ປະທານາທິບໍດີ ເວເນຊູເອລາ ທ່ານ Nicolas Maduro ໃນວັນອັງຄານວານນີ້ ໄດ້ຂະຫຍາຍໜ້າທີ່ຢ່າງໃຫຍ່ ໃຫ້ແກ່ຜູ້ບັນຊາການທະຫານຂອງທ່ານ ນາຍພົນ Viadimir Padrino ມອບໝາຍໃຫ້ທ່ານມີຄວາມຮັບຜິດຊອບໃນການແຈກຢາຍອາຫານແລະຢາປົວພະຍາດ ແລະມອບໃຫ້ທະຫານກຳກັບດູແລທ່າເຮືອທີ່ສຳຄັນ 5 ແຫ່ງຂອງເທດ.
ໃນຂະນະທີ່ວິກິດການເສດຖະກິດເພີ້ມຄວາມຮ້າຍແຮງຂຶ້ນນັ້ນ ທ່ານ Maduro ໄດ້ຈັດຕັ້ງ ການປຸກລະດົມເພື່ອຖອນຮາກພວກສໍ້ລາດບັງຫລວງ ແລະພວກບໍລິ ຫານງານດ້ວຍຄວາມຜິດພາດ ທີ່ໄດ້ເຮັດໃຫ້ເວເນຊູເອລາ ຂາດເຂີນສິ່ງຂອງທີ່ມີຄວາມຈຳເປັນຫລາຍຢ່າງ.
ທ່ານ Maduro ໄດ້ມອບໝາຍໃຫ້ນາຍພົນ Efrain Velasco ກຳກັບທ່າເຮືອ ທີ່ຈະດູແລ ທ່າເຮືອສຳຄັນ 5 ແຫ່ງຂອງປະເທດໂດຍກົງ ຢູ່ Guanta, La Guaira, Puerto Cabello, Maracaibo ແລະ Guamache.
ໃນຂະນະທີ່ມີການປະທ້ວງກ່ຽວກັບການປັນສ່ວນອາຫານ ແລະລຽນແຖວຍາວຢູ່ຕາມຮ້ານຄ້ານັ້ນ ທ່ານ Padrino ກ່າວວ່າ ທ່ານຫວັງວ່າ ການນຳເອົາທະຫານມາກຳກັບໃນການແຈກຢາຍອາຫານ ຈະຊ່ວຍເຮັດໃຫ້ສະພາບການທີ່ວຸ້ນວາຍຈຳ ນວນນຶ່ງສະຫງົບລົງ ແລະການລັກລອບຕ່າງ. ແຕ່ກໍໄດ້ເຕືອນວ່າ ທ່ານບໍ່ຕ້ອງ ການ ໃຫ້ເວເນຊູເອລາກາຍເປັນປະເທດຜະເດັດການທາງທະຫານ.
ທ່ານກ່າວໃນວັນອັງຄານວານນີ້ວ່າ “ມັນບໍ່ກ່ຽວກັບເລື້ອງທະຫານ ຂ້າພະເຈົ້າບໍ່ຢາກເຫັນທະຫານເຂົ້າມາພົວພັນຢູ່ໃນຂົງເຂດທີ່ບໍ່ແມ່ນໜ້າທີ່ຂອງທະຫານ ແຕ່ນີ້ເປັນຄຳຖາມດ້ານຄວາມໝັ້ນຄົງຂອງປະເທດ ແລະປ້ອງກັນມາຕຸພູມ.”
ປະເທດເວເນຊູເອລາ ໄດ້ລະມັດລະວັງກ່ຽວກັບສະພາບດ້ານການເງິນ ທີ່ໄດ້ຖືກລົບກວນຢ່າງຮ້າຍແຮງໃນອາທິດນີ້ ເວລາລາບໍລິສັດສະຫະລັດ Kimberly-Clark ຜູ້ຜະລິດສິນ
ຄ້າຢູ່ທີ່ນັ້ນໄດ້ປະກາດວ່າ ຈະປິດໂຮງງານຢູ່ປະເທດເວເນຊູເອລາ ແລະທະນາຄານ Citi Bank ກໍໃກ້ເຂົ້າທີ່ຈະປີດບັນຊີການໃຊ້ຈ່າຍຢູ່ຕ່າງປະເທດ.
ລັດຖະບານທ່ານ Maduro ໄດ້ເຂົ້າຄວບຄຸມເອົາອະດີດໂຮງງານ Kimberly-Clark ໃນວັນຈັນທີ່ຜ່ານມາ ແລະສັ່ງໃຫ້ພວກພະນັກງານກັບຄືນໄປເຮັດວຽກ ໂດຍໃຫ້ຄຳໝັ້ນສັນຍາທີ່ຈະນຳພາເວເນຊູເອລາໃຫ້ກ້າວໄປໜ້າ “ພ້ອມດ້ວຍ ຫລືປາດສະຈາກບໍລິສັດ Kimberly.”
ລະຫວ່າງການຖະແຫລງຜ່ານທາງໂທລະພາບ ທ່ານກ່າວວ່າ “ບໍ່ມີໃຜຈະມາຢຸດຢັ້ງເວເນຊູເອລາໄດ້.”
