ຫວຽດນາມ ອອກມາປະທ້ວງຈີນ ໃນວັນຈັນ ສຳລັບກໍລະນີ ທີ່ກ່າວອ້າງວ່າ ເຈົ້າໜ້າທີ່ຈີນ ໂຈມຕີເຮືອຫາປາຫວຽດນາມ ໃນວັນອາທິດ ເຊິ່ງເຮັດໃຫ້ມີຜູ້ໄດ້ຮັບບາດເຈັບ 10 ຄົນ ເຊິ່ງບາດແຜຂອງພວກເຂົາ ມີອາການສາຫັດ.
ໜັງສືພິມ ທຽນ ຟົງ ຂອງລັດຖະບານ ຮາໂນ່ຍ ລາຍງານໃນວັນອັງຄານວ່າ ຊາວປະມົງຫວຽດນາມທີ່ຢູ່ໃນເຫດການ ກ່າວວ່າ ປະມານ 40 ຄົນ ທີ່ມາຈາກເຮືອຕ່າງຊາດຫຼາຍລໍາ ເຂົ້າມາທຳຮ້າຍພວກຕົນ ດ້ວຍທໍ່ເຫຼັກ ແລະ ຍຶດອຸປະກອນຫາປາໄປນໍາ ອີກດ້ວຍ.
ລາຍງານຂ່າວ ລະບຸວ່າ ຊາວປະມົງ 4 ຄົນຈາກເມືອງ ຂວັງ ໄຫງ ໃນພາກກາງຂອງຫວຽດນາມ ໄດ້ຮັບບາດເຈັບສາຫັດຈົນຕ້ອງໄດ້ເຂົ້າໄປປິ່ນປົວໃນໂຮງໝໍ.
ໜັງສືພິມ ທຽນ ຟົງ ລາຍງານຄໍາເວົ້າຂອງ ທ້າວ ຫງຽນ ທັນ ບຽນ ຫົວໜ້າເຮືອດັ່ງກ່າວວ່າ ເຫດການທີ່ວ່ານີ້ ເກີດຂຶ້ນໃນຕອນເຊົ້າວັນທີ 29 ກັນຍາ ໂດຍເປັນການໄລ່ລ່າຂອງເຮືອຕ່າງຊາດ ກ່ອນທີ່ຈະສົ່ງຄົນຂຶ້ນເທິງເຮືອຂອງຕົນ ແລະ “ທຸບຕີພວກເຮົາແບບບໍ່ມີຄວາມເມດຕາ”.
ໃນຂະນະດຽວກັນ, ທ້າວ ຫງຽງ ເທືອງ, ລູກເຮືອ ອາຍຸ 34 ປີ ທີ່ປິ່ນປົວຢູ່ໂຮງໝໍ ເວົ້າໃຫ້ຟັງວ່າ ໄດ້ແຕ່ໃຊ້ມືປົກປ້ອງໂຕເອງ ເພາະວ່າ ຕອບໂຕ້ບໍ່ໄດ້ ແລະເມື່ອຜູ້ບຸກລຸກ ທຸບຕີລູກເຮືອແລ້ວ ກໍໄລ່ທຸກຄົນໄປຢູ່ທີ່ຫົວເຮືອ ກ່ອນຈະເອົາຜ້າມາປົກທຸກຄົນໄວ້, ອີງຕາມລາຍງານຂອງສື່ສັງຄົມ ຫວຽດນາມເນັທ.
ທ່ານ ຟາມ ທູ ຮາງ, ໂຄສົກກະຊວງການຕ່າງປະເທດຫວຽດນາມ ລະບຸໃນຖະແຫຼງການວ່າ: ກອງກຳລັງຮັກສາກົດໝາຍຈີນ “ກົດຂີ່ຂົ່ມເຫງ, ທຳຮ້າຍຮ່າງກາຍ ແລະ ຍຶດເອົາຊັບສິນ’ ຂອງລູກເຮືອ ເຮືອຫາປາຫວຽດນາມ ທີ່ຢູ່ເທິງເຮືອ QNg 95739 TS ແມ່ນມາຈາກ ເມືອງ ຂວັງ ໄຫງ ແລະ ວ່າ ‘ຫວຽດນາມ ກັງວົນສູງສຸດ, ບໍ່ພໍໃຈ ແລະ ຄັດຄ້ານຢ່າງໜັກແໜ້ນ ຕໍ່ພຶດຕິກຳທີ່ໂຫດຮ້າຍ ຂອງກອງກຳລັງຮັກສາກົດໝາຍຂອງຈີນ ທີ່ປະຕິບັດຕໍ່ຊາວປະມົງຫວຽດນາມ”.
