Me Nam ຫຼື Mother Mushroom, ແມ່ນຊື່ຂອງນັກຂຽນຂ່າວລົງອິນເຕີແນັດຄົນ
ຫວຽດນາມ ທີ່ໄດ້ຮັບລາງວັນແມ່ຍິງຜູ້ກ້າຫານສາກົນ ຈາກ ສະຕີໝາຍເລກໜຶ່ງຂອງ
ສະຫະລັດ ທ່ານນາງ Melania Trump ໃນເດືອນມີນາທີ່ຜ່ານມາ, ໄດ້ຖືກຟ້ອງຮ້ອງ
ຢ່າງເປັນທາງການໂດຍລັດຖະບານ ຮາໂນ່ຍ ຍ້ອນກິດຈະກຳຕ່າງໆ ທີ່ເຮັດໃຫ້ລາວ
ໄດ້ຮັບລາງວັນ, ອີງຕາມການລາຍງານຂອງ ນັກຂ່າວວີໂອເອພະແນກພາສາ ຫວຽດ
ນາມ.
ລັດຖະບານ ໄດ້ຟ້ອງນາງ Ngoc Nhu Quynh ເຊິ່ງຮູ້ກັນໃນຊື່ນາມປາກກາວ່າ
Mother Mushroom, ດ້ວຍຂໍ້ຫາທາງອາຍາສາມກະທົງ ພາຍໃຕ້ມາດຕາທີ 88
ກ່ຽວກັບ “ການໂຄສະນາຊວນເຊື່ອ ຕໍ່ຕ້ານສາທາລະນະລັດສັງຄົມນິຍົມ ຫວຽດ
ນາມ.” ກົດໝາຍທີ່ມີຄຳເວົ້າບໍ່ກະຈ່າງແຈ້ງດັ່ງກ່າວ ໄດ້ພາໃຫ້ມີການກ່າວປະນາມ
ຈາກສາກົນກ່ຽວກັບອຳນາດທີ່ໄດ້ມອບໃຫ້ລັດຖະບານ ເພື່ອປາບປາມພວກຄັດຄ້ານ
ລັດຖະບານ.
ນາງ Quynh ອາຍຸ 37 ປີ ໄດ້ຖືກກັກຂັງນັບຕັ້ງແຕ່ວັນທີ 10 ຕຸລາ 2016 ເປັນຕົ້ນມາ.
ລາວປະເຊີນກັບການຖືກຂັງຄຸກດົນເຖິງ 12 ປີຖ້າຖືກພົບວ່າມີຄວາມຜິດ. ລາວແມ່ນຜູ້
ທີ່ໄດ້ຮັບລາງວັນພຽງຄົນດຽວ ທີ່ບໍ່ສາມາດເຂົ້າຮ່ວມພິທີໃນນະຄອນຫຼວງ ວໍຊິງຕັນ ເມື່ອ
ວັນທີ 29 ທີ່ຜ່ານມາ, ຍ້ອນວ່າລາວຖືກຈັບເຂົ້າຄຸກ.
ທ່ານ Nguyen Ha Luan ທະນາຍຄວາມຂອງນາງ Quynh ໄດ້ກ່າວວ່າ ລາວ ແລະ ທະນາຍຄວາມອີກຄົນໜຶ່ງ, ທ່ານ Le Luan, ໄດ້ຖືກມອບໝາຍ ໃຫ້ເປັນຕົວແທນນາງ ໃນສານປະຊາຊົນ ແຂວງ Khanh Hoa.
