ລາຍງານຂ່າວຫວຽດນາມກ່າວວ່າ ຕໍາຫລວດໄດ້ຈັບກຸມນາຍ Nguyen Dan Que
ນັກເຄື່ອນໄຫວເພື່ອປະຊາທິປະໄຕທີ່ມີຊື່ສຽງ ແລະກ່າວຫາຜູ້ກ່ຽວວ່າ ມີເອກະສານ
ຕ່າງໆຢູ່ໃນຄວາມຄອບຄອງທີ່ຮຽກຮ້ອງໃຫ້ທໍາການໂຄ່ນລົ້ມລັດຖະບານກຸງຮາໂນຍ.
ຕໍາຫລວດໃນນະຄອນໂຫ້ຈິມິນ ປະກາດຂ່າວການຈັບກຸມນາຍ Nguyen Dan Que
ໃຫ້ຮູ້ໃນວັນອາທິດວານນີ້ ແລະກ່າວວ່າ ການ ກວດຄົ້ນເຮືອນຂອງນາຍ Que ໄດ້
ພົບເຫັນແຟ໊ມເອກະສານໃນຄອມພີວເຕີ ຈໍານວນຫລາຍກວ່າ 60 ພັນສະບັບ ທີ່ຕໍ່
ຕ້ານລັດຖະບານ.
ລາຍງານສື່ມວນຊົນລາຍງານໃນວັນຈັນມື້ນີ້ວ່າ ພວກເອກະສານຕ່າງໆເຫລົ່ານີ້ ແມ່ນຮວມ
ທັງການຮຽກຮ້ອງໃຫ້ປະຊາຊົນຫວຽດນາມ ພາກັນອອກໄປເດີນຂະບວນຕາມຖະໜົນຫົນ
ທາງສາຍຕ່າງໆ ແລະໃຫ້ໂຄ່ນລົ້ມລັດຖະບານນໍາ.
ໃນຕົ້ນເດືອນນີ້ ນາຍ Nguyen Dan Que ໄດ້ກ່າວຕໍ່ວິທະຍຸວີໂອເອ ພະແນກພາສາ
ຫວຽດນາມໃນການໃຫ້ສໍາພາດວ່າ ປະຊາຊົນຫວຽດນາມ ໄດ້ຮັບຄວາມບັນດົນໃຈໃນ
ການຮຽກຮ້ອງເອົາສິດທິມະນຸດແລະປະຊາທິປະໄຕ ຈາກຄື້ນຟອງແຫ່ງການປະທ້ວງ
ທີ່ເກີດຂຶ້ນໃນທົ່ວພາກຕາເວັນອອກກາງນັ້ນ.
ນາຍ Nguyen Dan Que ຖືກຈັບກຸມ ໃນມື້ດຽວກັນກັບທີ່ຜູ້ກ່ຽວໄດ້ອອກຄວາມຄິດ
ຄວາມເຫັນທີ່ພິມເຜີຍແຜ່ໃນໜັງສືພິມ Washington Post ຂອງສະຫະລັດ ຊຶ່ງຜູ້ກ່ຽວ
ໄດ້ທໍາການຕໍາໜິຕິຕຽນ ອັນທີ່ລາວເອີ້ນວ່າ ການບໍ່ເອົາຫົວຊານໍາການເຄົນລົບນັບຖືສິດ
ທິມະນຸດແລະກົດໝາຍສາກົນຂອງລັດຖະບານກຸງຮາໂນຍນັ້ນ.
