ລິ້ງ ສຳຫລັບເຂົ້າຫາ

ອາຊ່ຽນໄຂກອງປະຊຸມສຸດຍອດ ທີ່ຮ່າໂນຍ

  • Daniel Schearf
  • ດາຣາ ບັກຄໍາ

ບັນດາຜູ້ນໍາອາຊ່ຽນ ຖ່າຍຮູບໝູ່ຮ່ວມກັນ ກ່ອນໄຂກອງປະຊຸມສຸດຍອດ ທີ່ຮ່າໂນຍ.

ບັນດາ​ຜູ້​ນໍາ​​ເອ​ເຊຍແລະ​ຜູ້​ນໍາ​ໂລກ ​ໄປພົບ​ປະ​ກັນ​ຢູ່​ຮາ​ໂນ​ຍໃນ​ສັບປະດາ​ນີ້ ​ເພື່ອ​​ເຂົ້າ​ຮ່ວມ​ໃນ​ກອງ​ປະຊຸມ​ສຸດ​ຍອດ​ຂອງ​ສະມາຄົມ​ກຸ່ມ​ປະ​ເທດ ​ໃນ​ຂົງເຂດ​ເອ​ເຊຍ​ຕາ​ເວັນ​ອອກສຽງ​ໃຕ້ ຫລື​ອາ​ຊ່ຽນ ກັບ​ກອງ​ປະຊຸມ​ສຸດ​ຍອດ​ເອ​ເຊຍ​ຕາ​ເວັນ​ອອກ. ກອງ​ປະຊຸມ​ປະຈໍາປີ​ສອງ​ບັ້ນ​ນີ້ ​ແມ່ນ​ຈະ​ເພ່ງ​ເລັງ​ໃສ່​ເລື້ອງ​ການ​ຮ່ວມ​ມື​ໃນ​ຂົງ​ເຂດ ກັບ​ເລື້ອງ​ການ​ໂຮມເຂົ້າກັນ​ໃນ​ດ້ານ​ເສດຖະກິດ ​ແຕ່​ກໍ​ຄາດ​ວ່າ ນອກ​ນັ້ນ​ແລ້ວ ກອງ​ປະຊຸມ​ດັ່ງກ່າວຍັງ​ຈະ​​ເວົ້າ​ກັນ ​ເຖິງ​ເລື້ອງ​ຄວາມ​ວິຕົກ​ກັງ ວົນ ກ່ຽວ​ກັບການ​ຢືນຢັດ​ຂອງ​ຈີນ​ໃນ​ການ​ກ່າວ​ອ້າງ​ເອົາ​ກໍາມະສິດ ​ໃນ​ດິນ​ດອນ​ທາງ​ທະ​ເລ ​ແລະ​ເລື້ອງ​ການ​ເລືອ​ກຕັ້ງ ທີ່​ເປັນ​ບັນຫາ​ຂັດ​ແຍ້​ງກັນ​ໃນ​ມຽນມາ​ນັ້ນ​ນໍາ. ດາຣາມີລາຍງານຈາກຜູ້ສື່ຂ່າວຂອງວີໂອເອ ທີ່ຮ່າໂນຍ ມາສະເໜີທ່ານໃນອັນດັບຕໍ່ໄປ.

ເລື້ອງການ​ຮ່ວມ​ມື​ກັນ​ດ້ານ​ການ​ຄ້າ​ແລະ​ເສດຖະກິດ ​ແມ່ນຢູ່​ໃນ​ອັນ​ດັບ​ສູງ​ສຸດ​ຂອງ​ລາຍການ​ປະຊຸມ ​ເວລາ​ພວກ​ຜູ້​ນໍາ​ອາ​ຊ່ຽນ​ພົບ​ປະກັນ​ຢູ່​ຫວຽດນາມ ​ໃນ​ລະຫວ່າງ​ວັນ​ທີ 28 ຫາ 30 ຕຸລາ​ນີ້.

