ລິ້ງ ສຳຫລັບເຂົ້າຫາ

logo-print

ເຈົ້າ​ໜ້າ​ທີ່ ​ເມືອງວັງ​ວຽງ ຄາດ​ວ່າ ຈະ​ມີ​ນັກ​ທ່ອງ​ທ່ຽວ ຫຼາຍກວ່າ 3 ແສນຄົນ ໃນ​ປີ 2018


​ບ່ອນ​ທ່ອງ​ທ່ຽວ ໃນເມືອງວັງ​ວຽງ ແຂວງວຽງ​ຈັນ ປະ​ເທດ​ລາວ

ອຳ​ນາດ​ການ​ປົກ​ຄອງ​ເມືອງວັງ​ວຽງ ຄາ​ດ​ວ່າຈະ​ດືງ​ດູດເອົ​າ​ນັກ​ທ່ອງ​ທ່ຽວ ໃຫ້​ເດີ​ນ​ທາງ​
ເຂົ້າ​ມາ​ວັງ​ວຽງ​ໄດ້​ຫຼາຍກວ່າ 300,000 ຄົນ ໃນຕະ​ຫຼອດ​ປີ 2018 ນີ້ໂດຍ​ສະ​ເພາະ​ແມ່ນ
​ນັກ​ທ່ອງທ່ຽວ​ຈ​າກ​ປະ​ເທດ​ຈີນ​ນັ້ນ ຊຶ່ງ​ຊົງ​ລິດ ໂພ​ນ​ເງິນ ນັກ​ຂ່​າວ ວີ​ໂອ​ເອ ມີ​ລາຍ​ງານ​
ຈາກບາງກອກ.

ທ່ານ​ຄຳ​ຜອງ ດວງວິ​ໄລ ເຈົ້າ​ເມືອງ ເມືອງວັງ​ວຽງ ແຂວງວຽງ​ຈັນ ໃຫ້​ການ​ຢືນ​ຢັນ​ວ່າ​ໃນ
​ລະ​ຍະ 10 ເດືອນ​ທີ່​ຜ່ານ​ມາ​ຂອງ​ປີ 2018 ນີ້ ມີ​ນັກ​ທ່ອງ​ທ່ຽວ​ເດີນ​ທາງ​ມາ​ທ່ອງ​ທ່ຽວ​ໃນ
​ເຂດ​ວັງ​ວຽງ​ແລ້ວ 250,000 ກວ່າ​ຄົນ ຊຶ່ງ​ເພີ້ມ​ຂຶ້ນ​ເກີນ ກວ່າ 50 ເປີ​ເຊັນ ທຽບ​ໃສ່​ລ​ະ​
ຍະ​ດຽວ​ກັນ​ໃນ​ປີ 2017 ແລະ​ດ້ວຍສະ​ພາບ​ການ​ດັ່ງ​ກ່າວ ຈຶ່ງ​ເຊື່ອ​ໝັ້ນ​ວ່າ​ໃນ​ຕະ​ຫຼອດ​ປີ
2018 ນີ້​ຈ​ະ​ມີ​ນັກ​ທ່ອງ​ທ່ຽວ​ເດີນ​ທາງ​ມາ​ວັງ​ວຽງ​ຈຳ​ນວນ​ທັງ​ໝົດ​ເກີນກວ່າ 300,000
ຄົນ ຢ່າງ​ແນ່ນອນ​ ຫຼື​ເພີ້ມ​ຂຶ້ນ​ເຖິງ 58 ເປີ​ເຊັນ ທຽບ​ກັບ​ໄລ​ຍະ​ຕ​ະ​ຫຼອດ​ປີ 2017 ທີ່​ຜ່ານ
​ມາ ທັ້ງ​ນີ້​ດ້ວຍການ​ບູ​ລະ​ນະ​ແຫຼ່ງ​ທ່ອງ​ທ່ຽວ​ໃຫ້​ສະ​ອາດ​ງາມ​ຕາ ມີ​ຄວາມ​ປອດ​ໄພ ແລະ​
ສ້າງ​ຄວາມ​ປະ​ທັບ​ໃຈ​ໃຫ້​ນັກ​ທ່ອງ​ທ່ຽວ​ຢ່າງ​ແທ້​ຈິງ ດັ່ງ​ທີ່​ທ່ານ​ຄຳ​ຜອງ ຢືນ​ຢັນ​ວ່າ:

