ຫວຽດນາມ ໄດ້ປະທ້ວງໃນສິ່ງທີ່ເຂົາເຈົ້າກ່າວວ່າ ເປັນການລ່ວງລ້ຳອຳນາດອະທິປະໄຕໂດຍ ຈີນ ຫຼັງຈາກ ປັກກິ່ງ ໄດ້ສົ່ງກຳປັ່ນໂຮງໝໍຂອງກອງທັບເຮືອເຂົ້າໄປໃນໝູ່ເກາະ ປາຣາແຊລ໌, ເຊິ່ງເປັນກຸ່ມຂອງໝູ່ເກາະປະກາລັງຂະໜາດນ້ອຍ ແລະ ໂງ່ນຫີນໃນທະເລຈີນໃຕ້ ທີ່ປັດຈຸບັນນີ້ ຖືກຄວບຄຸມໂດຍ ຈີນ ແຕ່ຖືກອ້າງເອົາໂດຍ ຫວຽດນາມ ແລະ ໄຕ້ຫວັນ.
ໂທລະພາບສູນກາງ ຈີນ ໄດ້ເປັນຜູ້ທຳອິດທີ່ລາຍງານຂ່າວດັ່ງກ່າວ ເມື່ອວັນທີ 21 ພຶດສະພາ ທີ່ຜ່ານມາ.
ທ່ານ ດວນ ແຄັກ ຫວຽດ, ຮອງໂຄງສົກກະຊວງການຕ່າງປະເທດ ຫວຽດນາມ, ໄດ້ກ່າວວ່າ ປະເທດຂອງທ່ານຄັດຄ້ານການມີໜ້າຂອງກຳປັ່ນທີ່ວ່ານັ້ນ. ທ່ານໄດ້ກ່າວເມື່ອວັນທີ 23 ພຶດສະພາ ໃນການຕອບຕໍ່ຄຳຖາມຈາກໜັງສືພິມ ເຕື່ອຍ ເຈ (Tuoi Tre) ກ່ຽວກັບ ກຳປັ່ນໂຮງໝໍ ຢວາຍ (Youai) ທີ່ຖືກສົ່ງໄປໝູ່ເກາະດັ່ງກ່າວ, ທີ່ຮູ້ຈັກກັນດັ່ງກັບ ຮວາງ ຊາ ໃນ ພາສາຫວຽດນາມ.
ທ່ານ ຫວຽດ ໄດ້ກ່າວຢ້ຳວ່າ “ຫວຽດນາມ ຄັດຄ້ານກິດຈະກຳໃດໆທີ່ລະເມີດອຳນາດອະທິປະໄຕຢູ່ໝູ່ເກາະ ຮວາງ ຊາ ຂອງ ຫວຽດນາມ ຢ່າງເດັດຂາດ.”
ກຳປັ່ນໂຮງໝໍ ຢວາຍ ແມ່ນຢູ່ພາຍໃຕ້ການບັນຊາຂອງກອງບັນຊາການພາກໃຕ້ຂອງກອງທັບປົກດປ່ອຍປະຊາຊົນ ຈີນ. ອີງຕາມລາຍງານສະບັບນຶ່ງຂອງໜັງສືພິມ Global Times, ທີ່ອ້າງເຖິງໂທລະພາບສູນກາງ ຈີນ ນັ້ນ, ກຳປັ່ນດັ່ງກ່າວໄດ້ເດີນທາງອ້ອມໝູ່ເກາະ ປາຣາແຊລ໌, ປົກຄຸມປະມານ 1,000 ກິໂລແມັດ, ແລະ ໄດ້ຢຸດຢູ່ບາງເກາະ ເພື່ອສະໜອງການບໍລິການດ້ານການແພດ ແລະ ການປິ່ນປົວໃຫ້ທະຫານ ຈີນ.
ຟໍຣັມສະແດງຄວາມຄິດເຫັນ