ສານຫວຽດນາມແຫ່ງນຶ່ງໄດ້ຕັດສິນລົງໂທດອະດີດເຈົ້າໜ້າທີ່ຂັ້ນອາວຸໂສກະຊວງຂົນສົ່ງຄົນນຶ່ງໃນວັນຈັນມື້ນີ້ ໃຫ້ຈໍາຄຸກຕະຫລອດຊີວິດ ໃນຖານໄດ້ຮັບສິນບົນ ກ່ຽວກັບວຽກກໍ່ສ້າງຖະໜົນທີ່ໄດ້ຮັບທຶນກໍ່ສ້າງຈາກຍີ່ປຸ່ນ.
ຂ່າວນອງນັນທີ່ວ່ານີ້ໄດ້ກະຕຸ້ນໃຫ້ຍີ່ປຸ່ນ ຊຶ່ງເປັນປະເທດທີ່ ໃຫ້ການຊ່ອຍເຫລືອລາຍໃຫຍ່ທີ່ສຸດຂອງຫວຽດນາມ ຕັດການຊ່ອຍເຫລືອຂອງຕົນເປັນເວລາຫລາຍເດືອນ ເວລາຂ່າວນອງນັນດັ່ງກ່າວຖືກເປີດເຜີຍອອກມາ ໃນປີ 2008 ນັ້ນ.
ສານດັ່ງກ່າວໃນນະຄອນໂຮຈິມິນ ຕັດສິນວ່າທ່ານ Huynh
Ngoc Sy ມີຄວາມຜິດແທ້ ລຸນຫລັງການດໍາເນີນຄະດີ ທີ່
ເລີ້ມຂຶ້ນໃນວັນສຸກຜ່ານມານີ້ ຊຶ່ງທ່ານສາມາດປະເຊີນກັບ
ການລົງໂທດປະຫານຊີວິດໄດ້.
ທ່ານ Sy ຖືກຕັດສິນວ່າມີຄວາມຜິດ ໃນຂໍ້ຫາຮັບສິນບົນເປັນເງິນຈໍານວນ 262 ພັນໂດລາ ຈາກບໍລິສັດ Pacific Consultants International ຂອງຍີ່ປຸ່ນ ທີ່ທາງການຫວຽດນາມ ໄດ້ວ່າຈ້າງໃຫ້ເປັນທີ່ປຶກສາ ໃນການກໍ່ສ້າງຖະໜົນຫລວງສາຍນຶ່ງ ທີ່ເຊື່ອມໂຍງກໍ້າຕາເວັນ ອອກຫາກໍ້າຕາເວັນຕົກ ຂອງນະຄອນໂຮຈິມິນ.
ພວກຫົວໜ້າບໍລິຫານບໍລິສັດ PCI ຍີ່ປຸນ 4 ຄົນ ໄດ້ຍອມຮັບຜິດຕໍ່ສານແຫ່ງນຶ່ງໃນກຸງ ໂຕກຽວໃນປີແລ້ວນີ້ ວ່າໄດ້ຈ່າຍເງິນສິນບົນຈໍານວນ 820 ພັນໂດລາ ໃຫ້ທ່ານ Sy.
ຍີ່ປຸ່ນໄດ້ງົດໃຫ້ເງິນຊ່ອຍເຫລືອແບບກູ້ຢືມແກ່ຫວຽດນາມ ຍ້ອນຂ່າວນອງນັນດັ່ງກ່າວ ແຕ່ໄດ້ ຮື້ຟື້ນການຊ່ວຍເຫລືອຫວຽດນາມຄືນໃນປີ 2009.