10 ປະ​ເທດ​ສະ​ມາຊິກ​ຂອງ​ອາຊ່ຽນ ອັນ​ມີ ບຣູ​ໄນ ມຽນມາ ກໍາປູ​ເຈຍ ອິນ​ໂດ​ເນ​ເຊຍ ສປປ ລາວ ມ​າ​ເລ​ເຊຍ ຟີ​ລິບ​ປິນ ສິງກະ​ໂປ ​ໄທ ​ແລະ​ຫວຽດນາມ ນັ້ນ ມີ​ເປົ້າ​ໝາຍ​ທີ່​ຈະ​ຈັດ​ຕັ້ງ​ປະຊາ​ຄົມ​ຫລື​ຕະຫລາດ​ຮ່ວມ ຄື​ກັນ​ກັບ​ສະຫະພາບ​ຢູ​ໂຣບນັ້ນ ຂຶ້ນ​ມາ​ພາຍ​ໃນ​ປີ 2015. ​ແຜນການ​ກໍ​ແມ່ນ​ວ່າ ​ໂຮມ​ເອົາ​ກົນ​ໄກ​ຕ່າງໆມາ ​ເພື່ອ​ປັບປຸງການ​ຮ່ວມ​ມື​ດ້ານ​ເສດ ຖະກິດ ​ແລະປະຕິບັດ​ງານ​ຮ່ວມ​ກັນ​ກ່ຽວ​ກັບ​ບັນຫາ​ຕ່າງໆ ນັບ​ຕັ້ງ​ແຕ່​ເລື້ອງ​ການ​ປ້ອງ​ກັນ​ແລະ​ອາ​ຊະ​ຍາ​ກໍາ​ຂ້າມ​ຊາດ ​ໄປ​ຈົນ​ຮອດ​ເລື້ອງ​ພະລັງງານ ສິ່ງ​ແວດ​ລ້ອມ ​ແລະ​ຄວາມ ທຸກ​ຍາກ.

ນອກ​ນີ້​ແລ້ວ ພວກ​ຜູ້​ນໍາ​ອາ​ຊ່ຽນ​ຍັງຈະ​ໄດ້​ປະຊຸມ​ກັນ​ກັບ​ປະມຸກ​ລັດ​ຈາກ​ພວກ​ປະ​ເທດ​ຄູ່​ສົນທະນາ ຫລື dialogue partners ອັນ​ມີ​ອອ໊ສ​ເຕຣ​ເລຍ ຈີນ ອິນ​ເດຍ ຍີ່ປຸ່ນ ນິວຊີ​ແລນ​ດ໌ ​ແລະ​ເກົາຫລີ​ໃຕ້​ນັ້ນ​ນໍາ​ອີກ ຢູ່​ໃນ​ກອງ​ປະຊຸມ​ສຸດ​ຍອດ ​ເອ​ເຊຍ​ຕາ​ເວັນ​ອອກ.

ສະຫະລັດ​ແລະຣັດ​ເຊຍ ​ຊຶ່ງເປັນ​ປະ​ເທດ​ສັງ​ເກດ​ການ​ຢູ່​ໃນ​ກອງ​ປະຊຸມ​ນີ້ ​ໄດ້​ຖືກ​ເຊື້ອ​ເຊີນ​ໃຫ້​ເຂົ້າ​ຮ່ວມ​ໃນ​ປີໜ້າ ຫລື 2011.

ທ່ານ Carl Thayer ​ອາຈານ​ສອນ​ວິຊາ​ການ​ເມືອງ ທີ່​ສະ​ຖາ​ບັນ​ກໍາລັງ​ປ້ອງ​ກັນ​ຂອງ​ອອ໊ສ​ເຕຣ​ເລຍ ກ່າວ​ວ່າ ປັກ​ກິ່ງ​ບໍ່​ດີ​ໃຈ​ປານ​ໃດ​ນໍາ​ການ ເຂົ້າ​ມາ​ພົວພັນຄືນ​ໃໝ່​ຂອງ​ສະຫະລັດ​ໃນ​ຂົງ​ເຂດ​ນັ້ນ ຊຶ່ງ​ຖືກ​ເບິ່ງ​ເຫັນ​ວ່າ ມີ​ເປົ້າ​ໝາຍ​ເພື່ອ​ຕ້ານ​ຢັນ​ອິດ​ທິພົນ​ຂອງ​ຈີນ.