“ເພື່ອ​ຮັບ​ຮອງ​ໃຫ້​ແກ່​ການ​ທ່ອງ​ທ່ຽວ ໄດ້​ເວົ້າ​ກັບ​ຜູ້​ປະ​ກອບ​ການ​ເພື່ອ​ຮັບ​ຮອງ​ນັ້ນ ອັນ
​ນຶ່ງ​ມາ​ລ​ະ​ແມ່ນ​ບູ​ລ​ະ​ນະພັດ​ທະ​ນາ​ໃຫ້​ແຫຼ່ງ​ທ່ອງ​ທ່ຽວໃຫ້​ເປັນ​ໜ້າ​ຢູ່ໜ້າ​ຊົມ ແລ​ະ​ໜ້າ​
ໄປ​ທ່ຽວ ທີ່​ກ່ຽວ​ກັບ​ບັນ​ຫາ​ການ​ລ່ອງ​ເຮືອຄາຍັກ ກ​ານທ່ອງ​ທ່ຽວທາ​ງ​ນ້ຳຖື​ວ່າ​ມີ​ຄ​ວາມ
​ປອດ​ໄພ 100 ເປີ​ເຊັນຫັ້ນແລ​ະ ເປັນ​ນ້ຳ​ທີ່​ໃສ​ຂາວ ແລ​ະ​ກະ​ເປັນ​ນ້ຳ​ທີ່​ສ​ະ​ອາດ ກ່ຽວ​
ກັບ​ບັນ​ຫາ​ເສັ້ນ​ທາງ​ຄົມມະ​ນາ​ຄົມ​ເຂົ້າ​ໄປ​ແຫຼ່ງ​ທ່ອງ​ທ່ຽວ​ນີ້ ມາ​ຮອດ​ປັດ​ຈຸ​ບັນ​ນີ້​ກໍ​ຄື​ວ່າ​
ໄດ້​ຮັບ​ການ​ປັບ​ປຸງ​ຈຳ​ນວນ​ນຶ່ງ ເພື່ອ​ຮັບ​ໃຊ້​ໃຫ້​ແກ່​ການ​ທ່ອງ​ທ່ຽວ.”

ໃນ​ປັດ​ຈຸ​ບັນ​ເຂດ​ວັງ​ວຽງ​ມີ​ແຫຼ່ງ​ທ່ອງ​ທ່ຽວທຳ​ມະ​ຊາດ 43 ແຫ່ງ ຊຶ່ງ​ຮວມມີ​ຖ້ຳ 34 ແຫ່ງ
ນ້ຳ​ຕົກ 2 ແຫ່ງ ຍອດ​ພູ​ສູງ 4 ແຫ່ງ ແລະ​ແຫຼ່ງ​ນ້ຳ​ທຳ​ມະ​ຊາດ 3 ແຫ່ງ ຊຶ່ງ​ໄດ້​ສຳ​ເລັດ
​ການ​ພັດ​ທະ​ນາ ແລະ​ເປີດ​ໃຫ້​ບໍ​ລິ​ການ​ແລ້ວ 21 ແຫ່ງ ມີ​ ສ​ະ​ຖານ​ທີ່​ພັກ​ເຊົາ 145 ແຫ່ງ
2,745 ຫ້ອງ ຮ້ານ​ອາ​ຫານ ແລະ​ສະ​ຖານ​ບັນ​ເທີງ​ອີກ 130 ກວ່າ​ແຫ່ງ ໂດຍ​ໃນ​ປີ 2017
ມີ​ນັກ​ທ່ອງ​ທ່ຽວ 189,700 ກວ່າ​ຄົນ​ທີ່​ເດີນ​ທາງເຂົ້າ​ມາ​ທ່ອງ​ທ່ຽວ​ໃນ​ວັງ​ວຽງ ຊຶ່ງ​ໃນ​ນີ້​ກໍ​
ເປັນ​ນັກ​ທ່ອງ​ທ່ຽວ​ຊາວ​ຕ່າງ​ຊາດ 149,400 ກວ່າ​ຄົນ ສ້າງ​ລ​າຍ​ຮັບ​ໃຫ້ພາກ​ບໍ​ລິ​ການ
ແລະ​ການ​ທ່ອງ​ທ່ຽວ​ໃນ​ເຂດ​ເມືອງວັງ​ວຽງ​ໄດ້​ຫຼາຍກວ່າ 94 ຕື້​ກີບ ສ່ວນ​ໃນ​ປີ 2018 ນີ້
​ກໍ​ຄາດ​ວ່າ​ພາກ​ບໍ​ລິ​ການ ແລະ​ການ​ທ່ອງ​ທ່ຽວ​ໃນ​ເຂດ​ວັງ​ວຽງ​ຈະ​ມີ​ລາຍ​ຮັບລວມ​ເກີນ
​ກວ່າ 150 ຕື້​ກີບ​ ຈາກ​ນັກ​ທ່ອງ​ທ່ຽວ 300,000 ກວ່າ​ຄົນ ໃນ​ນີ້​ຈະ​ເປັນ​ນັກ​ທ່ອງ​ທ່ຽວ
​ຊາວ​ຕ່າງ​ຊາດ​ຫຼາຍກວ່າ 200,000 ຄົນ ໂດຍ​ສ​ະ​ເພາະ​ແມ່ນ​ນັກ​ທ່ອງ​ທ່ຽວ​ຈີນ​ນັ້ນ.

