ທາງການຫວຽດນາມໄດ້ຕັ້ງຂໍ້ຫາທາງອາຍາ ຕໍ່ກັບຕັນແລະ
ນານຊ່າງປະຈໍາເຮືອທ່ອງທ່ຽວ ລໍາທີ່ເກີດອຸບັດເຫດຈົມນໍ້າ
ໃນອ່າວ Ha Long Bay ທີ່ມີທີວວະທັດທີ່ສວຍງາມ ຊຶ່ງ
ໄດ້ເຮັດໃຫ້ລູກເຮືອຄົນນຶ່ງແລະພວກນັກທ່ອງທ່ຽວຕ່າງປະ ເທດ 11 ຄົນເສຍຊີວິດໄປນັ້ນ.
ບັນດາເຈົ້າໜ້າທີ່ກ່າວໃນວັນຈັນມື້ນີ້ວ່າ ນາຍ Nguyen Van Minh ກັບຕັນເຮືອ ແລະນາຍ Do Van Trang ຫົວໜ້າວິສະວະກອນປະຈໍາເຮືອ ໄດ້ຖືກກ່າວຫາວ່າ ຝ່າຝືນກົດລະບຽບວ່າດ້ວຍຄວາມປອດໄພໃນການເດີນເຮືອ ແລະສາມາດປະເຊີນກັບການຖືກລົງໂທດຈໍາຄຸກຢ່າງຍາວນານໄດ້.
ເວລານີ້ ທາງການກໍາລັງພະຍາຍາມສອບສວນໃຫ້ຮູ້ວ່າ ແມ່ນຫຍັງພາໃຫ້ເຮືອຈົມນໍ້າໃນຄືນວັນພະຫັດແລ້ວນີ້ ໃນເວລາທີ່ເຮືອລໍານີ້ກໍາລັງຈອດທອດສະໝໍຢູ່ໃນອ່າວ ຂະນະທີ່ພວກຄົນໂດຍສານກໍາລັງນອນຫລັບຢູ່. ພວກທີ່ລອດຊີວິດກ່າວວ່າ ເຮືອໄດ້ຈົມນໍ້າລົງຢ່າງໄວ ຊຶ່ງເຮັດໃຫ້ພວກທີ່ໄດ້ຮັບເຄາະຮ້າຍທີ່ນອນຢູ່ຫ້ອງແຄບິນ ໃຕ້ດາດຟ້າເຮືອນັ້ນ ບໍ່ສາມາດຫລົບໜີອອກມາໄດ້.
ພວກທີ່ເສຍຊີວິດໄປນັ້ນ ມີຮວມທັງພວກນັກທ່ອງທ່ຽວ ຈາກສະຫະລັດ ອັງກິດ Sweden ຍີ່ປຸ່ນ ຝຣັ່ງ ແລະ Switzerland. ເຈົ້າໜ້າທີ່ຫວຽດນາມກ່າວວ່າ ມັນເປັນອຸບັດເຫດທີ່ຮ້າຍແຮງທີ່ສຸດໃນປະວັດສາດຂອງປະເທດ ທີ່ພົວພັນກັບພວກນັກທ່ອງທ່ຽວ.
