​ຕົ້ນ ແລະ ດອກ​ເບ້ຍ​ຄືນ​ໃຫ້​ໄລ​ຍະ​ຕໍ່​ໄປ​ນັ້ນ ມາ​ຮອດ​ປັດ​ຈຸ​ບັນ​ກໍ​ປາ​ກົດ​ວ່າ​ກໍ່​ສ້າງ​ໄດ້​ຄືບ​ໜ້າ​ແລ້ວ 60 ເປີ​ເຊັນ​ຂອງ​ແຜນ​ການ ສ່ວນ​ການ​ພັດ​ທະ​ນາ​ເພື່ອ​ຍົກ​ລະ​ດັບ​ສະ​ໜາມ​ບິນ ຫ້ວຍ​ຊາຍ ທີ່​ລົງ​ທຶນ​ໂດຍ​ລັດ​ຖະ​ບານ ລາວ ນັ້ນ ກໍ​ດຳ​ເນີນ​ໄປ​ຕາມ​ແຜນ​ການ​ທີ່​ວາງ​ໄວ້​ຢ່າງ​ຕັ້ງ​ໜ້າ ດັ່ງ​ທີ່​ທ່ານ ສົມ​ບູນ ໄດ້​ໃຫ້​ການ​ຢືນ​ຢັນ​ວ່າ

"ກ່ຽວ​ກັບ ສະ​ໜາມ​ບິນ​ພາຍ​ໃນ​ລັດ​ຖະ​ບານ​ກໍ​ໄດ້​ມີ​ໂຄງ​ການ​ໃຫຍ່​ໃນ​ການ​ກໍ່​ສ້າງ​ສະ​ໜາມ​ບິນ ໜອງ​ຄ້າງ ເພື່ອ​ປ່ຽນ​ແທນ​ສະ​ໜາມ​ບິນ ນາ​ທອງ ເພື່ອ​ໃຫ້​ເຮືອ​ບິນ​ລະ​ດັບ 70 ບ່ອນ​ນັ່ງ​ໄດ້​ລົງ​ແຂວງ ຫົວ​ພັນ ໂຄງ​ການ​ໄດ້​ມີ​ຄວາມ​ຄືບ​ໜ້າ​ເຖິງ 60 ເປີ​ເຊັນ​ແລ້ວ ອີກ​ໂຄງ​ການ​ທີ 2 ນີ້​ແມ່ນ​ການ​ປັບ​ປຸງ​ຂະ​ຫຍາຍ​ສະ​ໜາມ​ບິນ ຫ້ວຍ​ຊາຍ ໄລ​ຍະ​ຜ່ານ​ມາ​ນັ້ນ​ກໍ​ຮອງ​ຮັບ​ເຮືອ​ບິນ​ຂະ​ໜາດ 70 ບ່ອນ​ນັ່ງ​ຢູ່​ແລ້ວ ແຕ່​ມັນ​ບໍ່​ມີ​ຄວາມ​ປອດ​ໄພ​ໃນ​ການ​ຂຶ້ນ-ລົງ ເນື​່ອງ​ຈາກວ່າ​ທາງ​ແລ່ນ​ຂຶ້ນ-ລົງ​ຫັ້ນ​ມັນ​ນ້ອຍ ສະ​ນັ້ນ​ລັດ​ຖະ​ບານ​ໄດ້​ລົງ​ທຶນ​ຍົກ​ລະ​ດັບ​ໃຫ້​ໄດ້​ມາດ​ຕະ​ຖານ."

