ພວກລູກເຮືອຫວຽດນາມ 24 ຄົນ ໄດ້ກັບຄືນເມືອຮອດບ້ານຢ່າງປອດໄພແລ້ວ ຫລັງຈາກຖືກຈັບເປັນນັກໂທດຂອງພວກໂຈນທະເລໂຊມາເລຍ ເປັນເວລາ 8 ເດືອນ.
ບັນດາເຈົ້າໜ້າທີ່ແລະພວກນັກວິເຄາະເຫດການກ່າວວ່າ ກໍາປັ່ນບັນທຸກສິນຄ້າ MV Hoang Son Sun ພ້ອມດ້ວຍລູກເຮືອຖືກປ່ອຍໂຕ ໃນສັບປະດາຜ່ານມາ ຫລັງຈາກລັດວິສາຫະກິດ ຂົນສົ່ງທາງທະເລຂອງຫວຽດນາມບໍລິສັດນຶ່ງຈ່າຍຄ່າໄຖ່ໃຫ້ພວກໂຈນທະເລຫລາຍກວ່າ 2 ລ້ານໂດລາ. ພວກລູກເຮືອເຫລົ່ານີ້ໄດ້ຖືກສົ່ງກັບຄືນສູ່ປະເທດທາງເຮືອບິນ ແລະໄດ້ໄປຮອດນະຄອນຫລວງຮາໂນຍເມື່ອວັນສຸກຜ່ານມາ.
ແຫລ່ງຂ່າວຕ່າງໆຈາກພວກບໍລິສັດຂົນສົ່ງສິນຄ້າທາງເຮືອກ່າວວ່າພວກເຈົ້າຂອງກໍາປັ່ນຂົນສົ່ງລໍານີ້ໄດ້ຈ່າຍຄ່າໄຖ່ເປັນເງິນຈໍານວນຫລາຍລ້ານໂດລາເພື່ອຮັບປະກັນໃຫ້ມີການປ່ອຍກໍາປັ່ນຂົນສົ່ງສິນຄ້າທີ່ຕິດທຸງ Mongolia ຊຶ່ງໄດ້ຖືກໂຈນທະເລຍຶດເອົາໃນເດືອນມັງກອນຜ່ານມາ. ໃນວັນຈັນມື້ນີ້ ອົງການຂ່າວຝຣັ່ງ AFP ອ້າງຄໍາເວົ້າຂອງຮອງຜູ້ອໍານວຍການທົ່ວໄປຂອງບໍລິສັດວ່າ ຄ່າໄຖ່ແມ່ນ 2 ລ້ານ 6 ແສນໂດລາ. ເຊື່ອກັນວ່າກໍາປັ່ນລໍານີ້ກໍາລັງມຸ້ງນໜ້າໄປສູ່ທ່າເຮືອທີ່ປະເທດໂອມານ.
ພວກໂຈນທະເລທີ່ມີຖານປະຕິບັດງານຢູ່ໃນໂຊມາເລຍ ໄດ້ຍຶດເຮືອມາຫລາຍສິບລໍາໃນມະຫາສະມຸດອິນເດຍ ໂດຍຮຽກເອົາຄ່າໄຖ່ທີ່ລາຍງານຂ່າວເວົ້າວ່າ ມີຈໍານວນຫລາຍເຖິງ 5 ລ້ານໂດລາກໍມີ. ໂດຍທົ່ວໄປແລ້ວ ພວກເຈົ້າຂອງເຮືອບໍ່ຢາກເວົ້າເຖິງເລື້ອງລາຍລະອຽດກ່ຽວກັບຄ່າໄຖ່ນີ້ຫລາຍປານໃດ ເພາະຢ້ານວ່າມັນຈະສົ່ງເສີມໃຫ້ມີການຈີ້ປຸ້ນເຮືອຫລາຍຂຶ້ນ.