“ໃນ​ອະດີດ​ຜ່ານ​ມາ ຈີນ​ໄດ້​ເນ້ນ​ໃສ່​ກຸ່ມ​ອາ​ຊ່ຽນບວກ​ສາມ ​ແຕ່​ມາ​ບັດ​ນີ້ ສະຫະລັດ​ໄດ້​ເຂົ້າ​ຮ່ວມ​ໃນ​ກອງ​ປະຊຸມ​ສຸດ​ຍອດ​ເອ​ເຊຍ​ຕາ​ເວັນ​ອອກນໍາ. ດັ່ງ​ນັ້ນ ສະຫະລັດ​ຈຶ່ງບໍ່​ຢູ່ໃນ​ເງົາ​ມືດ​ອີກ​ແລ້ວ ​ແຕ່​ມາ​ຢູ່ຈຸດໃຈກາງຂອງ​ເວທີ​ແລ້ວ.”

ເຈົ້າໜ້າ​ທີ່​ຈີນໄດ້​ມີ​ປະຕິກິລິຍາ​ຕອບ​ຢ່າງ​ແຮງ​ ຫລັງ​ຈາກ​ທີ່​ທ່ານ​ນາງ Hillary Clinton ລມຕ ການ​ຕ່າງປະ​ເທດ​ສະຫະລັດ ​ໄດ້​ກ່າວ​ຢູ່​ໃນກອງ​ປະຊຸມ​ອາ​ຊ່ຽນ​ເມື່ອ​ເດືອນ​ລະ​ກົດ​ຜ່ານ​ມາ​ວ່າ ​ເສລີພາບ​ໃນ​ການ​ເດີນທະ​ເລຢູ່​ໃນ​ເຂດ​ທະ​ເລ​ຈີນ​ໃຕ້​ນັ້ນ ​ແມ່ນ​ນອນ​ຢູ່​ໃນ​ຜົນ​ປະ​ໂຫຍ​ດ ຂອງ​ສະຫະລັດ.

ປັກ​ກິ່ງ​ໄດ້​ອ້າງ​ເອົາ​ກໍາມະ​ສິດ​ໃນ​ເຂດ​ທະ​ເລ​ຈີນ​ໃຕ້​ທັງ​ໝົດ ຊຶ່ງ​ເຮັດໃຫ້​ຈີນ​ຂັດ​ແຍ້​ງກັນ​ກັບບຣູ​ໄນ ມາ​ເລ​ເຊຍ ຟີ​ລິບ​ປີນ ​ໄຕ້​ຫວັນ ​ແລະ​ຫວຽດນາມ ທີ່​ຕ່າງ​ກໍ​ໄດ້​ອ້າງ​ເອົາ​ກໍາມະສິດ​ໃນ​ໝູ່​ເກາະ Paracel ​ແລະ Spratly ​ໃນ​ເຂດທະ​ເລ​ດັ່ງກ່າວ​ນັ້ນ. ​ເຊື່ອ​ກັນ​ວ່າ ພວກ​ເກາະ​ເຫລົ່າ​ນັ້ນ ອຸດົມສົມບູນ​ໄປ​ດ້ວຍ​ບໍ່​ນໍ້າມັນ​ແລະ​ບໍ່​ແກ໊ສທໍາ​ມະ​ຊາດ. ນອກ​ນີ້​ແລ້ວ ກໍຍັງ​ຢູ່​ໃກ້​ເສ້ນ​ທາງ​ເດີນ​ທະ​ເລ​ທີ່​ສໍາຄັນ.

ການ​ຄ້າ​ລະຫວ່າງ​ຈີນ​ກັບ​ອາ​ຊ່ຽນ ຖີບ​ຂຶ້ນ 50% ​ໃນ​ປີ​ນີ້ ຫລັງ​ຈາກ​ທີ່ ສັນຍາ​ການ​ຄ້າ​ເສລີ​ສະບັບ​ນຶ່ງ ​ໄດ້​ມີ​ຜົນ​ບັງຄັບ​ໃຊ້​ໃນ​ເດືອນ​ມັງກອນ​ປີ​ນີ້.

ທ່ານ Mark Beeson ອາຈານ​ສອນ​ວິຊາ​ການ​ເມືອງ​ແລະ​ສາຍ​ພົວພັ ລະຫວ່າງ​ປະ​ເທດ ທີ່​ມະຫາວິທະຍາ​ໄລ​ Western Australia ກ່າວ​ວ່າ ​ແຕ່​ເຖິງ​ແມ່ນ​ຈະ​ມີ​ສາຍ​ພົວພັນ​ດ້ານ​ເສດຖະກິດ​ທີ່​ຂະຫຍາຍ​ໂຕ​ອອກນັບ​ມື້​ກໍ​ຕາມ ການ​ຢືນ​ຢັດ​ເອົາ​ກໍາມະ​ສິດ​ຂອງ​ຈີ​ນ ກໍ​ກໍາລັງ​ສ້າງ​ຄວາມເຄ່ງ​ຕຶງ​ຂຶ້ນ ຊຶ່ງ​ທ່ານ​ອະທິ​ບາຍ​ວ່າ:

“ພວກປະເທດທີ່ນ້ອຍກ່ວາ ຈໍານວນ​ນຶ່ງ​ໃນຂົງເຂດເອເຊຍຕາເວັນອອກສຽງໃຕ້ນັ້ນ
ຖ້າຈະເວົ້າໃນແງ່ວັດຖຸແລະຍຸດທະສາດແລ້ວ ແນ່ນອນວ່າ ພວກ​ເຂົາ​ເຈົ້າ​ມີ​ຄວາມ
ເປັນຫ່ວງ ກ່ຽວກັບການໂຜ່ໂຕຂື້ນມາຂອງຈີນ ເພາະພວກເຂົາເຈົ້າຮູ້ສຶກວ່າ​ກໍາລັງ​
ຖືກຂົ່ມຂູ່​ແບບ​ໃດ​ແບບ​ນຶ່ງ ແລະຂ້າພະເຈົ້າຄິດວ່າ ເຫດການຕ່າງໆ​ເມື່ອ​ບໍ່​ນານມານີ້
ໂດຍສະເພາະ​ໃນ​ເລື້ອງ​ທີ່​ພົວພັນກັບຍີ່ປຸ່ນ ແລະພຶດຕິການຂອງຈີນໃນເຂດທະເລ
ຈີນໃຕ້ນັ້ນ ​ແມ່ນໄດ້ກໍ່ໃຫ້ເກີດຄວາມວິຕົກກັງວົນຢູ່​ໃນ​ທົ່ວຂົງເຂດ ແລະເລຶ່ອງນີ້ ຈະເປັນຈຸດເພັ່ງເລັ່ງທີ່ໃຫຍ່ອັນນຶ່ງຂອງການປຶກສາຫາລືກັນໃນກອງ​ປະຊຸມ ທີ່ຈະ ມາເຖິງນີ້ ທີ່ຫວຽດນາມນັ້ນ.”

ບັນດາ​ຜູ້​ບໍລິການ​ການ​ຄ້າ​ເວົ້າ​ວ່າ ຈີນ​ໄດ້​ຕັດ​ການ​ສົ່ງ​ອອກ​ແຮ່​ທາດ​ທີ່​ຫາ​ຍາກ​ ​ໄປ​ໃຫ້​ຍິ່ປຸ່ນ
ນັ້ນລົງ ຫລັງ​ຈາກ​ເຮືອ​ລາດຕະ​ເວນ​ຂອງ​ຍິ່ປຸ່ນ​ໄດ້​ຍຶດ​ແລະ​ກັກ​ເຮືອ​ປະມົງ​ຂອງ​ຈີນ​ລໍາ​ນຶ່ງ​ໄວ້
ໃນ​ເດືອນ​ກັນຍາ ຢູ່​ໃກ້ໆ​ໝູ່​ເກາະ ທີ່​ເປັນ​ບັນຫາ​ຜິດ​ຖຽງກັນ​ນັ້ນ.

ແລະ​ທາງ​ກອງທັບ​ເຣືອຂອງ​ຈີນ ກໍ​ໄດ້​ກັກ​ເຮືອ​ປະມົງ​ຂອງ​ຫວຽດນາມ​ໄວ້​ເປັນ​ປະ​ຈໍາ ຢູ່​ໃນ​ເຂດ​ທະ​ເລ​ຈີນ​ໃຕ້ ຊຶ່ງ​ກໍ່​ໃຫ້​ເກີດ​ຄວາມ​ເປັນ​ຫ່ວງ​ວ່າ ຈີນ​ມີ​ຄວາມ​ຕັ້ງ​ໃຈ​ທີ່​ຈະ​ຢືນ​ຢັດ​ການ​ກ່າວ​ອ້າງ​ເອົາ​ກໍາ​ມະ​ສິດ​ໃນ​ດິນ​ດອນ​ຂອງ​ຕົນ ​ໂດຍ​ການ​ນໍາໃຊ້​ທັງ​ກໍາລັງ​ທາງ​ເສ​ດຖະກິດ​ແລະ​ທະຫານ.

