ທີ່ຫວຽດນາມ ເຈົ້າໜ້າທີ່ກ່າວວ່າພາຍຸເຂດຮ້ອນ Conson ໄດ້ເຮັດໃຫ້ ນຶ່ງຄົນເສຍຊີວິດໃນວັນອາທິດມື້ນີ້ ຊຶ່ງເປັນການເພິ່ມຈຳນວນຄົນຕາຍ ຍ້ອນພາຍຸຮ້າຍລູກນີ້ໃນທົ່ວເອເຊຍ ຂຶ້ນເປັນຫລາຍກ່ວາ 70 ຄົນ. ເຈົ້າໜ້າທີ່ຫວຽດນາມເວົ້າອີກວ່າ ມີສິບກ່ວາຄົນ ຊຶ່ງຈຳນວນນຶ່ງແມ່ນຊາວປະມົງ ຫາຍສາບສູນໄປນັບແຕ່ພາຍຸ Conson ພັດເຂົ້າຝັ່ງທາງພາກເໜືອຂອງຫວຽດນາມໃນຄືນວັນເສົາ.
ທະຫານຫວຽດນາມໄດ້ອອກໄປຊ່ວຍຍົກຍ້າຍປະຊາຊົນຫລາຍພັນຄົນ ອອກຈາກແຂວງຕ່າງໆທີ່ຕັ້ງຢູ່ແຄມຝັ່ງທະເລນັ້ນ ກ່ອນພາຍຸຈະມາເຖິງ. ຍັງບໍ່ເປັນທີ່ແຈ້ງຂາວເທື່ອວ່າ ພາຍຸ Conson ໄດ້ສ້າງຄວາມເສຍຫາຍໃຫ້ແກ່ຊັບສິນ ໜ້ອຍຫລາຍສໍ່າໃດ ໃນເຂດທີ່ຖືກກະທົບນັ້ນ.
ພາຍຸລູກນີ້ໄດ້ສ້າງຄວາມເສຍຫາຍໜັກ ຢູ່ໃນປະເທດຈີນແລະຟີລິບປີນມາແລ້ວ ຊຶ່ງຕອນນັ້ນ Conson ຍັງເປັນພາຍຸໃຕ້ຝຸ່ນຢູ່ ກ່ອນຈະະຫລຸດລະດັບລົງມາເປັນພາຍຸເຂດຮ້ອນທຳມະດາ ແລ້ວພັດຂ້າມອ່າວຕົງແກ໋ງເຂົ້າສູ່ຫວຽດນາມ. ອາທິດແລ້ວນີ້ ໃຕ້ຝຸ່ນ Conson ເອົາຊີວິດຄົນໄປ ຢ່າງນ້ອຍ 68 ຄົນທີ່ຟີລິບປີນ ບ່ອນທີ່ເຈົ້າໜ້າທີ່ເວົ້າວ່າ ມີສອງຄົນຫາຍສາບສູນ. ຢູ່ທີ່ຈີນນັ້ນ ມີສອງຄົນເສຍຊີວິດຍ້ອນໃຕ້ຝຸ່ນລູກນີ້.