ທ່ານ ຮາງ ກ່າວຕື່ມອີກວ່າ “ກະຊວງການຕ່າງປະເທດຫວຽດນາມ ໄດ້ສື່ສານຢ່າງເອົາຈິງເອົາຈັງ ກັບສະຖານທູດຈີນ ໃນນະຄອນຫຼວງ ຮາໂນ່ຍ, ໄດ້ຄັດຄ້ານຢ່າງໜັກແໜ້ນຕໍ່ການກະທຳດັ່ງກ່າວ ຂອງກອງກຳລັງຮັກສາກົດໝາຍຈີນ ແລະ ຮຽກຮ້ອງໃຫ້ຈີນ ເຄົາລົບໃນອະທິປະຕະໄຕຂອງຫວຽດນາມ ຕໍ່ໝູ່ເກາະ ຮວງ ຊາ (ໝູ່ເກາະ ພາຣາເຊລ) ຢ່າງສົມບູນ (ລວມທັງ) ສືບສວນ ແລະ ປະກາດຜົນໃຫ້ກັບຝ່າຍຫວຽດນາມ ຢ່າງວ່ອງໄວ ແລະ ບໍ່ດຳເນີນການແບບເກົ່າ ຊໍ້າອີກ”.
ທ່ານ ຮວງ ວຽດ, ອາຈານສອນ ຈາກມະຫາວິທະຍາໄລກົດໝາຍຂອງ ໂຮຈິມິນ ບອກກັບ ວີໂອເອ ໃນການສຳພາດທາງໂທລະສັບ ໃນວັນພຸດຜ່ານມານີ້ ວ່າ “ເຮືອຍາມຝັ່ງຈີນ 2 ລໍາ (ຄື) ຊານຊາ ຈືຟາ 101 ແລະ ຊານຊາ ຈື້ຟາ 301 ໄດ້ດຳເນີນການໂຈມຕີຄົນຫາປາ ແລະ ເຮືອຫາປາຫວຽດນາມ ໂດຍບໍ່ມີການເກາະຜິດໃດໆ” ແລະ ວ່າ “ນີ້ ສະແດງໃຫ້ເຫັນຢ່າງຈະແຈ້ງເຖິງແຜນການເອົາທະເລຈີນຕາເວັນອອກຂອງຈີນ”.
ທັງນີ້, ຫວຽດນາມ ເອີ້ນຊື່ທະເລຈີນໃຕ້ວ່າ “ທະເລຈີນຕາເວັນອອກ”.
ໃນວັນອັງຄານຜ່ານມານີ້ ກະຊວງການຕ່າງປະເທດຈີນ ກ່າວວ່າ ເຮືອຫາປາຫວຽດນາມ ເຂົ້າມາຫາປາໂດຍບໍ່ໄດ້ຮັບອະນຸຍາດຈາກປັກກິ່ງ. ດັ່ງນັ້ນ, ທາງການຈີນ ຈຶ່ງດຳເນີນມາດຕະການສະກັດກັ້ນ, ອີງຕາມລາຍງານຂອງອົງການຂ່າວ ຣອຍເຕີສ໌.
ກະຊວງການຕ່າງປະເທດຈີນ ຕອບຕໍ່ຄຳຮ້ອງຂໍຄໍາເຫັນຈາກອົງການຂ່າວ ຣອຍເຕີສ໌ ວ່າ “ປະຕິບັດການ ຢູ່ທີ່ຈຸດເກີດເຫດ ເປັນໄປແບບມືອາຊີບ ແລະ ມີການສະກັດກັ້ນ ແລະ ບໍ່ມີເຫດການບາດເຈັບໃດໆ ເກີດຂຶ້ນ” ໂດຍບໍ່ໄດ້ມີການໃຫ້ຂໍ້ມູນສະເພາະເຈາະຈົງ ກ່ຽວກັບ ເຫດການໂຈມຕີລູກເຮືອຫາປາດັ່ງກ່າວ.
ຟໍຣັມສະແດງຄວາມຄິດເຫັນ