ແຕ່​ຢ່າງ​ໃດ​ກໍ​ຕາມ ທ່ານ​ບໍ່​ແສງ​ຄຳ ວົງ​ດາ​ຣາ ລັດ​ຖະ​ມົນ​ຕີວາ​ການ​ກະ​ຊວງ​ຖະ​ແຫຼງ
​ຂ່າວ ວັດ​ທະ​ນາ​ທຳ ແລ​ະ​ທອງ​ທ່ຽວ ຍອມ​ຮັບ​ວ່າ​ພາກສ່ວນ​ທີ່​ໄດ້​ຮັບ​ຜົນ​ປະ​ໂຫຍດ​ຈາກ
​ນັກ​ທ່ອງ​ທ່ຽວ​ຊາວ​ຈີນ ​ທີ່​ເດີນ​ທາງ​ເຂົ້າ​ມາ​ໃນ​ລາວ ໃນ​ລະ​ຍ​ະ​ທີ່​ຜ່ານ​ມາ​ນັ້ນກໍ​ຄືບັນ​ດາ​
ນັກ​ທຸ​ລະ​ກິດ​ຈີນ​ທີ່​ລົງ​ທຶນ​ໃນ​ພາກທຸ​ລະ​ກິດ​ບໍ​ລິ​ການ ແລ​ະ​ທ່ອງ​ທ່ຽວ​ຢ່າງຄົບ​ວົງ​ຈອນ
ໃນ​ລາວ ຈຶ່ງ​ເຮັດ​ໃຫ້​ນັກ​ທຸ​ລະ​ກິດ​ຈີນ​ເຫຼົ່າ​ນີ້​ໄດ້​ຮັບ​ຜົນ​ປະ​ໂຫຍດ​ໃນ​ຖານ​ະ​ທີ່​ເປັນເຈົ້າ
ຂອງ​ກິດ​ຈະ​ການ​ໂຮງ​ແຮມ ຮ້​ານ​ອາ​ຫານ ແລະ​ສະ​ຖານ​ບັນ​ເທີງ​ຕ່າງໆ ທັງ​ຍັງ​ເປັນ​ເຈົ້າ​
ຂອງ​ບໍ​ລິ​ສັດ​ທ່ອງ​ທ່ຽວ ທີ່​ນຳ​ພາ​ບັນ​ດານັກ​ທ່ອງ​ທ່ຽວ​ຊາວ​ຈີນ​ເຂົ້າ​ມາ​ໃນລາວອີກ​ດ້ວຍ.

ໂດຍ​ໃນ​ປີ 2016 ຫາ 2017 ມີນັກ​ທ່ອງ​ທ່ຽວ​ຊາວ​ຈີນ​ເດີນ​ທາງ​ມາ​ລາວ​ຫຼາຍ ກວ່າ 1
ລ້ານ 2 ແສນ​ຄົນ ສ່ວນ​ໃນ​ປີ 2018 ນີ້ ຄາດ​ວ່າ​ຈະ​ມີ​ນັກ​ທ່ອງ​ທ່ຽວ​ຊາວ​ຈີນ​ເດີນ​ທາງ
​ມາລາວ​ເກີນກວ່າ 800,000 ຄົນ ແລະ​ດ້ວຍ​ສະ​ພາບ​ການ​ດັ່ງ​ກ່າວ​ນີ້ ຈຶ່ງ​ເຮັດ​ໃຫ້​ທຸ
​ລະ​ກິດ​ບໍ​ລິ​ການ ແລະ​ທ່ອງ​ທ່ຽວຂອງ​ລາວ​ຈະ​ຕ້ອງ​ປັບ​ປຸງ​ ຕົ​ວ​ເອງ ເພື່ອ​ໃຫ້​ສາ​ມາດ​
ແຂ່ງ​ຂັນ​ກັບ​ບັນ​ດາ​ນັກທຸ​ລະ​ກິດ​ຈີນ ໃຫ້​ໄດ້​ທັງ​ໃນ​ດ້ານ​ບຸກ​ຄະ​ລາກອນ ແລະ​ຄຸນ​ນະ​
ພາບ​ການ​ໃຫ້​ບໍ​ລິ​ການ​ທີ່​ຮວມ​ເຖິງ​ສິ່ງອ​ຳ​ນວຍ​ຄວາມ​ສະ​ດວກ​ສະ​ບາຍ​ຕ່າງໆ ຢ່າງ​
ຄົບ​ຖ້ວນ​ອີກ​ດ້ວຍ.

