ຫວຽດນາມ ແລະຈີນ ໄດ້ກ່າວຫາຊຶ່ງກັນແລະກັນວ່າ ໃຊ້ເຮືອ
ຂອງຕົນແລ່ນເຂົ້າຕຳເຮືອ ຂອງອີກຝ່າຍນຶ່ງ ໃກ້ໆຖານເຈາະ
ນ້ຳມັນຂອງຈີນ ຢູ່ໃນເຂດນ່ານນ້ຳທີ່ມີການໂຕ້ແຍ້ງກັນນັ້ນ.
ຮອງຫົວໜ້າຂອງພະແນກຄຸ້ມຄອງການປະມົງຫວຽດນາມ ທ່ານ
Ha Le ໄດ້ບອກກັບ VOA ໃນວັນອັງຄານຜ່ານມານີ້ວ່າ ພວກລູກ
ເຮືອຫວຽດນາມ 2 ຄົນ ໄດ້ຮັບບາດເຈັບ ແລະເຮືອຂອງກົມປະມົງ
ລຳນຶ່ງໄດ້ຮັບຄວາມເສຍຫາຍຢ່າງໃຫຍ່ ເວລາເຮືອ 7 ລຳຂອງຈີນ
ໄລ່ເຮືອຫວຽດນາມ ກ່ອນທີ່ຈະແລ່ນເຂົ້າຕຳ ໃນວັນຈັນຜ່ານມານີ້.
ທ່ານ Ha Le ຍັງໄດ້ກ່າວເນັ້ນອີກວ່າ ເຮືອຂອງຫວຽດນາມນັ້ນ ບໍ່ເຄີຍໂຈມຕີເຮືອຈີນຈັກເທື່ອ ແລະປະທ້ວງ ຕໍ່ອັນທີ່ຈີນເອີ້ນວ່າ ເປັນເຂດກັນຊົນຄວາມປອດໄພ ໃນເຂດນ່ານນ້ຳຂອງຫວຽດນາມນັ້ນ.
ແຕ່ໂຄສົກຂອງກະຊວງການຕ່າງປະເທດຂອງຈີນ ທ່ານນາງ Hua Chunying ໄດ້ກ່າວໃນວັນອັງຄານຜ່ານມານີ້ ໃນກອງປະຊຸມຖະແຫຼງຂ່າວວ່າ ເຮືອຂອງຫວຽດນາມ ໄດ້ລ່ວງລະເມີດ ຕໍ່ ເຂດ ກັນຊົນຄວາມປອດໄພຂອງຕົນ ແລະແລ່ນຕຳເຮືອຂອງຈີນລຳນຶ່ງ.