ທັງ​ນີ້​ການ​ພັດ​ທະ​ນາ​ເພື່ອ​ຍົກ​ລະ​ດັບ​ສະ​ໜາມ​ບິນ ຫ້ວຍ​ຊາຍ ທີ່​ເປັນ​ການ​ລົງ​ທຶນ​ໂດຍກອງ​ສະ​ໜາມ​ບິນ​ຂອງ ລາວ ເອງ​ນັ້ນ​ໄດ້​ຄືບ​ໜ້າ​ແລ້ວ​ເກີນກວ່າ 60 ເປີ​ເຊັນ​ຂອງ​ແຜນ​ການ ແລະ ມີ​ກຳ​ນົດ​ທີ່​ຈະ​ດຳ​ເນີນ​ງານ​ໃຫ້​ສຳ​ເລັດ​ສົມ​ບູນ​ໃນ​ທ້າຍ​ປີ 2020 ນີ້​ແຕ່​ສຳ​ລັບ​ສະ​ໜາມ​ບິນ ໜອງ​ຄ້າງ ນັ້ນ​ຍັງ​ບໍ່​ມີ​ຄວາມ​ຊັດ​ເຈນ​ວ່າ​ການ​ກໍ່​ສ້າງ​ຈະ​ແລ້ວ​ເມື່ອ​ໃດ​ແທ້ ເນື່ອງ​ຈາກ​ບໍ​ລິ​ສັດ ຫວຽດ​ນາມ ມີ​ບັນ​ຫາ​ດ້ານ​ເງິ​ນ​ທຶນ​ນັບ​ແຕ່​ປີ 2016 ເປັນ​ຕ​ົ້ນ​ມາ ກໍ​ຄືຫຼັງ​ຈາກ​ບໍ​ລິ​ສັດ ຫວາງ ອ່ານ ເຈຍ ລ່າຍ ໄດ້​ເລີ່ມ​ກໍ່​ສ້າງ​ສະ​ໜາມ​ບິນ ໜອງ​ຄ້າງ ໃນ​ປີ 2014 ກໍ​ໄດ້​ເກີດ​ບັນ​ຫາ​ຊັກ​ຊ້າ​ມາ​ແລ້ວກວ່າ 3 ປີເພາະ​ຕາ​ມ​ແຜນ​ການ​ໄດ້​ກຳ​ນົດ​ໃຫ້​ການ​ກໍ່​ສ້າງ​ຈະ​ຕ້ອງ​ແລ້ວ​ສຳ​ເລັດ ແລະ ເປີດ​ໃຊ້​ສະ​ໜາມ​ບິນ​ຢ່າງ​ເປັນ​ທາງ​ການ​ໃນ​ທ້າຍ​ປີ 2016 ນັ້ນ​ເອງ.

ນອກ​ຈາກນີ້​ບໍ​ລິ​ສັດ ຫວາງ ອ່ານ ເຈຍ ລ່າຍ ຍັງ​ໄດ້​ຂາຍ​ສຳ​ປະ​ທານ​ສວນ​ຢາງ​ພາ​ລາ​ທີ່​ມີ​ເນື້ອ​ທີ່ກວ້າງ​ກວ່າ 20,000 ເຮັກ​ຕາ ພ້ອມ​ດ້ວຍ​ໂຮງ​ງານ​ປຸງ​ແຕ່ງ​ນ້ຳ​ຕານ​ໃນ​ແຂວງ ອັດ​ຕະ​ປື ໃຫ້​ບໍ​ລິ​ສັດ​ເອ​ກະ​ຊົນ ຈີນ ເນື່ອງ​ຈາກ​ບໍ​ລິ​ສັດ​ປະ​ເຊີນ​ກັບ​ບັນ​ຫາ​ຂ​າດ​ທຶນ ແລະ ເປັນ​ໜີ້​ສິນ​ຢ່າງ​ໜັກ​ໜ່ວງ ອັນ​ເປັນ​ຜົນ​ຈາກ​ການ​ຕົກ​ຕ່ຳ​ຂອງ​ລາ​ຄາ​ຢາງ​ພາ​ລາ​ໃນ​ຕະຫຼາດ​ໂລກ​ທີ່ຫຼຸດ​ລົງ​ຈາກ 14,000 ກີບ​ຕໍ່​ກິ​ໂລກ​ຣາມ​ໃນ​ປີ 2013 ລົງ​ມາ​ເປັນ 5,000 ກີບ​ຕໍ່​ກິ​ໂລກ​ຣາມ ນັບ​ແຕ່​ປີ 2015 ເປັນ​ຕົ້ນ​ມາ​ຈົນ​ເຖິງ​ປັດ​ຈຸ​ບັນ​ນີ້.

