ຫວຽດນາມ ໄດ້ສັ່ງໃຫ້ປ່ອຍພວກນັກໂທດຈໍານວນຫລາຍກວ່າ 10 ພັນຄົນໃຫ້ເປັນ
ອິດສະລະ ອັນເປັນພາກສ່ວນນຶ່ງຂອງການໃຫ້ອະໄພໂທດໃນວັນສະຫລອງວັນເອກ
ກະລາດປະຈໍາປີຂອງປະເທດ.
ລັດຖະບານກຸງຮາໂນຍໄດ້ລະບຸຊື່ນັກໂທດ 11 ຄົນໃນຈໍານວນພວກນັກໂທດທັງໝົດ
10 ພັນ 535 ຄົນທີ່ຈະຖືກປ່ອຍໂຕນັ້ນແມ່ນຊາວຕ່າງປະເທດ ທີ່ຖືກຕັດສິນວ່າມີຄວາມ
ຜິດຖານລະເມີດກົດໝາຍໃນດ້ານຄວາມເປັນລະບຽບຮຽບຮ້ອຍຂອງສັງຄົມແລະກ່າວ
ວ່າ ພວກນັກໂທດເຫລົ່ານີ້ແມ່ນຮວມທັງຄົນອະເມຣິກັນ ຄົນການາດາແລະຄົນອອສເຕຣ
ເລຍ. ທາງການຫວຽດນາມກ່າວວ່າ ພວກນັກໂທດ 5 ຄົນມີຄວາມຜິດຖານລະເມີດກົດ
ໝາຍວ່າດ້ວຍຄວາມປອດໄພແຫ່ງຊາດ ທີ່ບໍ່ໄດ້ບອກຢ່າງເຈາະຈົງໃຫ້ຊາບ.
ອົງການຂ່າວຝຣັ່ງອ້າງຄໍາເວົ້າຂອງທ່ານ Le Quy Vuong ຮອງລັດຖະມົນຕີວ່າດ້ວຍ
ຄວາມປອດໄພພາຍໃນ ທີ່ກ່າວວ່າຈໍານວນພວກນັກໂທດທັງໝົດຢູ່ໃນຄຸກຫວຽດນາມ
ແຫ່ງຕ່າງໆມີຫລາຍກວ່າ 1 ແສນຄົນ.
ຫວຽດນາມຊຶ່ງບໍ່ໂຍະຍານຜ່ອນຜັນໃຫ້ມີການຄັດຄ້ານຂອງປະຊາຊົນໃນຮູບແບບໃດ
ກໍຕາມໄດ້ຖືກຕໍາໜິຕິຕຽນຢ່າງກວ້າງຂວາງ ຢູ່ໃນປະເທດຕາເວັນຕົກ ຍ້ອນຄຸມຂັງພວກ
ຄັດຄ້ານທາງດ້ານການເມືອງແລະດ້ານສາສະໜານັ້ນ.
ວັນຊາດຫລືວັນເອກະລາດຂອງຫວຽດນາມແມ່ນວັນທີ 2 ກັນຍາຈະມານີ້ແລະເປັນວັນ
ຂີດໝາຍໃນປີ 1945 ເວລາມື້ລາງຜູ້ນໍາທ່ານໂຫຈິມິນ ໄດ້ປະກາດໃຫ້ຫວຽດນາມເປັນ
ປະເທດເອກະລາດຈາກການເປັນຫົວເມືອງຂຶ້ນຂອງຝຣັ່ງນັ້ນ.
