ທີ່ຫວຽດນາມ ໃນວັນອາທິດວານນີ້ປະຊາຊົນຢ່າງໜ້ອຍ 100 ຄົນໄດ້ທໍາການປະທ້ວງໃນ
ນະຄອນຫລວງຮາໂນ່ຍ ຕໍ່ຕ້ານການກ່າວອ້າງເອົາກໍາມະສິດເຂດນໍ້າແດນດິນແຫ່ງນຶ່ງຂອງ
ຈີນທີ່ທະເລຈີນໃຕ້ ອັນເປັນຄັ້ງຫລ້າສຸດໃນການປະທ້ວງຈີນຕິດຕໍ່ກັນມາຫລາຍຄັ້ງໃນໄລຍະ 2 ເດືອນຜ່ານມານີ້.
ພວກເຫັນເຫດການກ່າວວ່າ ຕໍາຫລວດໄດ້ອະນຸຍາດໃຫ້ພວກປະທ້ວງທີ່ໂບກທຸງເດີນຂະບວນໄປ ໃນຂະນະທີ່ພວກເຂົາເຈົ້າຖ່າຍຮູບວີດີໂອເອົາ ແລະຊີ້ບອກລົດລາໃຫ້ໄປທາງອື່ນ ເພື່ອ ປ່ອຍໃຫ້ການເດີນຂະບວນດໍາເນີນໄປໄດ້. ການເດີນຂະບວນປະທ້ວງເຊ່ນນີ້ແມ່ນບໍ່ສູ້ມີຂຶ້ນໃນ ປະເທດຜະເດັດການຫວຽດນາມ ບ່ອນທີ່ລັດຖະບານຫ້າມການສະແດງການຄັດຄ້ານຕໍ່ ລັດຖະບານຢ່າງເປີດເຜີຍແລະຕາມທໍາມະດາແລ້ວ ແມ່ນຈະລົງໂທດພວກທີ່ຝ່າຝືນ.
ຈີນອ້າງເອົາກໍາມະສິດເໜືອນ່ານນໍ້າທະເລຈີນໃຕ້ທັງໝົດ ຊຶ່ງກໍ່ໃຫ້ເກີດບັນຫາຂັດແຍ້ງກັນກັບຫວຽດນາມ ຟີລິບປິນ ມາເລເຊຍແລະບຣູໄນ ທີ່ຕ່າງກໍໄດ້ອ້າງເອົາກໍາມະສິດເໜືອນ່ານນໍ້າເລາະແຄມຝັ່ງທະເລຂອງຕົນ. ທັງລັດຖະບານກຸງຮາໂນຍແລະກຸງມານີລາອ້າງວ່າ ພວກເຮືອຂອງຈີນໄດ້ເຂົ້າແຊກແຊງໃນການບຸກເບີກຫາບໍ່ແກສທໍາມະຊາດແລະນໍ້າມັນໃນເຂດນ່ານນໍ້າທ່ີທັງສອງປະເທດນີ້ອ້າງວ່າ ເປັນເຂດເສດຖະກິດພິເສດຂອງຕົນນັ້ນ.
ນອກນັ້ນ ຂົງເຂດດັ່ງກ່າວຍັງເປັນເສ້ນທາງ ທີ່ມີການເດີນເຮືອຂອງພວກກໍາປັ່ນບັນທຸກສິນຄ້າຢ່າງອັດແອທີ່ສຸດຂອງໂລກເຊ່ນກັນ.
ບັນຫາຂັດແຍ້ງກັນໄດ້ຄອບງໍາລາຍການປະຊຸມປະຈໍາປີຂອງກຸ່ມອາຊ່ຽນ ໃນເດືອນແລ້ວນີ້ ທີ່ເກາະບາຫລີຂອງອິນໂດເນເຊຍນັ້ນ. ກຸ່ມອາຊ່ຽນແລະຈີນໄດ້ບັນລຸຂໍ້ຕົກລົງຂັ້ນຕົ້ນກັນ ກ່ຽວກັບຫລັກຊີ້ນໍາຊຸດນຶ່ງ ທີ່ໃນຂັ້ນສຸດທ້າຍນັ້ນ ອາດສາມາດນໍາພາໃຫ້ມີການຈັດຕັ້ງປະຕິບັດກົດການປະພຶດທາງທະເລນັ້ນໄດ້ ແຕ່ພວກນັກວິເຄາະເຫດການກ່າວວ່າ ເຂົາເຈົ້າບໍ່ຄາດວ່າຈະມີການຕົກລົງກັນໄດ້ ໃນອະນາຄົດອັນໃກ້ໆນີ້.
