ບັນດາເຈົ້າໜ້າທີ່ໃນນະຄອນຫລວງຮາໂນຍກ່າວວ່າ ມີລາຍງານແຈ້ງໃຫ້ຊາບວ່າ ປະຊາຊົນ 7 ຄົນຫາຍສາບສູນ ແລະຢ້ານວ່າເສຍຊີວິດໄປແລ້ວ ຍ້ອນໄພດິນເຈື່ອນຢູ່ໃນພາກເໜືອຂອງຫວຽດນາມ.
ອົງການຂ່າວສານຫວຽດນາມຂອງທາງການເວົ້າວ່າ ພວກທີ່ຫາຍສາບສູນໄປທັງໝົດ ເປັນຊາວເຜົ່າມົ້ງທີ່ອາໄສຢູ່ໃນໝູ່ບ້ານ Than Chu Chay ໃນ ແຂວງ Yen Bai.
ລາຍງານເວົ້າວ່າ ດິນເຈື່ອນເກີດຂຶ້ນໃນຕອນບ່າຍວັນອາທິດວານນີ້ ໃນລະຫວ່າງທີ່ດິນຟ້າອາກາດຈະແຈ້ງ ແຕ່ພວກປະຊາຊົນໃນທ້ອງຖິ່ນໄດ້ຮັບການເຕືອນມາກ່ອນແລ້ວວ່າ ອາດຈະເກີດດິນເຈື່ອນໃນລະຫວ່າງລະດູຝົນນີ້.
ລາຍງານເວົ້າວ່າ ພວກຜູ້ນໍາໃນຫົວເມືອງໄດ້ໃຫ້ເງິນຊ່ອຍເຫລືອ ຈໍານວນ 160 ດອນລາຕໍ່ຄອບຄົວຂອງພວກທີ່ໄດ້ຮັບເຄາະຮ້າຍ ເພື່ອເປັນຄ່າໃຊ້ຈ່າຍໃນພິທີຝັງສົບຂອງເຂົາເຈົ້າ.
