ສານແຫ່ງນຶ່ງໄດ້ຕັດສິນໂທດຈໍາຄຸກ ນັກເຄື່ອນໄຫວຝຣັ່ງເຊື້ອສາຍຫວຽດນາມຄົນນຶ່ງ 3 ປີ
ໃນວັນພຸດມື້ນີ້ ໃນຂໍ້ຫາປຸກປັ່ນເພື່ອໂຄ່ນລົ້ມລັດຖະບານ.
ນາຍ Pham Minh Hoang ຖືກຕັດສິນຫລັງຈາກດໍາເນີນຄະດີໃນສານເປັນເວລາເຄິ່ງມື້
ວ່າ ມີຄວາມຜິດໃນຖານໄດ້ທໍາການເຄື່ອນໄຫວຕ່າງໆທີ່ມີວັດຖຸປະສົງເພື່ອໂຄ່ນລົ້ມອໍາ
ນາດປົກຄອງຂອງປະຊາຊົນ. ທາງການຫວຽດນາມກ່າວວ່າ ນາຍຟາມໄດ້ຂຽນບົດຄວາມ
ຕໍ່ຕ້ານລັດຖະບານຫລາຍສະບັບ ລົງໃນອິນເຕີແນັດແລະວ່າ ຜູ້ກ່ຽວມີສາຍພົວພັນກັບກຸ່ມ
Viet Tan ຊຶ່ງເປັນກຸ່ມນິຍົມປະຊາທິປະໄຕ ທີ່ຖືກເກືອດຫ້າມຢູ່ໃນຫວຽດນາມນັ້ນ.
ພັນລະຍາຂອງນາຍຟາມມິນຫວງ ກ່າວວ່າ ນາງເຊື່ອວ່າສາມີຂອງນາງ ຖືກຈັບກຸມຍ້ອນ
ການຄັດຄ້ານຂອງລາວ ຕໍ່ບໍ່ແຮ່ອະລຸມິນຽມ ທີ່ດໍາເນີນການໂດຍຄົນຈີນແຫ່ງນຶ່ງໃນເຂດ
ພູພຽງພາກກາງຫວຽດນາມ ຊຶ່ງພວກນັກເຄື່ອນໄຫວກ່າວວ່າ ໄດ້ເຮັດໃຫ້ສິ່ງແວດລ້ອມ
ເຊື່ອມໂຊມລົງໃນເຂດນັ້ນ.
ນາຍຫວງທີ່ເກີດຢູ່ຫວຽດນາມ ເປັນອາຈານສອນວິຊາເລກ ທີ່ໄດ້ໄປອາໄສຢູ່ໃນປະເທດ
ຝຣັ່ງເປັນເວລາຫລາຍປີ ແລະຖືສັນຊາດຝຣັ່ງ.
ຜູ້ກ່ຽວຈະໄດ້ຖືກລຸດໂທດລົງ 1 ປີ ຍ້ອນວ່າໄດ້ຖືກກັກຂັງມາແລ້ວ 1 ປີ ໃນຂະນະທີ່ລໍຖ້າ
ການດໍາເນີນຄະດີນັ້ນ ແຕ່ລາວປະເຊີນກັບການຖືກກັກບໍລິເວນໃຫ້ຢູ່ໃນບ້ານເຮືອນຕື່ມ
ອີກ 3 ປີ ຫລັງຈາກຮັບໃຊ້ໂທດຈໍາຄຸກເຕັມ 3 ປີແລ້ວ.
