ບໍ່ຖ່ານຫີນແຫ່ງນຶ່ງ ໄດ້ພັງລົງມາໃກ້ອ່າວຮາລອງຂອງ ຫວຽດນາມ ຫຼັງຈາກມີຝົນຕົກໜັກ ເຮັດໃຫ້ 5 ຄົນເສຍຊີວິດ, ສື່ມວນຊົນຂອງລັດລາຍງານໃນວັນອັງຄານມື້ນີ້, ອີງຕາມອົງການຂ່າວ AFP.
ອຸບັດຕິເຫດດັ່ງກ່າວ ເກີດຂຶ້ນໃນວັນຈັນວານນີ້ ຢູ່ທີ່ບໍ່ແຮ່ແຫ່ງນຶ່ງ ທີ່ດຳເນີນ ງານໂດຍບໍລິສັດຖ່ານຫີນ ຮອນ ກາຍ (Hon Gai), ເຊິ່ງເປັນໜ່ວຍງານນຶ່ງ ຂອງບໍລິສັດຂຸດຄົ້ນຖ່ານຫີນຂອງລັດ Vinacomin ຂອງຫວຽດນາມ, ເວັບໄຊຂ່າວ VNExpress ກ່າວ.
ຕອນເຊົ້າວັນອັງຄານມື້ນີ້ ໜ່ວຍກູ້ໄພໄດ້ດຶງເອົາສົບຂອງຄົນງານຂອງບໍ່ແຮ່ດັ່ງກ່າວຊຶ່ງມີອາຍຸລະຫວ່າງ 23 ຫາ 47 ປີ ອອກມາ.
ອີງຕາມເຈົ້າໜ້າທີ່ຊ່ວຍເຫຼືອດ້ານໄພພິບັດ, ມີການລາຍງານວ່າ ໄດ້ມີຝົນຕົກໜັກໃນນະຄອນ ຮາ ລອງ (Ha Long), ໃນທາງພາກເໜືອຂອງແຂວງ ກວາງ ນິນ (Quang Ninh) ໃນຊ່ວງເວລາທີ່ເກີດອຸບັດເຫດດັ່ງກ່າວ.
ຝົນທີ່ຕົກໜັກ ໄດ້ເຮັດໃຫ້ດິນເຈື່ອນ, ແລະບ້ານເຮືອນຫຼາຍຫຼັງ ຖືກນ້ຳຖ້ວມ.
ເຂດອື່ນໆ ທາງພາກເໜືອຂອງປະເທດ ກໍຍັງມີຝົນຕົກໜັກຕິດຕໍ່ກັນເປັນເວລາຫຼາຍວັນ, ເຊິ່ງເຮັດໃຫ້ເກີດນ້ຳຖ້ວມກະທັນຫັນ ແລະດິນເຈື່ອນ.
ຢູ່ໃນເຂດຊານເມືອງ ຂອງນະຄອນຫຼວງ ຮາໂນ່ຍ, ຊຸມຊົນຫຼາຍແຫ່ງ ຕ້ອງໄດ້ດຳລົງຊີວິດຢູ່ທ່າມກາງນ້ຳຖ້ວມ ມາເປັນເວລາ 1 ອາທິດແລ້ວ.
ບັນດານັກວິທະຍາສາດໄດ້ເຕືອນວ່າ ສະພາບດິນຟ້າອາກາດທີ່ຮ້າຍແຮງໃນທົ່ວໂລກ ກຳລັງນັບມື້ນັບຮ້າຍແຮງຂຶ້ນ ແລະ ເກີດຂຶ້ນຢູ່ເລື້ອຍໆຫຼາຍຂຶ້ນ ຍ້ອນການປ່ຽນແປງຂອງດິນຟ້າອາກາດ.
ອຸປະຕິເຫດບໍ່ແຮ່ທີ່ຮ້າຍແຮງ ມັກເກີດຂຶ້ນເລື້ອຍໆ ໃນຫວຽດນາມ, ເຖິງແມ່ນວ່າ ຫວຽດນາມ ຈະພັດທະນາສັກກະຍະພາບດ້ານສິ່ງແວດລ້ອມ ໃຫ້ສູງຂຶ້ນກໍຕາມ ແຕ່ກໍຍັງຕ້ອງເພິ່ງພາໂຮງງານໄຟຟ້າຖ່ານຫິນເປັນດ້ານຫຼັກ.
ມີຜູ້ເສຍຊີວິດຈາກອຸບັດຕິເຫດບໍ່ຖ່ານຫິນ ໃນແຂວງ ກວາງ ນິນ ອີກ 7 ຄົນ ນັບຕັ້ງແຕ່ເດືອນເມສາ ເປັນຕົ້ນມາ.
ລາຍງານໃນທ້ອງຖິ່ນກ່າວວ່າ ໃນປີກາຍນີ້, ອຸບັດຕິເຫດໄດ້ເຮັດໃຫ້ກຳມະກອນ ຢູ່ໃນກຸ່ມບໍລິສັດຖ່ານຫີນແລະບໍ່ຖ່ານຫິນຂອງລັດຖະບານຫວຽດນາມ ເສຍຊີວິດ ຢ່າງໜ້ອຍ 10 ຄົນ.
