ລິ້ງ ສຳຫລັບເຂົ້າຫາ

ວັນພະຫັດ, ໒໐ ມິຖຸນາ ໒໐໒໔

ຫວຽດນາມ ປະເຊີນກັບຄວາມສ່ຽງ ຕໍ່ການຂັດຂວາງ ໃນການລົນນະລົງ ການສັກຢາວັກຊີນ


ທະຫານຂອງກອງທັບ ກວດກາເບິ່ງບັດປະຈໍາໂຕທີ່ຈຸດກວດປິດເມືອງ ໃນນະຄອນໂຮຈິມິນ, ປະເທດຫວຽດນາມ. ວັນຈັນ ທີ 23 ສິງຫາ, ປີ 2021.
ທະຫານຂອງກອງທັບ ກວດກາເບິ່ງບັດປະຈໍາໂຕທີ່ຈຸດກວດປິດເມືອງ ໃນນະຄອນໂຮຈິມິນ, ປະເທດຫວຽດນາມ. ວັນຈັນ ທີ 23 ສິງຫາ, ປີ 2021.

ຫວຽດນາມກໍາລັງປະເຊີນກັບຄວາມທ້າທາຍໃນການສັກຢາວັກຊີນກັນໂຄວິດ-19 ເນື່ອງຈາກຄວາມບໍ່ພຽງພໍຢູ່ໃນທົ່ວໂລກ ແລະຄວາມຮູ້ສຶກຕໍ່ຕ້ານຢາວັກຊີນຂອງຈີນ ໃນຂະນະທີ່ປະເທດຫວຽດນາມພະຍາຍາມຈະສ້າງພູມຄຸ້ມກັນໃນຫມູ່ປະຊາ ຊົນ ພາຍໃນທ້າຍໄຕມາດທຳອິດ ຂອງປີໜ້າ.

“ສັກ ຫລື ບໍ່ສັກ?” ຈາວ ຫງຽນ (Chau Nguyen) ຖາມນ້ອງສາວຂອງນາງຫລັງຈາກໃຊ້ເວລາໝົດຄືນໃນການຄິດວ່າຄວນຈະສັກຢາວັກຊີນ ແລະຄວນຈະຮັບຢາວັກຊີນຊິໂນຟາມຂອງຈີນ ຫລືບໍ່? ໃນຂະນະທີ່ລາວບໍ່ແມ່ນຄົນທີ່ມັກສົງ ໄສໃນເລື້ອງຂອງຢາວັກຊີນ, ເຈົ້າຂອງຮ້ານອາຫານນ້ອຍໆທີ່ຕັ້ງຢູ່ໃນເມືອງໂກ ວາປ (Go Vap) ຍັງມີຄວາມກັງວົນກ່ຽວກັບສຸຂະພາບຂອງນາງຫລັງຈາກທີ່ນາງໄດ້ຮັບການສັກຢາວັກຊີນ ໃນທີ່ສຸດແລ້ວ.

ຄວາມບໍ່ເຕັມໃຈຂອງນາງແມ່ນສາມາດທີ່ຈະເຂົ້າໃຈໄດ້ ເນື່ອງຈາກຄວາມຮູ້ສຶກຕໍ່ຕ້ານຢາວັກຊີນຂອງຈີນ ທີ່ເຜີຍແຜ່ຢູ່ໃນສື່ສັງຄົມອອນລາຍນັ້ນ, ປະຊາຊົນຊາວຫວຽດນາມຫລາຍໆຄົນມີຄວາມເປັນຫ່ວງກ່ຽວກັບຄວາມປອດໄພ ແລະປະສິດທິພາບຂອງຢາວັກຊີນຈີນດັ່ງກ່າວ. ພາວະທີ່ກືນບໍ່ເຂົ້າຄາຍບໍ່ອອກຂອງນາງຈາວນັ້ນ ເນື່ອງຈາກນະຄອນໂຮຈິມິນ ມີການລົນນະລົງໃນການສັກຢາວັກຊີນ, ໂດຍມີເປົ້າໝາຍຢ່າງໜ້ອຍຕ້ອງໄດ້ສັກນຶ່ງເຂັມ ສໍາລັບ 70 ເປີເຊັນຂອງປະຊາກອນໃນນະຄອນດັ່ງກ່າວພາຍໃນເດືອນສິງຫາ. ການໂຕ້ແຍ້ງເລີ້ມຕົ້ນຂຶ້ນໃນເດືອນນີ້ ໃນຂະນະທີ່ທາງການໄດ້ປະກາດວ່າ ຈະຊື້ ແລະໃຊ້ຢາວັກຊີນຊິໂນຟາມຂອງຈີນ 5 ລ້ານໂດສ.

ໃນວັນທີ 25 ສິງຫາ, ຫວຽດນາມໄດ້ລາຍງານໂຕເລກຜູ້ປ່ວຍໂຄວິດ-19 ໃໝ່ 12,096 ຄົນ ແລະເສຍຊີວິດໄປແລ້ວ 335 ຄົນ, ເຊິ່ງນັບເປັນວັນທີ 7 ຕິດຕໍ່ກັນຂອງປະເທດ ທີ່ມີບັນທຶກຜູ້ຕິດເຊື້ອ 10,000 ຄົນຕໍ່ມື້.

ໂຕເລກຫລ້າສຸດ ມີຈໍານວນຜູ້ຕິດເຊື້ອໂຄວິດ-19 ທັງໝົດໃນຮອບທີ 4 ຂອງການລະບາດນີ້ແມ່ນ 377,245 ຄົນ ໂດຍມີຍອດຜູ້ເສຍຊີວິດຍ້ອນໂຄວິດ-19 ຢູ່ທີ່ 9,349 ຄົນ.

ນະຄອນໂຮຈິມິນຍັງຄົງພົບຈໍານວນຜູ້ປ່ວຍໂຄວິດ-19 ເພີ້ມຂຶ້ນສູງ. ມາເຖິງວັນທີ 25 ສິງຫາ, ໃນນະຄອນແຫ່ງນີ້ໄດ້ລາຍງານວ່າ ມີຜູ້ປ່ວຍໃໝ່ 5,294 ຄົນ ແລະເສຍຊີວິດໄປແລ້ວ 266 ຄົນ.

ຈາກເດືອນມີນາ ຫາກາງເດືອນສິງຫາ, ນະຄອນໂຮຈິມິນ ເຊິ່ງມີປະຊາກອນປະ ມານ 10 ລ້ານຄົນ, ໄດ້ຮັບການສັກຢາວັກຊີນແລ້ວຫລາຍກວ່າ 4 ລ້ານ 3 ແສນຄົນ ເຊິ່ງຫລາຍກວ່າ 1 ແສນຄົນສໍາລັບຜູ້ທີ່ໄດ້ສັກຢາຄົບສອງເຂັມ, ນັ້ນຄືຄຳເວົ້າຂອງຮອງປະທານຄະນະກໍາມະການເທດສະບານຂອງປະຊາຊົນ ທ່ານ ດວງ ອັນ ດຶກ (Duong Anh Duc) ກ່າວຕໍ່ນັກຂ່າວໃນວັນທີ 13 ສິງຫາ ທີ່ຜ່ານມານີ້.

ອ່ານຂ່າວນີ້ເປັນພາສາອັງກິດ

XS
SM
MD
LG