ຫວຽດນາມ ໄດ້ເປີດບໍລິການສາຍດ່ວນ ຫຼື Hotline ເປັນຄັ້ງ
ທຳອິດ ເພື່ອຊ່ອຍເຫຼືອພົນລະເມືອງຂອງຕົນ ທີ່ຢູ່ໃນຕ່າງ
ປະເທດ ແກ້ໄຂບັນ ຫາຕ່າງໆ ນັບແຕ່ການສູນເສຍໜັງສື
ຜ່ານແດນຕະຫລອດເຖິງ ຕົກເປັນເຫຍື່ອຂອງພວກຄ້າມະນຸດ.
ຮອງນາຍົກລັດຖະມົນຕີ Pham Binh Minh ໃນພິທີເປີດ
ບໍລິການໃໝ່ດັ່ງກ່າວ ໃນອາທິດນີ້ ໄດ້ກ່າວເນັ້ນວ່າ ສາຍດ່ວນ
ຈະຊ່ອຍໃຫ້ກະຊວງການຕ່າງປະເທດ ປັບປຸງປະສິດທິພາບ
ຂອງຕົນ ໃນການປົກປ້ອງພົນລະເມືອງຊາວຫວຽດນາມຢູ່ໃນ
ຕ່າງແດນ.
ທ່ານກ່າວຕື່ມວ່າ ພົນລະເມືອງຫວຽດນາມ ສາມາດໂທເຂົ້າສາຍດ່ວນນີ້ໄດ້ທຸກເວລາ
ໃນແຕ່ລະມື້ ຫຼືແຕ່ລະຄືນ ເພື່ອຂໍຄວາມຊ່ວຍເຫຼືອ ຖ້າພວກເຂົາເຈົ້າຖືກປຸ້ນຈີ້ ເຮັດໜັງສື
ຜ່ານແດນເສຍ ເກີດອຸບັດເຫດ ເຈັບປ່ວຍຢ່າງຮ້າຍແຮງ ຫຼືຕົກເປັນເຫຍື່ອ ຂອງພວກຄ້າ
ມະນຸດ.
ເຖິງຢ່າງໃດກໍດີ ການບໍລິການໃໝ່ນີ້ ບໍ່ແມ່ນຟຣີ. ພວກຜູ້ທີ່ໂທເຂົ້າມາຈະຕ້ອງໄດ້ຈ່າຍຄ່າໂທລະສັບເອງ ໃນອັດຕາພື້ນຖານຂອງນາໆຊາດ ໃນການໂທໄປປະເທດຫວຽດນາມ.
ທ່ານ Nguyen Manh Thang ເປັນຄົນຫວຽດນາມທີ່ຖືກເຊື້ອເຊີນໄປເຮັດວຽກຢູ່ຣັດເຊຍ ກ່າວຕໍ່ວີໂອເອ ພະແນກພາສາຫວຽດນາມວ່າ ລາວຈະລໍຖ້າ ແລະເບິ່ງວ່າ ການປະຕິບັດງານໃໝ່ນີ້ ແມ່ນເລື້ອງແທ້ຈິງ ບໍ່ ຫຼືເປັນພຽງເລ່ຫລ່ຽມໃນໂຄສະນາຊວນເຊື່ອເທົ່ານັ້ນ.
