ອະດີດລັດຖະມົນຕີປ້ອງກັນປະເທດ ທ່ານ ຊິເກຣຸ ອິຊິບະ (Shigeru Ishiba) ກຽມຂຶ້ນເປັນນາຍົກລັດຖະມົນຕີຄົນຕໍ່ໄປຂອງຍີ່ປຸ່ນ ໃນວັນສຸກມື້ນີ້ ຫຼັງຈາກໄດ້ ຊະນະການແຂ່ງຂັນທີ່ສູສີກັນ ໃນຄວາມພະຍາຍາມຄັ້ງທີ່ 5 ແລະຄັ້ງສຸດທ້າຍ ຂອງທ່ານ ໃນການເປັນຫົວໜ້າພັກເສລີປະຊາທິປະໄຕ ຫຼື LDP ເຊິ່ງເປັນ ພັກລັດຖະບານ, ອີງຕາມອົງການຂ່າວ Reuters.
ອະດີດລັດຖະມົນຕີປ້ອງກັນປະເທດ ທີ່ມີອາຍຸ 67 ປີ ໄດ້ເອົາຊະນະ ນັກການ ເມືອງຊາດນິຍົມຫົວຈັດ ທ່ານນາງ ຊານາເອະ ທາກາອິຈິ (Sanae Takaichi) ໃນການເລືອກຕັ້ງຮອບຕັດສິນ ເຊິ່ງຖືເປັນການເລືອກຕັ້ງຫົວໜ້າພັກທີ່ຄາດເດົາ ໄດ້ຍາກທີ່ສຸດຄັ້ງນຶ່ງ ໃນຮອບຫຼາຍທົດສະວັດ ໂດຍມີຜູ້ສະຫມັກຫຼາຍເຖິງ 9 ຄົນ ລົງແຂ່ງຂັນ.
ຜູ້ນໍາຂອງ LDP, ເຊິ່ງໄດ້ປົກຄອງຍີ່ປຸ່ນມາເກືອບຕະຫຼອດໄລຍະຫຼັງສົງຄາມ, ໝັ້ນໃຈຢ່າງຍິ່ງວ່າຕົນ ຈະກາຍເປັນນາຍົກລັດຖະມົນຕີຄົນຕໍ່ໄປ ເນື່ອງຈາກວ່າ ມີສຽງສ່ວນໃຫຍ່ໃນລັດຖະສະພາ.
ການຍາດແຍ່ງກັນ ເພື່ອແທນຕຳແໜ່ງນາຍົກລັດຖະມົນຕີຄົນປັດຈຸບັນ, ທ່ານ ຟູມິໂອະ ຄິຊິດະ, ໄດ້ເລີ້ມຕົ້ນຂຶ້ນໃນເດືອນສິງຫາ ໃນເວລາທີ່ທ່ານໄດ້ປະກາດ ຄວາມຕັ້ງໃຈທີ່ຈະລາອອກຈາກຕໍາແໜ່ງຂອງທ່ານ ເນື່ອງຈາກເກີດເລື່ອງຫຍໍ້ ທໍ້ຕ່າງໆຫຼາຍຄັ້ງ ທີ່ເຮັດໃຫ້ຄະແນນນິຍົມຂອງ LDP ຕົກຕໍ່າລົງເປັນປະຫວັດ ການ.
"ພວກເຮົາຕ້ອງເຊື່ອໝັ້ນໃນປະຊາຊົນ, ເວົ້າຄວາມຈິງດ້ວຍຄວາມກ້າຫານ ແລະ ຄວາມຈິງໃຈ, ແລະເຮັດວຽກຮ່ວມກັນເພື່ອເຮັດໃຫ້ຍີ່ປຸ່ນ ເປັນປະເທດທີ່ປອດ ໄພແລະໝັ້ນຄົງ ທີ່ທຸກຄົນສາມາດດໍາລົງຊີວິດຢ່າງມີຄວາມສຸກໄດ້ອີກເທື່ອນຶ່ງ," ທ່ານ ອິຊິບະ (Ishiba) ກ່າວໃນຄໍາປາໄສສັ້ນໆຕໍ່ສະມາຊິກສະພາຫລັງຈາກຮູ້ ຜົນການເລືອກຕັ້ງ.
ທ່ານ ອິຊິບະ (Ishiba) ຕ້ອງເຮັດໃຫ້ຄວາມໂກດແຄ້ນຢູ່ໃນບ້ານກ່ຽວກັບຄ່າຄອງຊີບທີ່ເພີ່ມຂຶ້ນ ສະຫງົບລົງ ແລະຕ້ອງມີທິດທາງ ຢູ່ໃນສະພາບແວດລ້ອມດ້ານຄວາມໝັ້ນຄົງທີ່ບໍ່ແນ່ນອນ ໃນເອເຊຍຕາເວັນອອກ ທີ່ໄດ້ຮັບແຮງກະຕຸ້ນ ຈາກຈີນທີ່ສະແດງອອກຢ່າງແຂງແກ່ນຫຼາຍຂຶ້ນ ແລະ ເກົາຫຼີເໜືອ ທີ່ມີອາວຸດນິດເຄລຍ.
ແນວທາງການທູດຂອງທ່ານ ກັບປະເທດພັນທະມິດທີ່ໃກ້ຊິດທີ່ສຸດຂອງຍີ່ປຸ່ນ ຄື ສະຫະລັດ ຈະຢູ່ໃນຈຸດສຸມ ເນື່ອງຈາກທ່ານໄດ້ຮຽກຮ້ອງຊໍ້າແລ້ວ ຊໍ້າອີກ ໃຫ້ມີການພົວພັນທີ່ດຸນດ່ຽງ ຫຼາຍຂຶ້ນ.