ທາງ​ດ້ານ​ທ່ານ​ນາງ​ບຸນ​ພັກ ອິນ​ທະ​ປັນ​ຍາ ຮອງ​ເຈົ້າ​ແຂວງ​ໄຊ​ຍ​ະ​ບູ​ລີ ໄດ້​ຢືນ​ຢັນ​ວ່າ
ທຸລະ​ກິດ​ບໍ​ລິ​ການ ແລ​ະ​ທ່ອ​ງ​ທ່ຽວ​ໃນ​ແຂວງ​ໄຊ​ຍະ​ບູ​ລີ ມີ​ທ່າ​ອ່ຽງ​ຂະ​ຫຍາຍ​ໂຕ​ເພີ້ມ​ຂຶ້ນ​
ຢ່າງ​ຕໍ່​ເນື່ອງ ໂດຍ​ໃນ​ປີ 2017 ທີ່​ຜ່ານ​ມາ​ກໍ​ປາ​ກົດ​ວ່າ​ມີ​ນັກ​ທ່ອງ​ທ່ຽວ​ຊາວ​ຕ່າງ​ຊາດ
ເດີນ​ທາງ​ເຂົ້າ​ມາ​ໃນ​ແຂວງ​ໄຊ​ຍ​ະ​ບູ​ລີ​ຈຳ​ນວນ 150,000 ກວ່າ​ຄົນ​ເຮັດ​ໃຫ້​ພາກ​ທຸ​ລະ​
ກິດ​ບໍ​ລິ​ການ ແລະ​ທ່ອງ​ທ່ຽວ​ຂອງ​ແຂວງ​ໄຊ​ຍະ​ບູ​ລີ ມີ​ລາຍ​ຮັບ​ຮວມ​ເກີນກວ່າ 6 ລ້ານ
5 ແສນໂດ​ລາ​ສະ​ຫະ​ລັດ ສ່ວນ​ໃນ​ປີ​ທ່ອງ​ທ່​ຽວ​ລາວ 2018 ນີ້​ກໍ​ຄາດ​ໝາຍວ່າຈະ​ມີ​ນັກ​
ທ່ອງ​ທ່ຽວ​ຊາວ​ຕ່າ​ງຊາດ ເດີນ​ທາງ​ເຂົ້າ​ມາ​ໃນ​ແຂວງ​ໄຊ​ຍະ​ບູ​ລີ​ຫຼາຍກວ່າ 300,000
ຄົນ ຊຶ່ງກໍຈະ​ເຮັດ​ໃຫ້ພາກບໍ​ລິ​ການ​ແລະທ່ອງ​ທ່ຽວ​ມີ​ລາຍ​ຮັບ​ເກີນກວ່າ 18 ລ້ານ​ໂດ​ລາ
​ສະ​ຫະ​ລັດ ທັງ​ຍັງ​ເປັນ​ປັດ​ໃຈ​ທີ່​ຈະ​ດືງ​ດູດການ​ລົງ​ທຶ​ນ​ຈາກ​ຕ່າງ​ປະ​ເທດ​ໄດ້​ເພີ້ມ​ຂຶ້ນ​
ດ້ວຍ ໂດຍ​ສະ​ເພາະ​ແມ່ນ​ການ​ລົງ​ທຶນ​ຂອງ​ບໍ​ລິ​ສັດ​ທ່ອງ​ທ່ຽວຈີນ 7 ລາ​ຍ​ທີ່​ນຳ​ພາ​ນັກ
​ທ່ອງ​ທ່ຽວ​ຊາວ​ຈີນ​ເຂົ້າ​ມາ​ໃນ​ແຂວງ​ໄຊ​ຍະ​ບູ​ລີ.

ປັດ​ຈຸ​ບັນ​ ແຂວງ​ໄຊ​ຍະ​ບູ​ລີ​ມີ​ໂຮງ​ແຮມ 7 ແຫ່ງ ເຮືອນ​ພັກ 167 ແຫ່ງ ​ຣີສອດ 7 ແຫ່ງ
ສາ​ມາດ​ຮອງ​ຮັບ​ນັກ​ທ່ອງ​ທ່ຽວ​ໄດ້​ເກືອບ 3,000 ຄົນ​ໃນ​ແຕ່​ລະ​ວັນ ມີ​ຮ້າ​ນ​ອາ​ຫານ
57 ແຫ່ງ ຮ້ານ​ກິນດື່​ມ 36 ແຫ່ງ ສະ​ຖານ​ບັນ​ເທີງ 19 ແຫ່ງ ແລ​ະ​ມີ​ແຫຼ່ງ​ທ່ອງ​ທ່ຽວ
ທຳ​ມະ​ຊາດ ປະ​ຫວັດ​ສາດ ແລະ​ວັດ​ທ​ຫະ​ນາ​ທຳ​ເຖິງ 45 ແຫ່ງ.

ທ່ານອາດຈະມັກເລື້ອງນີ້ຄືກັນ

XS
SM
MD
LG