ອົງການຂ່າວຂອງລັດຖະບານ ກ່າວວ່າ ໃນວັນພະຫັດມື້ນີ້ ສານຫວຽດນາມ ໄດ້ທໍາການຕັດສິນລົງໂທດນັກຂ່າວອິດສະຫຼະ ທີ່ມີຊື່ສຽງຄົນນຶ່ງ ໃຫ້ຈຳຄຸກເປັນເວລາ 30 ເດືອນ ໃນຂໍ້ຫາຂຽນຂໍ້ຄວາມວິຈານລັດຖະບານໂພສລົງຢູ່ໃນເຟສ໌ບຸກ.
ທ່ານ ຮຸຍ ດັກ (Huy Duc) ເຄີຍເຮັດວຽກໃຫ້ໜັງສືພິມທີ່ມີອິດທິພົນຫຼາຍແຫ່ງຂອງລັດຖະບານ ກ່ອນທີ່ຈະກາຍມາເປັນຜູ້ຂຽນທີ່ມີຊື່ສຽງຂອງຫວຽດນາມ ແລະເປີດບັນຊີ ເຟສ໌ບຸກ, ເຊິ່ງເປັນບ່ອນທີ່ ທ່ານ ຮຸຍ ໄດ້ປະນາມຕໍ່ບັນດາຜູ້ນຳພັກຄອມມູນິສຂອງປະເທດ ກ່ຽວກັບບັນຫາຕ່າງໆເຊັ່ນ ການສໍ້ລາດບັງຫຼວງ, ການຄວບຄຸມສື່ສັງຄົມ ແລະຄວາມສໍາພັນກັບ ຈີນ.
ສານຢູ່ນະຄອນຫຼວງຮາໂນ່ຍ ໄດ້ຕັດສິນລົງໂທດ ທ່ານ ຮຸຍ ທີ່ມີອາຍຸ 63 ປີ ໃນຂໍ້ຫາ “ລະເມີດສິດເສລີພາບປະຊາທິປະໄຕ ເພື່ອສົ່ງຜົນເສຍຫາຍຕໍ່ຜົນປະໂຫຍດຂອງລັດ,” ດ້ວຍການໂພສບົດຄວາມ 13 ບົດ ລົງໃນສື່ສັງຄົມເຟສ໌ບຸກ.
ການພິຈາລະນາຄະດີ ໃຊ້ເວລາພຽງສອງສາມຊົ່ວໂມງເທົ່ານັ້ນ.
“ບົດຄວາມເຫຼົ່ານີ້ ມີການສື່ສານລະຫວ່າງກັນ, ມີການສະແດງຄໍາເຫັນ, ແລະແບ່ງປັນກັນອອກໄປເປັນຈໍານວນຫຼາຍ, ເຊິ່ງກໍ່ໃຫ້ເກີດຜົນກະທົບທາງລົບຕໍ່ຄວາມເປັນລະບຽບຮຽບຮ້ອຍ ແລະຄວາມປອດໄພຂອງສັງຄົມ,” ອີງຕາມສື່ສັງຄົມຂອງລັດຖະບານ ທີ່ໄດ້ລະບຸຢູ່ໃນຄໍາຟ້ອງ.
ເປັນເວລາສັ້ນໆກ່ອນການຖືກຈັບກຸມໃນເດືອນມິຖຸນາຂອງປີກາຍນີ້, ທ່ານ ຮຸຍ ດັກ ເຊິ່ງເປັນນາມປາກກາຂອງນັກຂ່າວ ໄດ້ແນເປົ້າໝາຍໂຈມຕີໃສ່ຜູ້ນຳທີ່ມີອຳນາດສູງສຸດຂອງຫວຽດນາມ ຄື ທ່ານ ໂຕ ລໍາ (To Lam) ຜ່ານທາງອອນໄລນ໌, ເຊັ່ນດຽວກັບອະດີດຜູ້ດໍາລົງຕໍາແໜ່ງ ໃນກ່ອນໜ້ານັ້ນ ທ່ານ ຫງຽນ ຟູ ຈອງ (Nguyen Phu Trong).
ຍັງບໍ່ຈະແຈ້ງວ່າ ແມ່ນຫຍັງຄືຂໍ້ກ່າວຫາທີ່ກ່ຽວຂ້ອງກັບການໂພສເຫຼົ່ານີ້.
ຫວຽດນາມ ເປັນປະເທດທີ່ມີພັກການເມືອງດຽວ, ເປັນປະເທດທີ່ບໍ່ມີເສລີພາບດ້ານການຂ່າວ ແລະດໍາເນີນການປາບປາມຢ່າງຮຸນແຮງຕໍ່ບັນດາຜູ້ທີ່ມີຄວາມຄິດເຫັນແຕກຕ່າງ. ເປັນນຶ່ງໃນບັນດາປະເທດທີ່ກັກຂັງນັກຂ່າວຫຼາຍທີ່ສຸດຂອງໂລກ, ອີງຕາມອົງການນັກຂ່າວບໍ່ມີພົມແດນ ຫຼື RSF ເຊິ່ງເປັນກຸ່ມທີ່ລົນນະລົງເພື່ອເສລີພາບດ້ານການຂ່າວ.
ການດຳເນີນຄະດີຢູ່ນະຄອນຫຼວງຮາໂນ່ຍ ມີຂຶ້ນພຽງບໍ່ເທົ່າໃດເດືອນ ລຸນຫຼັງນັກຂຽນ ດວງ ແວນ ຖາຍ (Duong Van Thai), ເຊິ່ງມີຜູ້ຕິດຕາມຢູ່ໃນຢູທູບປະມານ 120,000 ຄົນ, ໂດຍທ່ານຈະຖ່າຍທອດສົດ ການວິຈານລັດຖະບານຢູ່ເລື້ອຍໆ, ຈຶ່ງໄດ້ຖືກຈຳຄຸກເປັນເວລາ 12 ປີ ໃນຂໍ້ຫາເຜີຍແຜ່ຂໍ້ມູນຕໍ່ຕ້ານລັດຖະບານ.
ຟໍຣັມສະແດງຄວາມຄິດເຫັນ