ມີ 12 ຄົນເສຍຊີວິດ ຫຼັງຈາກເຮືອທ່ອງທ່ຽວລຳນຶ່ງຫຼົ້ມ
ໃນຕອນເຊົ້າຂອງວັນພະຫັດມື້ນີ້ ໃນບໍລິເວນອ່າວ Ha
Long ທີ່ມີທິວທັດອັນສວຍສົດງົດງາມຂອງຫວຽດນາມ.
ຜູ້ອຳນວຍການພະແນກຄຸ້ມຄອງເຂດອ່າວ Ha Long
ທ່ານ Ngo Van Hung ກ່າວວ່າ ສົບຂອງພວກນັກ
ທ່ອງທ່ຽວ ຊາວຕ່າງປະເທດ 11 ສົບ ແລະຜູ້ນຳທ່ຽວ
ຊາວຫວຽດນາມຄົນນຶ່ງ ໄດ້ພົບເຫັນແລ້ວ ໃນບໍລິເວນ
ທີ່ເກີດເຫດ ໃນຂະນະທີ່ ພວກນັກທ່ອງທ່ຽວຊາວຕ່າງ
ປະເທດອີກ 9 ຄົນ ແລະພວກລູກເຮືອ 6 ຄົນໄດ້ຖືກ
ຊ່ອຍຊີວິດໄວ້ໄດ້.
ພວກນັກທ່ອງທ່ຽວເຫຼົ່ານີ້ ແມ່ນມາຈາກສະຫະລັດ ຝຣັ່ງ
ສະວິດເຊີແລນ, ສະວີເດັນ ແລະປະເທດອື່ນໆອີກ.
ອ່າວ Ha Long ຊຶ່ງຕັ້ງຢູ່ທາງພາກຕາເວັນອອກສຽງເໜືອ ຂອງນະຄອນຫຼວງຮາໂນ່ຍນັ້ນ
ເປັນບ່ອນທ່ອງທ່ຽວ ທີ່ໄດ້ຮັບຄວາມນິຍົມສູງ ສຳລັບພວກນັກທ່ອງທ່ຽວ ຊາວຕ່າງປະເທດ
ແລະຈຳນວນນຶ່ງ ໄດ້ພາກັນລົງເຮືອທ່ອງທ່ຽວ ໄປຊົມທັດສະນີຍະພາບອັນສວຍສົດງົດງາມ
ຂອງອ່າວດັງກ່າວ ໃນຕອນກາງຄືນ.