ຊາວມຽນມາ ພາກັນໄປລົງທະບຽນເລືອກຕັ້ງ ທີ່ເມືອງ Naypyitaw ນະຄອນຫລວງໃໝ່ ເພື່ອຈະໄດ້ປ່ອນບັດ ໃນການເລືອກຕັ້ງສະພາໃນວັນທີ 7 ພະຈິກ ທີ່ຈະມາ ເຖິງນີ້.
ຊາວມຽນມາ ພາກັນໄປລົງທະບຽນເລືອກຕັ້ງ ທີ່ເມືອງ Naypyitaw ນະຄອນຫລວງໃໝ່ ເພື່ອຈະໄດ້ປ່ອນບັດ ໃນການເລືອກຕັ້ງສະພາໃນວັນທີ 7 ພະຈິກ ທີ່ຈະມາ ເຖິງນີ້.

ເປັນ​ທີ່​ຄາດ​ເຊ່ນ​ກັນ​ວ່າ ໃນ​ກອງ​ປະຊຸມ​ທັງ​ສອງ​ບັ້ນ​ທີ່​ຮາ​ໂນ​ຍນັ້ນ ຈະ​ມີ​ການເວົ້າ​ເຖິງ​ເລື້ອງ​ຄວາມ​ເປັນ​ຫ່ວງ​ກ່ຽວ​ກັບ​ການ​ເລືອກ​ຕັ້ງ​ ຢູ່​ໃນ​ມຽນມາ ​ໃນ​ວັນ​ທີ 7 ພະຈິກ​ນັ້ນ.

ລັດຖະບານ​ທະຫານ​ຂອງ​ມຽນມາ​ໄດ້ກ່າວ​ວ່າ ການ​ເລືອກ​ຕັ້ງ​ຄັ້ງ​ນີ້​ແມ່ນ ສ່ວນ​ນຶ່ງ​ຂອງ​ການ​ຫັນປ່ຽນ​ໄປ​ສູ່​ປະຊາທິປະ​ໄຕ​ໃນ​ມຽນມາ ລຸນ​ຫລັງ​ການ​ປົກຄອງ​ໂດຍ​ທະຫານ ມາ​ເປັນ​ເວລາ​ເຄິ່ງສັດຕະວັດ. ​ແຕ່​ວ່າ​ຝ່າຍທະຫານ​ໄດ້ຮັບ​ການຄໍ້າປະກັນ​ບ່ອນ​ນັ່ງ ໃນ​ຈໍານ​ວນ ¼ ຂອງບ່ອນ​ນັ່ງ​ທັງ​ໝົດໃນ​ສະພາ​ແຫ່ງ​ຊາດ ແລະບໍ່​ໃຫ້​ໂອກາດ​ເທົ່າ​ທຽມ​ກັນ​ແກ່​ພວກພັກ ​ຝ່າຍ​ຄ້ານ ທັງ​ບໍ່​ຍອມ​ໃຫ້​ພວກ​ຊົນ​ກຸ່ມ​ນ້ອຍ​ຫລາຍ​ລ້ານ​ຄົນ ​ມີ​ໂອກາດໄດ້​ປ່ອນ​ບັດ.

ທ່ານ Thayer ກ່າວ​ວ່າ ອາ​ຊ່ຽນ​ຄົງ​ຈະ​ບໍ່​ຕໍາ​ໜິຕິຕຽນ​ການ​ເລືອກ​ຕັ້ງ​ໃນ​ມຽນມາ ຫລື​ພະມ້າ​ນັ້ນ. ທ່ານ​ອະທິບາຍ​ວ່າ ອາ​ຊ່ຽນຊື່​ງເປັນ​ກຸ່ມ​ຈັດຕັ້ງ​ ຂອງຫລາຍ​ປະ​ເທດປະຊາທິປະ​ໃຕ​ທີ່​ແຂງ​ເຮ​ງ ​ເຊ່ນ​ອິນ​ໂ​ດ​ເນ​ເຊຍ ກັບປະ​ເທດ​ນຶ່ງທີ່​ປົກຄອງ​ໂດຍ​ລະບອບ​ລາຊາທິປະ​ໄຕ ກັບ​ອີກສອງ​ປະ​ເທດ​ຄອມ​ມິວນິສຕ໌ທີ່​ປົກຄອງ​ໂດຍ​ພັກ​ດຽວ ​ແລະ​ປະ​ເທດ​ອື່ນໆ​ອີກ​ທີ່ຢູ່​ໃນ​ລະ ຫວ່າງ​ກາ​ງນັ້ນ ຈະ​ຕ້ອງ​ໄດ້​ດໍາ​ເນີນ​ສາຍ​ກາງ​ໃນ​ລະຫວ່າງ​ຄວາມ​ເປັນ​ຫ່ວງ​ກ່ຽວ​ກັບ​ປະຊາ ທິປະ​ໄຕ ກັບກົດ​ລະບຽບ​ທີ່​ໄດ້​ຕັ້ງ​ຂຶ້ນ ທີ່​ຫ້າມ​ການ​ແຊກ​ແຊງ​ເຂົ້າ​ໃນ​ກິດຈະການ​ພາຍ​ໃນ​ ຂອງ​ສະມາຊິກ​ນັ້ນ.