ສ່ວນ​ບໍ​ລິ​ສັດ Earn and Young ທີ່​ຮັບ​ຜິດ​ຊອບ​ການກວດ​ສອບ​ບັນ​ຫາ​ໜີ້​ສິນ​ຂອງ​ບໍ​ລິ​ສັດ ຫວາງ ອ່ານ ເຈຍ ລ່າຍ ກໍ​ລາຍ​ງານ​ວ່າ ບໍ​ລິ​ສັດດັ່ງ​ກ່າວ​ມີ​ພາ​ລະ​ໜີ້​ສິນຫຼາຍກວ່າ 366 ລ້ານ​ໂດ​ລາ ທີ່​ຈະ​ຕ້ອງ​ຊຳ​ລະ​ຄືນ​ໃຫ້​ກັບ​ບັນ​ດາ​ທະ​ນາ​ຄານ​ໃນ ຫວຽດ​ນາມ ກັບ​ເປັນ​ໜີ​ກອງ​ທຶນ Temasek ຂອງ​ລັດ​ຖະ​ບານ ສິງ​ກະ​ໂປ ອີກ​ເຖິງ 50 ລ້ານ​ໂດ​ລາ ຈຶ່ງ​ຕ້ອງ​ຂາຍ​ກິດ​ຈະ​ການ​ເພື່ອ​ນຳ​ເອົາ​ເງິນ​ໄປ​ຊຳ​ລະ​ຄືນ​ໃຫ້​ກັບ​ເຈົ້າ​ໜີ້​ດັ່ງ​ກ່າວ.

ທັງ​ນີ້​ລັດ​ຖະ​ບານ​ ລາວ ໄດ້​ຕົກ​ລົງ​ໃນ​ສັນ​ຍາ​ລົງ​ທຶນ​ກໍ່​ສ້າງ​ສະ​ໜາມ​ບິນ​ໃໝ່ 2 ແຫ່ງຢູ່​ແຂວງ ຫົວ​ພັນ ແລະ ອັດ​ຕະ​ປື ເມື່ອ​ປີ 2013 ໂດຍ​ບໍ​ລິ​ສັດ ຫວາງ ອ່ານ ເຈຍ ລ່າຍ ໄດ້​ຕົກ​ລົງ​ເປັນ​ຝ່າຍ​ອອກ​ເງິນ​ທຶນ​ໃຫ້​ກ່ອນ​ທັງ 2 ແຫ່ງ​ໃນ​ມູນ​ຄ່າ​ລວມ 110 ລ້ານ​ໂດ​ລາ ແບ່ງ​ເປັນ 36.19 ລ້ານ​ໂດ​ລາ ແລະ 74 ລ້ານ​ໂດ​ລາ​ສຳ​ລັບ​ການ​ກໍ່​ສ້າງ​ສະ​ໜາມ​ບິນ​ຢູ່​ແຂວງ​ອັດ​ຕະ​ປື ແລະ ສະ​ໜາມ​ບິນ ໜອງ​ຄ້າງ ຢູ່​ແຂ​ວງ ຫົວ​ພັນ ທີ່​ແຂວງ​ອັດ​ຕະ​ປື ໄດ້​ກໍ່​ສ້າງ​ສຳ​ເລັດ ແລະ ເປີດ​ໃຊ້​ຢ່າງ​ເປັນ​ທາງ​ການ​ເມື່ອ​ເດືອນ​ພຶດ​ສະ​ພາ 2015 ຫາກ​ແຕ່​ກໍ​ຕ້ອງ​ປິດ​ການ​ນຳ​ໃຊ້​ນັບ​ແຕ່​ເດືອນ​ຕຸ​ລາ 2016 ເປັນ​ຕົ້ນ​ມາ​ເພາະ​ວ່າ​ຈຳ​ນວນ​ຜູ້​ໂດຍ​ສານ​ມີ​ໜ້ອຍ ຈຶ່ງບໍ່​ຄ​ຸ້ມ​ຄ່າ​ໃນ​ການ​ເປີດ​ຖ້ຽວ​ບິນ​ລະ​ຫວ່າງ​ນະ​ຄອນຫຼວງ ວຽງ​ຈັນ ກັບ ອັດ​ຕະ​ປື ນັ້ນ​ເອງ.

XS
SM
MD
LG