ປ. ເວ​ນີຊູ​ເອລາ ຈັດ​ໃຫ້ມີ ​ກອງປະຊຸມ ​ສັນຕິພາບ​​ ກັບ​ທຸກ​ຝ່າຍ (ວີ​ດີ​ໂອ/ສະໄລດ໌)

ປະທານາທິບໍດີ​ເວ​ນີຊູ​ເອລາ ທ່ານ Nicolas Maduro ​ໄດ້​ຈັດ​ໃຫ້
ມີ​ກອງປະຊຸມ​ສັນຕິພາບໃນ​ຂະນະ​ທີ່​ທ່ານຊອກ​ຄົ້ນຫາ​ການແກ້ໄຂ ​
ເພື່ອ​ຍຸຕິ​ການ​ປະ​ທ້ວງ​ຕໍ່ຕ້ານ​ລັດຖະບານທີ່ຍັງ​ຜົນ​ໃຫ້​ມີຫຼາຍ​ກວ່າ
ສິບ​ຄົນ ​ໄດ້​ເສຍ​ຊີວິດ​ນັ້ນ. ​

ທ່ານ Maduro ກ່າວ​ວ່າ: “ພວກ​ເຮົາ​ຕ້ອງ​ໄດ້​ເອົາ​ບາດ
ກ້າວ​ຢ່າງ​ໄວວາ​ ແລະ​ຍ້ອນ​ສາເຫດ​ນີ້ ຂ້າພະ​ເຈົ້າ​ຈຶ່ງ​
ໄດ້​ຮຽກຮ້ອງ​ໃຫ້​ມີ​ກອງປະຊຸມສັນຕິພາບ​ແຫ່ງຊາດຂຶ້ນ
​ເພື່ອເປັນການ​ເລີ່​ມຕົ້ນ ຂອງ​ການ​ດໍາ​ເນີນ​ງານ ພວກ​ເຮົາ​
ຕ້ອງ​ຊອກຫາ​ກົນ​ໄກ​ຕ່າງໆ​ ຟັງເບິ່ງ​ວ່າ ​ແນວທາງ​ໃດ
ມັນ​ຈະ​ສາມາດ​ປະຕິບັດ​ໄດ້ ​ເພື່ອ​ວ່າ ພວກ​ເຮົາ​ຈະ​
ປະສານ​ງານ ​ແລະ​ປະຕິບັດໄດ້​ເລີຍ.”

ຄໍາ​ ເຫັນ​ຂອງທ່ານ Maduro ມີ​ຂຶ້ນ​ໃນລະຫວ່າງ​ການ​ພົບ​ປະກັນ​ຂອງຜູ້​ນໍາ ​ ທາງ​ສາສະໜາ​
ແລະ​ນັກທຸລະກິດ ​ໃນ​ແລງ​ວັນ​ພຸດ​ວານ​ນີ້ ຊຶ່ງ​ຮວມທັງບາງຄົນທີ່ຄັດ​ຄ້ານ​ຕໍ່​ລັດຖະບານ
​ຂອງ​ທ່ານ.

ການ​ປະ​ທ້ວງ​ດັ່ງກ່າວ​ນີ້ ​ເປັນການ​ທ້າ​ທາຍ​ທີ່​ໃຫຍ່​ສຸດ ຕໍ່ການ​ບໍລິຫານ​ປະ​ເທດໃນເວລາ
10 ​ເດືອນ ຂອງ​ທ່ານ Maduro.

ພວກ​ນັກ​ຕິຕຽນ​ບາງ​ຄົນກ່າວ​ວ່າ ທ່ານ Maduro ​ແມ່ນ​ໃຊ້​ກອງ​ປະຊຸມ​ທີ່​ວ່າ​ນີ້ ເພື່ອຫັນ
ເຫຄວາມ​ສົນ​ໃຈໄປ​ຈາກການບໍລິຫານ​ປະ​ເທດຂອງລັດຖະບານທ່ານ ທີ່​ບໍ່​ໄດ້​ແກ້​ໄຂ
​ບັນຫາອັນແທ້ຈິງ ​ທີ່ພວມ​ປະ​ເຊີນ​ໜ້າ​ເວ​ນີຊູ​ເອລາ ໃນເວລານີ້.

ກອງປະຊຸມສັນຕິພາບ ​ໄດ້ມີ​ຂຶ້ນໃນ​ມື້​ດຽວ​ກັນ ກຸ່ມ​ອົງການແມ່​ຍິງເວ​ນີຊູ​ເອລາ​ແລະ​ພວກ
ຊາວນາ ​ໄດ້​ພາກັນ​ໂຮມ​ຊຸມນຸມ ​ທີ່ນະຄອນ​ຫຼວງ​ Caracas ​ເພື່ອ​ຍໍ້າ​ ເຕືອນ​ປະທາ​ນາ​ທິບໍດີ
​ເຖິງ​ຄວາມ​ຈໍາ ​ເປັນອັນຮີີບດ່ວນ​ທີ່​ຈະ​ແກ້​ໄຂບັນຫາຕ່າງໆທີ່ພາໃຫ້ມີການປະ​ທ້ວງ​ນັ້ນ.

ນອກນັ້ນພວກ​ປະ​ທ້ວງ​ ຍັງ​ຮຽກຮ້ອງ​ໃຫ້​ປະທານາທິບໍດີ​ແກ້ໄຂບັນຫາ​ອາ​ຊະ​ຍາ​ກໍາ​ ແລະ​
ການ​ຂາດ​ແຄນ​ເຄື່ອງ​ໃຊ້​ຂອງ​ສອຍ​ຂັ້ນ​ພື້ນ​ຖານນັ້ນ​ນໍາ.