ລັດຖະບານຫວຽດນາມກ່າວວ່າ ຕົນໄດ້ຈັບກຸມພວກຊົນກຸ່ມ
ນ້ອຍຊາວມົ້ງຈຳນວນນຶ່ງ ທີ່ໄປໂຮມຊຸມນຸມກັນຢູ່ແຂວງດຽນ
ບຽນ ທາງພາກຕາເວັນຕົກສຽງເໜືອຂອງປະເທດ ເມື່ອສັບ
ປະດາແລ້ວແຕ່ບໍ່ໄດ້ໃຫ້ລາຍລະອຽດຫຍັງຫຼາຍກ່ຽວກັບການ
ຈັບກຸມດັ່ງກ່າວ.
ໂຄສົກຍິງຄົນນຶ່ງຂອງກະຊວງການຕ່າງປະເທດຫວຽດນາມ
ກ່າວໃນວັນພະຫັດວານນີ້ວ່າ ພວກທີ່ມີຄວາມຕື່ນເຕັ້ນເກີນ
ເຫດຈຳນວນນຶ່ງໄດ້ຖືກຄວບຄຸມໂຕໄວ້ ແລະຈະຖືກຈັດການ
ຕາມກົດໝາຍ. ທ່ານນາງບໍ່ໄດ້ໃຫ້ລາຍລະອຽດກ່ຽວກັບຈຳ
ນວນຂອງພວກທີ່ຖືກຈັບຫຼືຂໍ້ຫາທີ່ພວກກ່ຽວປະເຊີນ. ນອກ
ນັ້ນແລ້ວ ທ່ານນາງຍັງບໍ່ຍອມໃຫ້ຄວາມເຫັນໃດໆ ກ່ຽວກັບລາຍງານຂ່າວທີ່ບໍ່ທັນໄດ້ຮັບ
ການຢືນຢັນທີ່ວ່າມີຫຼາຍຄົນເສຍຊີວິດເວລາທະຫານລັດຖະບານຫວຽດນາມທັບມ້າງການ
ໂຮມຊຸມນຸມຂອງພວກຊາວມົ້ງ.
ໂຄສົກ Nguyen Puong Nga ກ່າວຕື່ມວ່າ ພວກທີ່ໄປຮ່ວມໂຮມຊຸມນຸມອື່ນໆໄດ້ພາກັນ
ກັບຄືນໄປຍັງເຮືອນຊານບ້ານຊ່ອງຂອງພວກເຂົາເຈົ້າຢ່າງສັນຕິ.
ໃນວັນພະຫັດສັບປະດາແລ້ວ ສື່ມວນຊົນນາໆຊາດເລີ່ມລາຍງານວ່າ ມີຊາວມົ້ງທີ່ນັບຖືສາ
ສະໜາຄຣິສຕ໌ຈຳນວນຫຼາຍພັນຄົນ ໄດ້ໄປໂຮມຊຸມນຸມກັນທີ່ແຂວງດຽນບຽນ. ລັດຖະບານ
ຫວຽດນາມເວົ້າວ່າ ພວກຊາວມົ້ງໄປໂຮມຊຸມນຸມກັນຍ້ອນເຂົາເຈົ້າເຊື່ອວ່າພະເຈົ້າຫຼືຜູ້ມີພະ ລັງອຳນາດເໜືອມະນຸດຈະມາຮັບເອົາພວກເຂົາເຈົ້າ ໄປຍັງດິນແດນສັນຍາໃນທ້າຍເດືອນນີ້.
ໃນມື້ວານນີ້ ທ່ານນາງ Nguyen ໄດ້ຖະແຫຼງຢໍ້າເຖິງການກ່າວຫາຂອງລັດຖະບານທີ່ວ່າມີ ຄົນບາງກຸ່ມຕ້ອງການຢາກຈະສ້າງຕັ້ງລາດຊະອານາຈັກມົ້ງທີ່ເປັນອິດສະຫຼະຂຶ້ນມາ.
ລາຍງານຂ່າວຫຼາຍໆກະແສແຈ້ງວ່າ ພວກທະຫານຫວຽດນາມໄດ້ໃຊ້ກຳລັງ ທັບມ້າງການ
ໂຮມຊຸມນຸມຂອງພວກຊາວມົ້ງ. ບັນດາກຸ່ມສະໜັບສະໜຸນຊາວມົ້ງກ່າວວ່າມີຫຼາຍກວ່າ 60
ຄົນເສຍຊີວິດ ແລະອີກຫຼາຍຮ້ອຍຄົນໄດ້ຮັບບາດເຈັບ ໃນການປາບປາມດັ່ງກ່າວ. ແຕ່ການ
ກ່າວອ້າງທີ່ວ່ານີ້ ຍັງບໍ່ທັນໄດ້ຮັບການຢືນຢັນຈາກແຫຼ່ງຂ່າວທີ່ເປັນອິດສະຫຼະເທື່ອ.
ສື່ມວນຊົນຂອງຫວຽດນາມລາຍງານວ່າ ມີຜູ້ຄົນຈຳນວນນຶ່ງໄດ້ລົ້ມປ່ວຍ ຍ້ອນສະພາວະ
ທີ່ຂາດຫຼັກສຸກຂະພິບານຢູ່ບ່ອນໂຮມຊຸມນຸມ ຊຶ່ງຕັ້ງຢູ່ໃນເຂດສອກຫຼີກຫ່າງໄກແລະເດັກ
ນ້ອຍຄົນນຶ່ງໄດ້ເສຍຊີວິດຈາກອາການປ່ວຍທີ່ວ່ານີ້.
ລັດຖະບານຫວຽດນາມກ່າວວ່າ ສະຖານະການຢູ່ໃນເຂດດັ່ງກ່າວໄດ້ກັບຄືນເຂົ້າສູ່ສະພາບ
ປົກກະຕິແລ້ວ.
ລັດຖະບານຫວຽດນາມ ໄດ້ປະຕິເສດຊໍ້າແລ້ວຊໍ້າອີກ ຕໍ່ການຮ້ອງຂໍຂອງພວກນັກຂ່າວທີ່
ຢາກເດີນທາງໄປຍັງເຂດດັ່ງກ່າວເພື່ອເບິ່ງສະພາບການທີ່ນັ້ນຢ່າງເປັນອິດສະຫຼະ.