“ດັ່ງ​ນີ້ ມັນຈຶ່ງ​ເປັນ​ບັນຫາ​ຫຍຸ້ງຍາກ​ອັນ​ນຶ່ງ. ມັນ​ງ່າຍ​ທີ່​ຈະ​ປະນາມ ​ແຕ່​ມັນ​ຍາກ​ທີ່​ຈະ​ເຮັດນໍາ ​ແຕ່​ກຸ່ມ​ອາ​ຊ່ຽນກໍ​ຈະ​ຕ້ອງ​ໄດ້​ທົນ​ກັບ​ສະຖານະການ​ແບບ​ນີ້ ​ເພາະວ່າ ຖ້າ​ພວກ​ເຮົາ​ມອງ​ເບິ່ງ​ການ​ເລືອກ​ຕັ້ງ​ໃນ​ກໍາປູ​ເຈ​ຍຫລື​ໃນ​ລາວ ຫລື​ໃນ​ຫວຽດນາມ ຊຶ່ງ​ເປັນ​ການ​ເລືອກ​ຕັ້ງ​ແບບ​ຈອມ​ປອມນັ້ນ​ແລ້ວ ການ​ເລືອກ​ຕັ້ງໃນ​ມຽນມາ ເວົ້າໃນ​ຫລາຍ​ໆຈຸດ​ແລ້ວ ກໍ​ແມ່ນຈະ​ດີກ​ວ່າພວກໂຕ​ຢ່າງ​ທີ່​ເວົ້າມາ​ນັ້ນ ​ໜ້ອຍ​ນຶ່ງ.”

ເລຂາ​ທິການ​ໃຫຍ່​ຂອງ​ອົງການ ສປຊ ທ່ານ Ban Ki-moon ກໍ​ຈະ​ໄປ​ຮ່ວມກອງ​ປະຊຸມ​ທີ່​ຮາ​ໂນ​ຍນັ້ນ​ເຊ່ນ​ກັນ. ທ່ານ Ban ​ເວົ້າ​ວ່າການ ​ເລືອກ​ຕັ້ງໃນ​ມຽນມາ ຈະ​ບໍ່​ທີ​ຄວາມ​ຖືກຕ້ອງ​ຊອບ​ທໍາ ຕາບ​ໃດ​ທີ່​ທ່ານ​ນາງ​ອອງ ຊານ​ຊູ​ຈີ ຍັງ​ຖືກ​ກັກ​ບໍລິ​ເວນ​ຢູ່.

ພັກ​ສັນນິບາດ​ແຫ່ງ​ຊາດ​ເພື່ອ​ປະຊາທິປະ​ໄຕ​ຂອງ​ທ່ານ​ນາງ ​ໄດ້​ຊະນະ ການ​ເລືອກ​ຕັ້ງ​ເທື່ອ​ແລ້ວ​ຂອງ​ມຽນມາ ​ເມື່ອ​ປີ 1990 ນັ້ນ ​ແຕ່​ພວກ​ທະຫານ​ບໍ່​ເອົາ​ຫົວຊາ​ຕໍ່​ຜົນ​ການ​ເລືອກ​ຕັ້ງ ​ແລະ​ໄດ້​ກັກ​ຂັງ​ທ່ານ​ນາງ​ໄວ້ ຈະ​ຫລອດ​ເວລາ​ສ່ວນ​ໃຫຍ່ ນັບ​ແຕ່​ນັ້ນ​ມາ.

XS
SM
MD
LG