ລິ້ງ ສຳຫລັບເຂົ້າຫາ

ທ່ານ Chavez ເປີດປະຊຸມ ສຸດຍອດພູມີພາກ

  • ໄພສານ ວໍຣະຈັກ

ພວກຜູ້ນຳຂອງປະເທດຕ່າງໆພາກັນຢືນຂຶ້ນ ໃນລະຫວ່າງພິທີເປີດ ກອງປະຊຸມສຸດຍອດປະຊາຄົມນາໆຊາດໃນ ເຂດອະເມຣິກາລາຕິນ ແລະທະເລຄາຣິບບຽນ ທີ່ມີສະມາຊິກ 33 ປະເທດ ທີ່ເວເນຊູເອລາ (2 ທັນວາ 2011)

ປະທານາທິບໍດີເວເນຊູເອລາ ທ່ານ Hugo Chavez ເປີດກອງປະຊຸມສຸດຍອດຂອງພວກຜູ້ ນຳໃນເຂດອະເມຣິກາລາຕິນເພື່ອສະເຫຼີມສະຫຼອງກຸ່ມຈັດຕັ້ງໃນພູມີພາກໃໝ່ທີ່ບໍ່ໃຫ້ສະຫະລັດ
ແລະຄານາດາເຂົ້າຮ່ວມ.

ພວກຜູ້ນຳໃນພູມີພາກໄດ້ໄປເຕົ້າໂຮມກັນທີ່ນະຄອນຫຼວງກາຣາກາສໃນມື້ວັນສຸກວານນີ້ເພື່ອ
ຈັດຕັ້ງປະຊາຄົມປະຊາຊາດໃນເຂດອະເມຣິກາລາຕິນແລະທະເລຄາຣິບຽນຫຼື CELAC ທີ່ມີ
ສະມາຊິກ 33 ປະເທດ. ບໍ່ຄືກັນກັບອົງການບັນດາປະເທດໃນທະວີບອະເມຣິກາ ຫຼື OAS ຊຶ່ງມີສຳນັກງານທີ່ກຸງວໍຊິງຕັນ ອົງການ CELAC ຈະມີຄິວບາເປັນສະມາຊິກ. ປະທານາທິ
ບໍດີຄິວບາທ່ານ Raul Castro ແລະປະທານາທິບໍດີບຣາຊີລທ່ານນາງ Dilma Rousseff ແມ່ນສ່ວນນຶ່ງຂອງບັນດາຜູ້ນຳທີ່ໄປຮ່ວມກອງປະຊຸມຢູ່ນະຄອນກາຣາກາສ.

ເມື່ອມີການຖາມກ່ຽວກັບການບໍ່ໃຫ້ສະຫະລັດເຂົ້າຮ່ວມໃນກຸ່ມດັ່ງກ່າວນີ້ ໂຄສົກຂອງກະຊວງ
ການຕ່າງປະເທດສະຫະລັດ ທ່ານ Mark Toner ກ່າວວ່າ ສະຫະລັດຈະສືບຕໍ່ດຳເນີນງານ
ຮ່ວມກັບບັນດາປະເທດໃນເຂດອະເມຣິກາລາຕິນໂດຍຜ່ານອົງການ OAS.

ການພົບປະສຸດຍອດທີ່ວ່ານີ້ມີກຳນົດທີ່ຈະຈັດຂຶ້ນໃນເດືອນກໍລະກົດຜ່ານມາເພື່ອໃຫ້ຖືກກັນ
ກັບວັນເອກກະລາດຄົບຮອບ 200 ປີຂອງເວເນຊູເອລາ. ການເຈລະຈາຫາລືໄດ້ມີການຊັກ
ຊ້າຍ້ອນທ່ານ Chavez ໄດ້ພັກຟື້ນຈາກການຜ່າຕັດທີ່ກຸງຮາວານາ ເພື່ອເອົາເນື້ອງອກມະ
ເຮັງອອກ. ຜູ້ນຳຂອງເວເນຊູເອລາບໍ່ໄດ້ແຈ້ງໃຫ້ຊາບວ່າ ມີການກວດພົບມະເຮັງຊະນິດໃດ
ແຕ່ກໍເວົ້າວ່າ ທ່ານໄດ້ເອົາຊະນະພະຍາດດັ່ງກ່າວນີ້ໄດ້ແລ້ວ.

ປະທານາທິບໍດີ Chavez ກ່າວກ່ອນໜ້ານີ້ວ່າ ທ່ານຈະມີສຸຂະພາບດີພໍເພື່ອໂຄສະນາຫາ
ສຽງແລະຊະນະການເລືອກຕັ້ງເຂົ້າຮັບຕຳແໜ່ງຕື່ມອີກ 6 ປີໃນປີ 2012. ທ່ານ Chavez
ຊຶ່ງມີອາຍຸ 57 ປີໃນເວລານີ້ໄດ້ເຂົ້າກຳອຳນາດນັບແຕ່ 1999 ເປັນຕົ້ນມາ.

XS
SM
MD
LG