ມີລາຍງານວ່າ ປະທານາທິບໍດີ Hugo Chavez ແຫ່ງ Venezuela ມີອາການດີຂຶ້ນ
ຫລັງຈາກການຜ່າຕັດເນື້ອງອກອອກ.
ຮອງປະທານາທິບໍດີ Elias Jaua ໄດ້ປະກາດເລື້ອງນີ້ໃຫ້ຮູ້ໃນວັນອັງຄານວານນີ້ຕໍ່
ບັນດາສະມາຊິກສະພານິຕິບັນຍັດຂອງ Venezuela ທີ່ທ່ານໄດ້ຮັບການຕອບສະ
ໜອງດ້ວຍການຕົບມືແລະໂຮຮ້ອງສະໜັບສະໜຸນປະທານາທິບໍດີ ໄວ 57 ປີທ່ານນີ້.
ທ່ານ Jaua ກ່າວຕໍ່ສະພາແຫ່ງຊາດວ່າ ພວກນາຍແພດໄດ້ຜ່າຕັດເອົາເນື້ອງອກອອກ
ຈາກກະດູກກະໂທ້ຍແລະເນື້ອເຍື່ອໃນບໍລິເວນອ້ອມແອ້ມຂອງປະທານາທິບໍດີ Chavez
ນັ້ນ.
ທ່ານ Chavez ໄດ້ເດີນທາງໄປຍັງຄີວບາໃນສັບປະດາແລ້ວນີ້ເພື່ອທໍາການຜ່າຕັດໃນ
ອັນທີ່ທ່ານກ່າວວ່າ ເບິ່ງຄືວ່າຈະເປັນເນື້ອງອກໂຣກມະເຮັງນັ້ນ. ໃນປີແລ້ວນີ້ ປະທາ
ນາທິບໍດີ Chavez ໄດ້ມີການຜ່າຕັດແລະປິ່ນປົວໂດຍໃສ່ Chemo ທີ່ຄີວບາເພື່ອກໍາ
ຈັດການເຕີບໂຕຂອງໂຣກມະເຮັງຈາກເຂດກະດູກກະໂທ້ຍນັ້ນ.
ຮອງປະທານາທິບໍດີ Jaua ກ່າວວ່າ ທ່ານ Chavez ທໍາການຕິດຕໍ່ພົວພັນຢ່າງໃກ້ຊິດ
ກັບພວກເຈົ້າໜ້າທີ່ລັດຖະບານນັ້ນ. ປະທານາທິບໍດີ Chavez ບໍ່ໄດ້ໂອນອໍານາດໃຫ້
ຮອງປະທານາທິບໍດີໃນລະຫວ່າງທີ່ທ່ານພັກຢູ່ໃນຄີວບານັ້ນ.
ຄີວບາແລະ Venezuela ເປັນພັນທະມິດທີ່ເຂັ້ມແຂງຕໍ່ກັນ ແລະປະທານາທິບໍດີ
Chavez ມີຄວາມພໍໃຈນໍາຄວາມສໍາພັນທີ່ອົບອຸ່ນກັບອະດີດຄະນະນໍາພາແລະປັດຈຸ
ບັນຂອງຄີວບາຄື ທ່ານ Fidel Castro ແລະທ່ານ Raul ນ້ອງຊາຍຂອງທ່ານນັ້ນ.
ປະທານາທິບໍດີ Chavez ໄດ້ຄອງອໍານາດໃນ Venezuela ມາໄດ້13 ປີແລ້ວ ແລະ
ຄາດວ່າຈະຖືກເລືອກຕັ້ງໃຫ້ຄອງອໍານາດອີກສະໄໝ ນຶ່ງຕື່ມອີກ 6 ປີໃນເດືອນຕຸລາ
ປີນີ້. ຄູ່ແຂ່ງຂັນຂອງທ່ານແມ່ນທ່ານ Henrique Capriles ໄວ 39 ປີ ຊຶ່ງເປັນຜູ້ຊະ
ນະການເລືອກຕັ້ງຂັ້ນຕົ້ນຂອງພວກຝ່າຍຄ້ານໃນຕົ້ນເດືອນນີ້.
